Uamsho Yajivua Lawama za Machafuko Zanzibar

Khamis Amani na Emmanuel Siame, AJTC

JUMUIYA ya Uamsho na mihadhara ya kiislamu Zanzibar imekanusha kuhusika na vurugu zilizotokea Zanzibar, ikiwemo uchomaji wa makanisa na uharibifu wa mali za wananchi zilizotokea Zanzibar mwishoni mwa wiki iliyopita na mwanzoni mwa wiki hii.

Naibu Amiri na msemaji mkuu wa Jumuiya hiyo, Sheikh Farid Had Ahmed amesema kuwa, Jumuiya yake haikupendelea vuguru hizo ambazo zimeiondolea Zanzibar sifa kubwa ya amani na utulivu iliyokuwa nayo.

Pamoja na hayo, Sheikh Farid alifahamisha kuwa, Jumuiya ya Uamsho itaendelea na kazi zake za mihadhara kama ilivyojiwekea na kutarajia kufanya mhadhara mkubwa katika viwanja vya Lumumba Juni 3 mwaka huu.

Akizungumza na waandishi wa habari wa vyombo mbali mbali huko msikiti wa Mbuyuni wilaya ya Mjini Unguja, Sheikh Farid alisema kwamba vitendo hivyo vya uvunjifu wa amani hasa vya uchomaji moto wa makanisa ni jambo la kulaaniwa kwa nguvu zote.

Alisema kwamba, Jumuiya ya Uamsho inafuatilia kwa kina zaidi suala hilo na hadi hivi sasa imeshapata majina ya watu wanaowatuhumu kuhusika na suala hilo, na endapo wakiwabaini kuhusika baada ya uchunguzi huo kukamilika, watawafikisha katika vyombo vya sheria ili hatua za kisheria zichukuliwe dhidi yao.

Alifahamisha kuwa, dini ya Kiisilamu haimbagui, kumuonea wala kumuonea asiekuwa Muislamu, na kila siku inahimiza mshikamano na maelewano kwa watu wa dini nyengine, kama alivyokuwa akifanya Mtume Muhammad (S.A.W).

Katika kikao hicho Sheikh Farid,  aliwataka waumini wa dini ya Kiislamu pamoja na wananchi kwa ujumla kudumisha amani na utulivu kama yalivyozungumzwa katika kitabu kitukufu cha Qur'ani na hadithi za Mtume Muhammad (S.A.W).

Aidha amelitaka Jeshi la Polisi kufuata taratibu za kisheria, ili kuondosha machafuko katika nchi ambayo mengi yao yanadaiwa kuwa Jeshi la Polisi linakuwa ni chanzo.

 "Sisi hatukatai kushitakiwa ikiwa  tutaonekana tuna makosa ikiwa tumekiuka sheria na Katiba ya nchi, ikiwa Jeshi la Polisi kwa upande wao watafuata taratibu za kisheria hasa za ukamataji", alisema.

Hata hivyo, pamoja na Serikali ya Mapinduzi ya Zanzibar kufuta mihadhara yote ya kidini hapa nchini hadi kutolewa kwa taarifa zake, lakini Sheikh Farid alisema kuwa Jumuiya ya Uamsho itaendelea na kazi zake kama ilivyojipangia.

Pamoja na mhadhara huo wa Juni 3, usiku wa kuamikia leo katika Msikiti Afraa Kidongochekundu wilaya ya Mjini Unguja, kulitarajiwa kufanyike Itikafu ya kuiombea amani nchi pamoja na kuwaombe dua watoto walio chini ya umri wa miaka 18 waliofikishwa mahakamani kwa kuhusishwa na machafuko hayo.

Pamoja na Itikafu hiyo, Sheikh Farid ameiomba mahakama iwapunguzie masharti ya dhamana watoto hao, kutokana na msharti yaliopo hivi sasa ni makubwa mno kwao kuyatekeleza pamoja na kuzitia mashaka familia zao.