ZanziNews

Nguvu za wananchi kujiletea maendeleo ziungwe mkono - Dk.Shein

Na Mwantanga Ame

RAIS wa Zanzibar na Mwenyekiti wa Baraza Mapinduzi Dk. Ali Mohamed

Shein, ameitaka Wizara ya Afya Zanzibar kutekeleza

maagizo yake ya kuchangia nguvu za wananchi katika miradi ya

maendeleo ya ujenzi wa vituo vya afya unaoendelea maeno mbali mbali ya

Unguja na Pemba.

Dk. Shein aliyasema hayo jana wakati akiwahutubia wananchi katika ziara

ya Mkoa wa Kusini baada ya kuweka mawe ya msingi ya vituo vya afya,

nyumba za madaktari na ujenzi wa kuongeza madarasa kupitia mchango wa

Wazanzibari walionje ya nchi.

Dk.Shein alisema anashangazwa na wizara hiyo ya afya kuwa bado hadi

sasa haijaweza kuweka mpango wa kuanzisha uchangiaji wa miradi ya

maendeleo ya ujenzi wa vituo vya afya ingawa tayari alishatoa agizo

hilo kwa muda sasa.

Alisema kama Serikali haiwezi kuepuka kuchangia nguvu za Wananchi na

anashangazwa kwa Wizara hiyo haina hata mpango wa aina hiyo na kuamua

kuacha kazi hiyo kufanywa moja kwa moja na wananchi.

Alisema nguvu za wananchi zinahitaji kuthaminiwa na haiwezekani

kuachwa kutoungwa mkono na serikali na ni lazima wizara ifikirie kuwa

na mpango huo ili kuutekeza hapo baadae.

Alisema kuanzia sasa serikali inataka kuona Wizara hiyo katika mipango

yake ijayo ya Bajeti inakuwa na fungu la kufanyia kazi hizo kwani

uwezekano wa kufanya hivyo inaonekana upo ndani ya wizara hiyo.

Alisema hivi sasa wizara ya elimu imekuwa ikisaidia mchango wa

wananchi kwa kuwaachia kujenga majengo katika hatua za awali na baadae

katika umaliziaji imekuwa ikifanya kazi hiyo jambo ambalo limekuwa

likiwapa moyo wananchi.

Alisema anasikitishwa kuona Wizara hiyo kwa muda mrefu ameiagiza kuwa

na mpango wa kuchangia vituo vya afya kwa kuvimaliza baada ya wananchi

kujitolea lakini hadi sasa hakuna kilichofanyika.

Akitoa mfano alisema katika ujenzi wa kituo cha Afya cha Kwamtipura na

Mpendae, aliagiza kumalizwa kwa majengo yake na Wizara hiyo, lakini

hadi sasa hakuna kilichofanyika.

Alisema hafahamu ni kwanini Wizara hiyo inashindwa kulitekeleza hilo

wakati serikali ikifahamu fika kuwa wapo wafadhili wanaoweza

kuisaidia Wizara hiyo kama inavyotokea katika sekta ya Elimu.

Alisema kuacha kuchangia sekta hiyo katika miradi ya wananchi hiyo ni

aibu kubwa kwa serikali kuacha kuwaunga mkono nguvu za wananchi wakati

wao wakiwa tayari wameamua kuichangia serikali yao.

“Napata tabu sana kuona Wizara ya Afya mara nyingi nilishawaambia

kuchangia miradi ya wananchi katika maendeleo ya kukuza vituo vya Afya

lakini cha kushangaza sana hakuna lililofanyika” alisema Rais.

Akiendelea alisema atachohakikisha ni kuona kwa Wizara hiyo mwakani

katika bajeti yake lazima itenge fedha kwa ajili ya kusaidia miradi

hiyo ya maendeleo ya ujenzi wa vituo vya afya.

Aidha Dk. Shein aliwapongeza wananchi kwa mchango wao mkubwa

waliojitolea kuona wanaibadili sekta ya afya kwa kuamua kuwajengea

vituo vya afya pamoja na nyumba za madaktari.

Dk. Shein aliwataka wananchi hao kuona mchango wao huo wanauendeleza

ili kuifanya sekta ya afya kuwa yenye kutoa huduma bora kwa wananchi.

Vile vile, Dk. Shein aliipongeza Idara ya Diaspora kwa jitihada

inazozifanya za kuwashajiisha wazanzibari kuchangia maendeleo ya

wananchi wa Zanzibar.

Alisema ameamua kuanzisha idara hiyo kwa lengo la kuwaunganisha

Wazanzibari katika kuchangia maendeleo ya Zanzibar na kuanza

kujitokeza kwa baadhi ya Wazanzibari kuchangia maendeleo ya Zanzibar

ni hatua nzuri.

Alisema Serikali ya Zanzibar itathamini mchango wa taasisi hiyo na

kuwatolea wito wazanzibari ambao bado hawajaitumia taasisi hiyo kuona

inatumia nafasi hiyo ili kuchangia maendeleo ya Zanzibar.

Akiendelea alisema hivi sasa serikali imefarajika kuona tayari baadhi

yao wameanza kujitokeza na kujenga skuli, vituo vya afya pamoja na

kutoa vifaa kwa ajili ya kuwapatia huduma bora wananchi.

Akizungumzia juu ya maendeleo ya ujenzi wa skuli, pia aliwapongeza

wananchi wa Unguja Ukuu kwa mchango walioutoa wa kuhakikisha

wanashirikiana na kamati za maendeleo za maeneo yao kujenga majengo

mapya.

Alisema hiyo itaongeza idadi ya watoto kuweza kupata nafasi nzuri za

kusomea masomo yao bila ya kupata usumbufu katika kupata elimu.

Akiendelea Dk. Shein aliwataka wananchi kuona wanathamini miradi

wanayopatiwa na Wawekezaji ili waweze kuwapa moyo kuendelea kuwasaidia

hapo baadae na sio kuifuja jambo ambalo linaweza likawavunja moyo.

Mapema Dk. Shein alipokea taarifa ya Mkoa huo ambapo ilieleza bado mkoa

huo umekuwa unakabiliwa na changamoto mbali mbali zikiwemo suala la

matukio ya ubakaji, unyanyasaji wafanyakazi katika mahoteli ya kijalii

na ajira kufanya kwa wageni,

Pia Dk. Shein katika ziara hiyo alifanya ukaguzi katika eneo jipya

lilojengwa mnara wa kurushia matangazo ya kituo cha ZBC Redio katika kituo cha Bungi ambapo aliahidiwa kazi hiyo inatarajiwa kukamilika baada ya miezi miwili.

Katika ziara hiyo Dk Shein, alikagua shamba la mpunga katika kijiji cha

Uzini, aliweka mawe ya msingi katika kijiji cha Unguja Ukuu, na Mwera

Kiongoni ambapo aliweka jiwe la msingi la jengo hilo pamoja na jengo

la nyumba ya daktari.