.jpg)
TAARIFA YA RAIS WA ZANZIBAR NA MWENYEKITI WA
BARAZA LA MAPINDUZI, MHE.
DK. ALI MOHAMED SHEIN, KWA
WAANDISHI WA HABARI, 12
NOVEMBA, 2013 IKULU, ZANZIBAR
Ndugu Waandishi wa Habari
na Ndugu Wananchi,
Assalam Alaikum,
Kwa
mara nyingine tena nina furaha kukukaribisheni Ikulu kwa mazungumzo ya pamoja.
Nimewahi kukutana nanyi katika utaratibu wetu wa kawaida mara mbili hapa Ikulu
na katika sehemu nyengine. Ingawa hatujakutana katika utaratibu wa aina hii kwa
muda sasa hapa Ikulu, kutokana na kuwepo shughuli nyengine za kitaifa
zilizopelekea kuzungumza na wananchi kwa jumla.
Kwa mfano sikukuu za Iddi, mkutano wa hadhara na taarifa muhimu kwa
wananchi na kadhalika. Lakini leo nimeitisha mkutano huu kwa madhumuni ya
kuzungumza nanyi na wananchi wote kwa jumla juu ya hali ya nchi yetu katika
miaka mitatu ya Serikali ya Mapinduzi ya Zanzibar, Awamu ya Saba yenye muundo
wa Umoja wa Kitaifa, ninayoiongoza.
Kama
mnavyoelewa, niliingia madarakani kuwa Rais wa Zanzibar na Mwenyekiti wa Baraza
la Mapinduzi tarehe 3 Novemba 2010 baada ya kuapishwa rasmi kufuatia
kuchaguliwa na wananchi waliowengi katika uchaguzi Mkuu uliofanyika tarehe 31
Oktoba, 2010 kwa mujibu wa Katiba ya Zanzibar ya mwaka 1984.
Mara
tu baada ya kuingia madarakani nilitekeleza wajibu wa Kikatiba kwa kuwateua
viongozi mbali mbali wa Serikali na kuwaapisha katika nyakati mbali mbali.
Tarehe
10 Novemba 2010 nililizindua Baraza la Wawakilishi la saba (7) ambapo
niliuelezea mwelekeo wa Serikali na Mipango yake kwa kuzingatia Ilani ya
Uchaguzi Mkuu wa Mwaka 2010/2015 ya CCM, MKUZA II na Malengo ya Milenia.
Ndugu Waandishi wa Habari na Ndugu Wananchi,
Napenda
nikumbushe kwamba shughuli ya Uchaguzi Mkuu na uundaji wa Serikali yenye Muundo
wa Umoja wa Kitaifa zilifanyika wakati hali ya nchi ikiwa tulivu, shwari na
salama na wananchi wakiwa katika hali ya mshikamano, umoja na kufahamiana. Hali
hiyo iliipa sifa kubwa nchi yetu na ikaiwezesha Serikali ya Mapinduzi ya
Zanzibar ya Awamu ya Saba kuanza kutekeleza vyema kazi zake.
Nachukua
fursa hii kuwashukuru sana Makamu wangu wawili, Mheshimiwa Maalim Seif Sharif
Hamad na Mheshimiwa Balozi Seif Ali Iddi
kwa jitihada na kazi zao kubwa walizozichukua
katika kipindi hiki cha miaka mitatu kwa kunisaidia katika kuiongoza
Zanzibar. Umahiri wao na uadilifu wao
umesaidia sana katika kuwatumikia wananchi. Vile vile natoa shukurani kwa Mawaziri, Naibu Mawaziri, Katibu Mkuu
Kiongozi na Katibu wa Baraza la Mapindzi, Makatibu Wakuu, Naibu Makatibu Wakuu
na Watendaji Wakuu wengine wote wa Idara na taasisi mbali mbali za Serikali
yetu kwa kufanya kazi kwa bidii katika kuyatekeleza malengo ya Serikali. Lakini
lazima niseme Juhudi za watendaji hao zimefanikiwa kutokana na kazi nzuri
inayofanywa na wafanyakazi wote wa Serikali na Taasisi zote pamoja na
ushirikiano mkubwa wa wananchi. Natoa pongezi na shukurani kwa wote.
MISINGI YA KIUTAWALA,
AMANI NA UTULIVU
Ndugu Waandishi na Ndugu
Wananchi,
Serikali
ya Mapinduzi ya Zanzibar ya Awamu ya Saba imekuwa ikitekeleza kazi zake vizuri
kwa kuzingatia Katiba na Sheria katika kuwatumikia wananchi, kama ilivyofafanua
Katiba ya Zanzibar ya 1984 kifungu cha 9(2)(a) kinachoeleza nanukuu: “mamlaka ya kuendesha nchi ni ya wananchi
wenyewe ambapo nguvu na uwezo wote wa Serikali kufuatana na Katiba unatoka kwa
wananchi wenyewe”. Kwa hivyo, tumeingia madarakani tukiufahamu wajibu wetu
wa kuwaletea maendeleo wananchi wote bila ya ubaguzi na kwamba Serikali hii
inawajibika kwao.Aidha, Kifungu cha 9(b) cha Katiba hiyo kinasema;
“Usalama na hali nzuri kwa wananchi itakuwa ndiyo lengo kubwa la Serikali” na kwa hivyo wakati wote Serikali yetu inachukua hatua madhubuti ya kuhakikisha kwamba usalama na utulivu wa nchi inakuwepo wakati wote na mshikamano na mapenzi baina ya wananchi yanaendelezwa. Amani na utulivu ndio nguzo kubwa ya maendeleo yetu ndio maana tunapobaini kuwa usalama na utulivu, amani na mshikamano inatishiwa kuvunjwa, huwa tunachukua hatua kali kwa wanaohusika. Kwa hivyo, jambo kubwa na la msingi tunalopaswa kulienzi na kuliendeleza ni kwa bidii zetu zote ni suala zima la umoja na mshikamano wenu,
ambao ndio siri kubwa ya kuendelea na kuwepo kwa hali ya amani na utulivu yenye kuimarisha maendeleo yetu. Katika kipindi chote cha miaka mitatu Zanzibar iko salama na wananchi tunaishi kwa salama, amani na mshikamano. Hata hivyo, katika kipindi cha mwaka 2012 kwa nyakati tafauti tulishuhudia vitendo vya vurugu na fujo; ambavyo vilidhibitiwa na vyombo vyetu vya ulinzi na usalama. Tutaendelea kuchuka hatua hizi wakati wote, bila ya kuwa na khofu wala woga lakini kwa kuzingatia misingi ya utawala bora. Wito wangu kwa wananchi wote ni kuzidi kuimarisha umoja, amani na utulivu na mafanikio tuliyoyapata.
Ndugu Waandishi na Ndugu
Wananchi,
Kwa
sababu tumeweza kudumisha na kuiendeleza amani na utulivu katika kipindi cha
miaka mitatu, Serikali imefanikiwa kupata maendeleo makubwa katika utekelezaji
wa mipango ya Serikali inayotokana na Dira ya 2020 na MKUZA II na Ilani ya CCM ya Uchaguzi Mkuu wa mwaka
2010/2015 ambayo imezingatia Katiba ya nchi yetu. Kwa mara nyengine nainukuu
Katiba kifungu cha 10 kinachosema;-
“ Kwa madhumuni ya kuendeleza umoja na maendeleo ya watu na ustawi wa
jamii katika nchi itakuwa ni wajibu wa Serikali ya Mapinduzi ya Zanzibar:-
a) Kutoa
huduma za kutosha kwa ajili ya kuendeleza watu katika njia za mtu kuwa huru
kwenda atakapo na utoaji huduma kwa watu na kutoa haki zote za kuishi kwa
Mzanzibari sehemu zote za Zanzibar.
b) Kuondosha
kabisa vitendo vya rushwa na utumiaji mbaya wa cheo dhidi ya umma kwa wale wote
walio na madaraka.
c) Kusimamia
Maendeleo ya Uchumi wa Nchi kufuatana na misingi na madhumuni yaliyowekwa na
Katiba na kuhakikisha upatikanaji wa huduma bora, kuwatibu na kusimamia
uendeshaji wa rasilimali muhimu za nchi.
d)
Kutoa mwongozo wa
kuhakikisha Maendeleo ya Uchumi yenye urari na yaliyopangika na kwamba mfano wa
kiuchumi hautafanyika katika utaratibu
utakaopelekea kulimbikiza kwa utajiri na
njia za kuzalisha mali kwa watu wachache au kikundi fulani. ’’
Vifungu vyengine (e)-(i) ambavyo
sikuvinukuu hapa ni sehemu ya kifungu cha 10.
Ndugu Waandishi wa
Habari na Ndugu Wananchi,
Napenda
nichukue fursa hii kuelezea baadhi ya mafanikio tuliyoyapata katika sekta za
uchumi, huduma za jamii, miundombinu, utawala bora na nyinginezo kwa maendeleo ya nchi yetu.
UCHUMI
Wakati
tunaadhimisha miaka mitatu ya Serikali ya Mapinduzi ya Zanzibar, Awamu ya Saba,
ni faraja na fahari kwetu kuona
kuwa utekelezaji wa Ilani ya CCM ya
Uchaguzi Mkuu wa mwaka 2010/2015 na mipango mikuu ya Serikali katika kukuza
uchumi unakwenda kwa mujibu wa matarajio na mipango yetu. Juhudi kubwa
zinazochukuliwa na Serikali katika kuimarisha ukusanyaji wa mapato, uwezeshaji,
na ushirikishaji wa wananchi katika harakati za kujenga uchumi wetu zimekuwa
zikizaa matunda mazuri.
Ukusanyaji wa mapato ya ndani umekuwa ukiongezeka mwaka hadi mwaka. Katika mwaka 2010/2011 tulikusanya Tsh. 181.4 bilioni, mwaka 2011/2012 tulikusanya Tsh. 212 bilioni na katika mwaka 2012/103 ukusanyaji ulikuwa Tsh. 266.2 bilioni. Juhudi za kuimarisha Bodi ya Mapato ya Zanzibar (ZRB) zinaendelezwa pamoja na kuimarisha mashirikiano na Mamlaka ya Mapato Tanzania (TRA).
Uchumi
wetu umekuwa ukikua kila mwaka. Ulikua kwa asilimia 6.4 katika mwaka 2010
ulifikia asilimia 6.7 katika mwaka 2011 na ulifikia asilimia 7.0 katika mwaka
2012 na tunatarajia kwa mwaka 2013 utafikia asilimia 7.5.
Ndugu Waandishi wa Habari
na Ndugu Wananchi,
Itakumbukwa
kuwa wakati tunaingia madarakani, pato la Mtu Binafsi lilikuwa ni Tsh. 726,000
na maelekezo ya Ilani ya CCM ya Uchaguzi Mkuu wa Mwaka 2010 yalilenga Pato la
Mtu Binafsi lifikie Tsh. 884,000 ifikapo mwaka 2015.
Jitihada
za Serikali ya Mapinduzi ya Zanzibar zimefanikiwa kuliongeza Pato la Mtu
Binafsi kutoka Tsh. 726,000 mwaka 2010
hadi kufikia Tsh. 960,000 mwaka 2011 ambazo ni sawa na Dola za Kimarekani 611
kutoka Dola 560, mwaka 2010. Katika mwaka 2012, Pato la Mtu Binafsi
liliongezeka na kufikia Tsh. 1,003,000 sawa na dola za Kimarekani 638.
Huduma
za benki zimeendelea kuimarishwa
ili kutoa huduma nzuri kwa sekta binafsi
ili nazo zitoe mchango mkubwa katika kukuza uchumi na soko la ajira nchini.
Mikopo ya Benki kwa sekta binafsi iliongezeka kutoka Tsh.147.5 bilioni mwezi
Septemba 2011 hadi kufikia Tsh. 150.9 bilioni mwezi wa Septemba 2012. Taasisi
za kifedha zinaendelea kuimarika kutoka asilimia 4.0 mwaka 2011 hadi kufikia
asilimia 10.2 mwaka 2012.
Licha
ya mafanikio hayo tuliyoyapata hata hivyo, bado mfumko wa bei umekuwa ukitupa
changamoto kadhaa na mwaka 2011, ambapo ulifika asilimia 14.7. Jitihada mbali
mbali zimechukuliwa katika kukabiliana na hali hiyo ikiwa ni pamoja na
kuimarisha shughuli za kilimo, kuwapunguzia wananchi ushuru katika baadhi ya
bidhaa muhimu na kushajihisha uwekezaji. Mwaka 2012 mfumko wa bei ulishuka na
kufikia asilimia 9.4 na hivi sasa umefikia asilimia 4.4.
BIASHARA NA VIWANDA
Ndugu Waandishi wa Habari
na Ndugu Wananchi,
Kutokana
na kuwepo kwa mazingira mazuri ya biashara nchini, biashara ya usafirishaji na
uingizaji wa bidhaa umeweza kuimarika ambapo usafirishaji hasa wa karafuu na mwani umeongezeka kutoka
Tsh. 17,907.0 milioni mwaka 2010 hadi Tsh. 67,390.5 milioni mwaka 2012,
ongezeko la asilimia 276.3. Bidhaa zenye
thamani ya Tsh. 271,273.1 milioni zimeagiziwa, mwaka 2012 kutoka Tsh. 129,137
milioni mwaka 2010.
Serikali imeweza kusimamia upandaji wa bei holela kwa
bidhaa muhimu kama Mchele, Sukari na Unga wa ngano kwa kuunda kanuni maalum za uagiziaji na kusimamia
mwenendo wa biashara ambapo hivi sasa bei zinapangwa kwa mashirikiano ya pamoja
baina ya serikali na wafanyabiashara wa ngazi zote. Serikali imetoa ruhusa kwa wanaotaka kuagizia
bidhaa hizo muhimu hapa Zanzibar, waagizie kwa mujibu wa taratibu zilizowekwa.
Wananchi wanaombwa kuondokana na dhana kuwa kuna wafanyabiashara wachache ndio
waliopewa vibali vya kuagizia bidhaa za namna hiyo.
Tarehe
21 Agosti, 2011 Serikali imelifanyia mageuzi makubwa ya shirika la ZSTC na
tayari imeshapitisha sheria mpya ya ZSTC yenye lengo la kuweka muundo mpya wa
shirika hilo kwa lengo la kupunguza gharama za uendeshaji, na kuweka majukumu
mapya. Kwa upande wa biashara ya karafuu, Serikali inatekeleza mpango wa kuweka
Utambulisho wa Karafuu ya Zanzibar (Branding) ili iweze kutambulika kimataifa
na kupata hadhi na bei zaidi katika masoko ya dunia.
Ndugu Waandishi wa Habari
na Ndugu Wananchi,
Katika
kuimarisha mazingira ya biashara na viwanda nchini, Serikali imeamua kuifanya
Zanzibar kuwa Eneo Tengefu la Kiuchumi (SEZ) ndani ya Jumuiya ya Afrika
Mashariki. Taasisi ya Viwango Zanzibar
(ZBS) imeanzishwa, ili kusimamia ubora na kuweka viwango vya bidhaa
zinazozalishwa na zinazoingizwa nchini.
Jitihada
za kuvifufua na kuvikuza viwanda hapa
nchini zinaendelezwa, na katika kipindi cha 2011/12 jumla ya miradi tisa ya
viwanda yenye jumla ya mitaji ya dola za Kimarekani 7.5 milioni iliidhinishwa
na Mamlaka ya Vitega uchumi ( ZIPA). Mchango wa sekta hii bado ni mdogo katika
Pato la Taifa, hata hivyo ukuaji wake umekuwa
ukiongezeka mwaka hadi mwaka.
Hivi
karibuni ujenzi wa kiwanda kikubwa cha maziwa cha Azam Diary factory katika
eneo la Fumba, Unguja umeanza kiwanda hicho kitasarifu bidhaa za maziwa na
kinatarajiwa kuajiri zaidi ya wafanyakazi 200. Aidha, kiwanda cha Sukari cha
Mahonda kinaendelea kufufuliwa na wafanyakazi 350 wamepatiwa ajira.
Serikali imekuwa
ikishajihisha ushiriki wa Sekta binafsi kuekeza katika viwanda kwa njia mbali
mbali ikiwemo kupitia mikutano ya Baraza la Biashara la Zanzibar.
UWEZESHAJI
KIUCHUMI.
Ndugu Waandishi wa Habari
na Ndugu Wananchi,
Katika
azma ya kuendelea kuwawezesha wananchi kiuchumi na kuyashughulikia kwa ufanisi
mkubwa masuali ya kazi na ajira hivi karibuni nilianzisha Wizara ya Uwezeshaji,
Ustawi wa Jamii, Vijana, Wanawake na Watoto na Wizara ya Nchi (OR) Kazi na
Utumishi wa Umma.
zilikopeshwa
kwa wananchi wapatao 212 kupitia Mfuko wa Kujitegemea Unguja na Pemba. Kutokana
na Mfuko wa JK/AK jumla ya Tsh. Bilioni 1.5 zimekopeshwa kwa wananchi mbali
mbali. Vikundi 11 vyenye wanachama 1,526
vimeanzishwa Unguja na Pemba. Jumla ya vikundi 789 wamepatiwa mafunzo ya
kitaalamu kwa kupitia program ya ASSP katika Wilaya zote. Aidha, vikundi vya vijana 58 vimepewa Tsh. 192.4 milioni kupitia mfuko wa
vijana wenye thamani ya Tsh. 300 milioni.
Vile vile, Serikali imeanzisha mfuko wa Zaka ambapo vikundi 142 kutoka
Unguja vilipatiwa jumla ya Tsh. 196.3 milioni na vikundi 57 kutoka Pemba
vilipatiwa jumla ya Tsh. 104.2 milioni. Jitihada zipo katika hatua za mwisho za
kuuzindua mfuko wa uwezeshaji nchini, uliowekewa lengo la kuwasaidia vijana na
watu wengine kwenye jamii.
Kwa
upande wa ajira za Serikalini, katika kipindi cha mwaka wa fedha 2012/2013
Serikali iliidhinisha fursa za ajira mpya 2,552 na hadi kufikia mwezi Juni, 2013 Serikali
imeweza kutoa ajira zipatazo 2,934 na kwa mwaka wa fedha 2013/2014 Serikali
imelenga kutoa ajira 2,464. Kadhalika,
ajira kadhaa zimeweza kupatikana kutoka kwenye sekta binfasi.
U T A L I I
Ndugu Waandishi wa Habari
na Ndugu Wananchi,
Serikali
ya Mapinduzi ya Zanzibar, Awamu ya Saba, iliingia madarakani ikiwa na dhamira
ya kubwa ya kuiimarisha sekta ya Utalii. Katika hotuba niliyoitoa kwenye uzinduzi wa Baraza la Nane la
Wawakilishi nililezea juu ya lengo letu la kuibadilisha sura ya sekta ya utalii
ili iwe na mchango mkubwa zaidi katika uchumi wetu ikiwa ni sekta kiongozi kwa
kuzingatia MKUZA II. Nilibainisha nia
yetu ya kuufanya utalii kuwa ni kichocheo cha sekta nyengine ikiwemo kilimo,
ufugaji, uvuvi, usafiri wa anga na baharini pamoja na shughuli za ujasiriamali. Katika kutekeleza dhamira hiyo tarehe 16
Oktoba, 2011 niliitangaza dhana ya ‘Utalii kwa Wote’ katika Mkutano wa Sita wa
Baraza la Biashara la Zanzibar katika Hoteli ya Bwawani. Kamati za Utalii kwa
wote za Wilaya za Unguja na Pemba tayari zimeundwa ili kuziimarisha huduma za
utalii kwenye Wilaya, na kuwahamasisha wananchi kuendeleza miradi ya uzalishaji
mali, hususan kilimo cha mboga mboga, matunda, biashara ndogo ndogo na
kadhalika.
Chuo
cha Maendeleo ya Utalii kilichoko Maruhubi
kinaimarishwa ili kitekeleze kwa ufanisi zaidi lengo la kujenga
rasilmali watu wenye ujuzi, utaalamu na stadi
zinazohitajika. Lengo letu ni kukifanya chuo hicho kiendelee kutoa
mafunzo ya utalii unaotilia maanani, mila, utamaduni na desturi zetu pamoja na
hifadhi ya mazingira. Hivi sasa Serikali ishachukua hatua ya kuibua maeneo
mapya ya vivutio vya utalii yakiwemo mapango, michezo ya asili, matamasha,
maeneo ya hifadhi ya wanyama. Hatua
zinachukuliwa za kuimarisha utalii wa kumbukumbu za kihistoria kwa maeneo mbali
mbali ya Unguja na Pemba, kuimarisha utalii wa kiutamaduni na kuuendeleza
utalii wa ndani wenye kuyatunza mazingira.
Serikali imeamua kukiunganisha chuo hichi kwenye uongozi wa SUZA hapo
baadae ili kitoe elimu ya juu kwenye fani ya Utalii.
Ndugu Waandishi wa Habari
na Ndugu Wananchi,
Vile
vile, Serikali inaendelea kushirikiana na taasisi binafsi ikiwemo Jumuiya ya ZATI na ZATO katika
kuuimarisha utalii na kuitangaza Zanzibar kiutalii nje ya nchi kwa njia mbali
mbali. Hoteli za kisasa zinaendelea
kujengwa na wawekezaji mbali mbali wa ndani na nje ya nchi. Jitihada za kuchukua hatua za kuzipanga
hoteli katika madaraja yake zimeanza kuchukuliwa kwa lengo la kuimarisha
huduma, gharama na mapato ya Serikali.
Juhudi za pamoja zinazochukuliwa na Serikali na Sekta Binafsi zimepelekea kuongezeka kwa idadi ya watalii wanaokuja kututembelea. Katika mwaka 2011 tulipokea watalii wapatao 175,067 na watalii 169,223 walifika nchini katika mwaka 2012. Idadi ya wageni tulipokea kila mwaka kwa miaka miwili iliyopita ni kubwa zaidi ikilinganishwa na idadi ya kila mwaka kwa miaka kabla ya 2011. Matarajio yetu ni kupata idadi kubwa zaidi ya wageni katika mwaka huu na hapo baadae kwa kuwashajiisha wawekezaji wa Turkey, nchi za Falme za Kiarabu, China na kadhalika.
MIUNDOMBINU NA MAWASILIANO
Ndugu Waandishi wa Habari na Ndugu Wananchi,
Serikali
imeweza kutekeleza vyema Ilani ya CCM ya mwaka 2010/2015, Dira 2020 na MKUZA II
katika sekta ya miundombinu kwa kuzijenga barabara mpya tulizoziahidi na
kuzifanyia matengenezo makubwa barabara mbali mbali za mijini na mashamba, Unguja
na Pemba.
Ujenzi
wa barabara ya Gando-Wete, Konde-Wete bado unaendelea na tunatarajia
utakamilika baadae mwaka huu au mapema mwakani.
Barabara za Kaskazini Pemba zinazojengwa kwa msaada wa MCC ambazo ni
Bahanasa-Mtambwe, Mzambarautakao-Pandani-Finya, Mzambarau Karima-Mapofu,
Chwale-Kojani na Kipangani-Kangagani, zenye urefu wa km. 35; nazo tunarajia
kukamilika mwaka huu. Ujenzi wa barabara
mpya ya Jendele-Cheju hadi Unguja Ukuu Kae Bona, tayari umeanza na ile ya
Jumbi-Koani karibu itaanza.
Vile
vile, serikali imefanya jitihada za kuziimarisha huduma za bandari nchini na
kwa kushirikiana na Kampuni ya Azam Marine imejenga upya majengo ya kuwahudumia
abiria katika bandari ya Malindi. Upembuzi yakinifu umeshafanyika kwa ajili ya
ujenzi wa bandari mpya ya Mpigaduri na bandari ya Mkokotoni Unguja.
Serikali imeshughulikia vizuri ujenzi wa jengo jipya
la abiria katika uwanja ndege wa Kimataifa wa Abeid Amani Karume ambao umefikia
hatua nzuri licha ya kujitokeza matatizo ya kiufundi ambayo tayari yamesawazishwa.
Ujenzi huo unatarajiwa kukamilika mwishoni mwa 2014. Ujenzi wa eneo la kuegesha ndege (apron) na
ujenzi wa barabara mpya ya kupitia ndege (taxiway) nao unatarajiwa kukamilika
hivi karibuni.
Ndani ya kipindi hiki cha miaka mitatu, Mamlaka ya
Viwanja vya Ndege ilianzishwa na imefanya marekebisho mbali mbali katika jengo
la abiria na eneo la Uwanja wa Ndege wa Abeid Amani Karume. Utoaji
wa huduma katika viwanja vya Unguja na Pemba umeimarishwa na vifaa mbali
mbali vya kuimarisha ulinzi na usalama zikiwemo mashine za uchunguzi na vifaa
vya zimamoto vimewekwa.
Ndugu Waandishi wa Habari
na Ndugu Wananchi,
Serikali
imezingatia umuhimu wa kuziimarisha huduma za usafiri wa baharini kwa
kulifanyia mabadiliko makubwa ili liweze kujiendesha kwa faida na kuwahudumia
wananchi kwa ufanisi zaidi. Katika kutekeleza azma hii, Serikali ilifanya
uamuzi wa kununua meli mpya. Hivi sasa,
Serikali imeshafunga mkataba na Kampuni ya Korea ya Kusini na tayari ujenzi wa
meli hio umenza ambayo itakuwa na uwezo wa kuchukuwa abiria 1,200 na mizigo
tani 200. Meli hiyo inategemewa kufika nchini mwezi Juni, 2015 na kusafirisha
abiria na mizigo katika bandari za Unguja Pemba, Tanga na Da es Salaam.
Vile
vile, matayarisho ya kutaka kununua meli
mpya ya mafuta yenye uwezo wa kuchukua tani 3,500 tayari yameanza. Mkataba wa makubaliano unategemewa kufungwa
kabla ya kumalizika mwaka huu na meli hio inategemewa kujengwa kwa muda wa
miezi 18 baada ya kufungwa mkataba na inatarajiwa kufika nchini mwezi wa Juni
hadi Agosti 2015.
Serikali
inaendelea na hatua ya kusimamia taasisi zote zinazotoa huduma za mawasiliano
ya simu kwa kupunguza idadi ya minara ya mawasiliano kwa Unguja na Pemba. Aidha, Serikali inasimamia mradi mkubwa wa
mawasiliano ya “e- government” ambao unatekelezwa kwa awamu mbili.
Tayari
taasisi nne zinatumia mtandao huo zikiwemo Bodi ya Mapato, Wizara ya Fedha,
Wizara ya Elimu na Mafunzo ya Amali na kituo maalum cha mawasiliano hayo.
UMEME
Ndugu waandishi wa Habari
na Ndugu Wananchi,
Ilani
ya Uchaguzi ya Chama cha Mapinduzi, imeitaka Serikali ya Mapinduzi ya Zanzibar
kuimarisha upatikanaji wa huduma za nishati ya umeme. Mradi wa
ujenzi wa njia
ya pili ya umeme kwa ajili ya Kisiwa cha Unguja wenye Megawati 100 uliojengwa kwa msaada wa
Serikali ya Marekani kupitia Shirika la MCC, umekamilika kwa wakati
na ulizinduliwa rasmi tarehe
10 Aprili 2013. Kadhalika, mradi
wa usambazaji wa umeme ulizinduliwa tarehe 11 Juni, 2013 ambao ulifadhiliwa na
Serikali ya Japan. Mradi huo wa uimarishaji wa njia
na miundombinu ya
umeme umejumuisha ujenzi wa
njia za kusambaza
umeme kuanzia Mtoni hadi Tunguu,
Mtoni hadi Fumba na
Mtoni hadi Mahonda pamoja na
Ujenzi wa Vituo
vya kusambaza umeme
huko Mtoni, Welezo na
Mwanyanya.
Katika juhudi za Serikali za kusambaza huduma za umeme
kwa wananchi, jumla ya
Vijiji 110 vimefanikiwa kusambaziwa
umeme katika miaka
mitatu, kuanzia 2011 hadi 2013.
Kati ya
vijiji hivyo, vijiji 65 vipo Unguja na vijiji 45 Pemba. Mradi wa Usambazaji Umeme Vijijini
hadi sasa umefikia
asilimia 87.5 ya vijiji vyote vya
Unguja na Pemba.
Serikali imechukua
juhudi kubwa za
kufanikisha mpango wa
upatikanaji wa umeme mbadala na inaendelea kupata mashirikiano
mazuri na Jumuiya ya nchi za Ulaya katika
kutafuta njia mbadala
itakayofaa ya kuzalisha
umeme kwa njia
ya Upepo au
Jua. Mtaalamu tayari
ameteuliwa na yupo
hapa nchini kwa maandalizi ya
kufanyika uchambuzi yakinifu.
ARDHI
Ndugu waandishi wa Habari na
Ndugu Wananchi,
Kuhusu
suala zima la matumizi endelevu ya ardhi,Serikali imeanzisha Idara ya
Mipango Miji na Vijiji na kazi yake kubwa ni kufanya mabadilko makubwa katika
sekta ya ardhi (Land Reform).
Idara imeshapitia Mpango Mkuu wa matumizi ya ardhi wa
mwaka 1995 na imeandaa Mpango Mkuu wa Taifa wa Matumizi ya Ardhi (National Land
Use, 2013) ambao utawasilishwa Serikalini kabla ya mwezi wa Disemba 2013. Vile vile, mipango ya matumzi ya ardhi
kimikoa imetayarishwa.
Kazi ya kutengeneza “Zanzibar Town Master Plan” imeanza
rasmi tarehe 2/5/2013 na itamalizika Julai 2014 na kazi za Mikoa ya Unguja na Pemba nazo
zimeanza na ile mipango midogo midogo ya vijiji inaendelezwa. Matumizi ya ardhi
ya kijiji cha Nungwi tayari umefikia hatua za mwisho na utakuwa tayari mwisho
wa mwaka huu wa 2013.
Ndugu Wananchi na Ndugu Waandishi wa Habari,
Serikali inaendelea na juhudi za kuweka mkakati wa matumizi ya Ardhi (National Spatial Developement Strategy) kwa
kutambua kuwa udogo wa ardhi ya
Zanzibar, ifikapo 2014 na migongano ya kisekta katika kutumia ardhi. Maeneo yote muhimu na matumizi yake
yatapangwa katika mkakati huu.
Ndugu Wananchi na Ndugu Waandishi wa Habari,
Serikali itatoa kipaumbele katika kufanya tafiti kwa
ajili ya kuandaa makaazi bora na kuhimiza ujenzi wa nyumba za ghorofa. Utafiti
wa ujenzi mpya wa eneo la N’gambo na ujenzi wa nyumba za ghorofa Ng’ambo
utaanza mwezi wa Novemba (Novemba 2013).
Lengo ni kufikia azma ya Serikali ya awamu ya Saba kuhakisha kuwa Wazanzibari
wanapata makaazi bora.
Kuhusu viwanja kwa ajili ya ujenzi, jumla ya viwanja 1393
vimegaiwa kutoka 2010 hadi Septemba 2013
kwa ajili ya ujenzi wa aina mbali mbali.
MAJI
Ndugu Waandishi wa Habari
na ndugu Wananchi,
Kwa miaka mitatu Serikali imezingatia umuhimu wa huduma
ya uhakika ya maji. katika Vijiji mbali mbali unguja na Pemba. Usambazaji wa maji safi na
usafi wa Mazingira unafanywa kwa kupitia Mradi wa Maji na Mazingira
unaofadhiliwa kwa pamoja kati ya Benki ya Maendeleo ya Afrika (AfDB), Shirika
la Kimataifa la Makaazi (UN-Habitat), Serikali na Jamii. Mradi huu utahusisha
kuchimba visima, kujenga matangi, kulaza mabomba, kujenga vyoo maskulini pamoja
na kuimarisha vianzio vya maji.
Katika
kutekeleza mradi huo Serikali inaendeleza kazi za ujenzi wa miundo mbinu ya
maji katika Miji mitatu ya Pemba na Vijijini Unguja na Pemba, sambamba na
ujenzi wa matangi ya majaribio ya uvunaji wa maji ya mvua.
Kupitia Programu hii, Serikali
imekamilisha Mradi wa maji Mkoa wa Mjini Magharibi awamu ya pili chini kwa
ufadhili wa Serikali ya Japan kwa kujenga matangi makubwa mawili, uchimbaji wa
visima vitano pamoja na ulazaji wa mabomba yenye urefu wa kilomita 21.
Kuhusu Mradi wa Upatikanaji wa Maji
na Usafi unaoendeshwa kwa mkopo wa Benki ya Maendeleo ya Afrika, kwa upande wa
Unguja vijijini ujenzi wa matangi ya
Matemwe na Nungwi na unaendelea yamekamilika na kazi bado inaendelea na kwa
upande wa Pemba vijijini kazi za Mradi zimekamika kwa asilimia 87.64 na
utekelezaji halisi umefikia asilimia 66.80.
Kwa upande wa Pemba
Mijini ujenzi umefikia asilimia 54.17 na utekelezaji halisi umefikia 20.12 na
visima vyote 10 tayari vimechimbwa na uchunguzi wa maji umeanza kufanyika kwa
miji yote mitatu ya Pemba. Kadhalika, kazi za uchimbaji msingi na ufungaji
mabomba kwa maeneo yote
ya Miji ya Wete, Chake Chake na
Mkoani tayari zimefanyika kwa masafa ya km 12 kati ya 62.50 za mabomba kwa
maeneo yote.
Katika kuimarisha huduma za maji,
Serikali ya Ras Al Khaimah inaisaidia Serikali ya Mapinduzi ya Zanzibar kwa
kuchimba visima vya maji 50 kwenye maeneo mbali mbali ya Unguja na Pemba. Visima hivi tayari vimeanza kuchimbwa kwenye
maeneo mbali mbali. Jumla ya visima 21 kati ya 50 vilikuwa vimeshachimbwa katika
maeneo 14 ya Mkoa wa Mjini Magharibi na maeneo 5 ya Mkoa wa Kusini Unguja.
Pamoja na juhudi kubwa ambazo
Serikali tunazichukua ili kuziimarisha huduma za kupatikana maji safi na salama
lakini sekta ya maji inakabiliwa na changamoto ya upungufu wa maji chini ya
ardhi na kwenye chemchem zetu. Nimeshuhudia mwenyewe kwenye ziara yangu
niliyoifanya kwenye vianzio vya maji Welezo, Saateni na Mwanyanya na maeneo
mengine.
Hali
ya uzalishaji wa chemchem karibu zote ikiwemo Mwanyanya na Mtopepo katika Mkoa
wa Mjini Magharibi siyo nzuri sana. Mkoa wa Mjini Magharibi wanahudumiwa na
visima 60 na chemchem 2. Kati ya visima hivyo, jumla ya visima 26 vipo wilaya
ya Mjini na visima 34 vipo wilaya ya Magharibi. Upatikanaji wa maji kutoka
katika chemchem za Mtoni na Mwanyanya zinazopeleka maji Mji Mkongwe, ambayo
ilikuwa ni zaidi ya 30% ya mahitaji ya Mkoa. Lakini kiwango cha kupatikana maji
kimepungua kwa asilimia chini ya 15.
Tatizo kubwa lililopelekea kupungua kiwango cha maji ni uharibifu wa
mazingira, ukataji wa miti kwenye maeneo hayo, wananchi kuyavamia maeneo hayo
na kujenga kwenye vyanzo vya maji au
kwenye uoto wa asili. Vile vile,
kutokuwepo vivuli vya asili na mabadiliko ya tabia nchi, kunapelekea maji
kukauka. Nawanasihi wananchi
wasiyaharibu mazingira na wasiyavamie maeneo ya vyanzo vya maji, seuze kujenga
kwenye maeneo hayo.
KILIMO
Ndugu Waandishi wa Habari
na ndugu Wanachi,
Dhamira
ya kuleta Mapinduzi ya Kilimo imeelezwa
wazi wazi katika Ilani ya Uchaguzi ya Chama cha Mapinduzi ya 2010-2015, MKUZA II na inasimamiwa na
Mipango mingine ya Serikali, Wizara za Kilimo na Maliasili. Dhamira hiyo imeanza kutafsiriwa kwa vitendo
katika utekelezaji wa kazi za Wizara
hizo tangu mwaka wa kwanza wa Awamu ya Saba ya uongozi wa Serikali ya Mapinduzi
ya Zanzibar, ambapo matumizi ya teknolojia na zana za kisasa za kilimo yalianza
kuonekana tangu msimu wa kilimo wa mwaka 2011/2012.
Kuanzia msimu wa kilimo wa mwaka 2011, Serikali
iliongeza idadi ya matrekta kutoka 27 yaliyokuwepo kabla, hadi kufikia matrekta
37. Matrekta mengine 20 yatanunuliwa
katika msimu wa kilimo wa 2013/14.
Kadhalika, Serikali ilinunua mashine 14 mpya za kisasa za kuvunia mpunga
ambazo awali hazikuwepo. Vile vile, Serikali imekusudia kuagiza zana za
kupandia mpunga (Planters) 30
mwanzoni mwa msimu huu wa kilimo ili kuwarahisishia wakulima kazi za kupanda
mpunga na kuondokana na upandaji wa kizamani unaopelekea mavuno kuwa kidogo.
Katika kuziendeleza juhudi
zetu za kutoa taaluma bora ya kilimo cha kisasa kwa wakulima nchini, Serikali imeanzisha Skuli za Wakulima
mashambani zipatazo 1,200 Unguja na Pemba zenye kuhudumia takriban kaya 24,000.
Matokeo ya skuli hizi za wakulima ni ongezeko la tija na uzalishaji wa kupiga mfano
katika mazao mbali mbali ya kilimo.
Katika
kuyatekeleza malengo ya Mapinduzi ya Kilimo, Serikali imekiimarisha chuo cha
kilimo cha Kizimbani kwa kuanzisha masomo katika kiwango cha Diploma badala ya
kuishia na masomo ya kiwango cha cheti yaliyokuwa yakitolewa kabla ya 2010.
Dakhalia mpya yenye uwezo wa kuchukua wananfunzi 500 imejengwa na Serikali
imeamua kukiunganisha chuo hiki katika orodha ya vyuo vya SUZA hapo baadae, ili
kutoa taaluma ya kilimo iliyobora zaidi nchini. Kiasi ya wanafuzi 354 wameshahitimu
masomo yao kuanzia mwaka 2010 hadi sasa.
Katika kipindi cha miaka mitatu 2011/2013, Wizara ya Kilimo imeajiri
mabibi na mabwanashamba 139 wenye kiwango cha cheti cha Kilimo na Mifugo
kinachotolewa na Chuo cha Kilimo Kizimbani.
Ndugu Waandishi wa Habari
na Ndugu Wananchi,
Katika
kukiendeleza kilimo kinachozingatia miongozo ya tafiti mbali mbali, Serikali
inaendelea na juhudi za kuiimarisha
Taasisi ya Utafiti ya Kizimbani
imeimarishwa ili kiweze kufanya tafiti za kilimo na mbegu bora za mazao mbali
mbali. Idadi ya wataalamu wa utafiti
nayo imeongezeka kwa kusomesha wafanyakazi 15. Kati ya hao wataalamu 10
wamepata mafunzo ya shahada ya pili na 5
shahada ya kwanza. Vile vile, maabara mpya ya utafiti wa mazao imejengwa kwa
kushirikiana na COSTECH kwa lengo la
kufanya utafiti kwa njia za kisasa.
Juhudi
za kutoa mafunzo kwa wakulima zimewasaidia sana wakulima wengi na takwimu za
Wizara ya Kilimo na Maliasili zinaonesha ongezeko kubwa la matumizi ya pembejeo
za kilimo kuanzia mwaka 2010 hadi mwaka 2013. Kadhalika, uagiziaji wa mbegu za aina mbali mbali
umeongezeka kutoka tani 55 mwaka 2010 hadi tani 620 mwaka 2013. Mbolea kutoka
tani 130 hadi tani 1,500 na dawa za
kuulia magugu kutoka lita 12,000 hadi kufikia lita 30,000.
Ndugu Waandishi wa Habari
na Ndugu Wananchi,
Katika
kipindi cha miaka mitatu, Serikali kwa mafanikio makubwa imetekeleza sera na program mbali mbali za
kilimo zikiwemo kukamilisha Sheria ya
uhakika wa chakula na lishe, na Sera ya
Masoko. Juhudi zinaendelea kuchukuliwa
kwa kuhakikisha kuwa hekta 8,521 kwa ajili ya kilimo cha umwagiliaji maji
zinatumika kama ilivyopangwa. Kati ya hekta 750 tayari zishatayarishwa na
Serikali ya Jamhuri ya Korea itaziendeleza hekta 2,200 katika mabonde ya Cheju,
Kibokwa na Kilombero kwa Unguja na Makwararani na Mlemela kwa upande wa Pemba.
UVUVI NA MIFUGO
Ndugu Waandishi wa Habari
na Ndugu Wananchi,
Katika
kipindi cha miaka mitatu (3) iliyopita, juhudi mbali mbali zimechukuliwa katika
kuiendeleza sekta ya uvuvi, ambayo mchango wake katika Pato la Taifa umepanda
kutoka asilimia 6.1 mwaka 2011 hadi asilimia 6.7 mwaka 2012. Kadhalika, kiwango cha samaki kilichovuliwa
kimeongezeka kutoka wastani wa tani 26,600 mwaka 2010/2011 hadi wastani wa tani
30,500 mwaka 2012/2013. Uzalishaji wa
mwani nao uliongezeka kutoka tani 12,500 mwaka 2010/2011 hadi kufikia tani
13,844 mwaka 2012/2013. Serikali ilifanya juhudi maalum yan kuwawezesha wavuvu
kwa kuwapa mafunzo ya uvuvi bora unaozingatia uhifadhi wa mazingira pamoja na
matumizi bora ya vifaa vya kisasa kupitia Mradi wa MACEMP, ambapo jumla ya Tsh.
4.86 bilioni zilitumika.
Kuhusu
sekta ya ufugaji, Serikali imeandaa sera ya ufugaji katika kipindi hiki cha
miaka mitatu na imeendeleza juhudi za kuwaendeleza wafugaji kupitia program
mbali mbali na program ya kuimarisha huduma za mifugo (ASDP-L). Jumla ya vikundi 335 vya Unguja na Pemba
vilipewa mafunzo. Wafugaji 3,200
walitembelwa na kupewa ushauri. Vile
vile, huduma za utafiti na utibabu wa wanyama ziliimarisha na matengenezo ya
Maabara ya Maruhubi na Chake Chake yalifanyika.
Kwa
upande wa Mapinduzi ya Uvuvi tumefanya
jitihada maalum kwenda kujifunza kutokana na uzoefu wa wenzetu nchi za nje kama
vile China na Vietnam. Wavuvi na wakulima wa mwani 59 wamepelekwa nchini China
kujifunza. Viongozi mbali mbali walifanya ziara ya kujifunza mambo ya uvuvi
nchini China na Vietnam.
Katika
kutekeleza dhamira yetu ya kuimarisha taaluma ya ufugaji wa samaki, tumeanzisha
bwawa la mfano la kujifunza kufuga samaki Jozani na jengine litaanzishwa Donge
hivi karibuni. Hivi sasa, shughuli za ufugaji wa samaki zinaendelea katika
maeneo mbali mbali Pemba na zimeonesha mafanikio makubwa katika vijiji vya
Muambe, Chambani, Pujini Kibaridi, Jadida, Kiungoni Wete, Makombeni, Chokocho
na maeneo mengine.
Katika
juhudi za kuimarisha uvuvi wa bahari
kuu, Serikali ya Mapinduzi ya Zanzibar imetia saini Maelewano ya Awali (MoU) na
Serikali ya Jamhuri ya Watu wa China katika masuali ya kuendeleza uvuvi.
ELIMU
Ndugu Waandishi wa Habari
na Ndugu Wananchi,
Ni
dhahiri kuwa maendeleo ya nchi yoyote yanategemea kuwepo kwa fursa na elimu
bora wanayoipata wananchi wake. Kwa mantiki hiyo Serikali ya Mapinduzi ya Awamu
ya Saba imechukua jitihada kubwa kuimarisha sekta ya elimu kwa maendeleo ya
nchi yetu na mafanikio ya kuridhisha yamepatikana katika elimu ya maandalizi,
msingi, sekondari pamoja na utoaji wa elimu mbadala, mafunzo ya ualimu, elimu
ya ufundi na mafunzo ya amali pamoja na fursa za elimu ya juu kwa wanafunzi wa
Zanzibar.
Idadi ya skuli za
Maandalizi zimeongezeka kutoka 238 zenye wanafunzi 1641 mwaka 2010 hadi skuli
278 zenye wanafunzi 30,912 mwaka 2013. Fursa ya Elimu ya msingi imeimarika
kutoka skuli 299 zenye wanafunzi 226,746 mwaka 2010 hadi skuli 342 zenye
wanafunzi 247,353. Wanafunzi walioandikishwa kuanza darasa la kwanza mwaka 2010
walikuwa 31,092. Mwaka huu wa 2013 walikuwa ni 35,703 ambao wote wamepatiwa
nafasi ya kusoma watoto wote
waliofikia
umri wa kuanza skuli. Hali hii imeifanya
nchi yetu kupiga hatua kubwa ya utekelezaji wa malengo ya Milenia na yale ya
Elimu kwa Wote. Aidha, kwa kuzingatia umuhimu wa Sayansi na Teknolojia kwa
watoto, Serikali imetekeleza mradi wa teknolojia ya habari na mawasiliano
uitwao T.21 kwa skuli za msingi 74 hapa nchini.
Elimu
ya sekondari imezidi kuimarishwa kwa kuongezeka kwa idadi ya skuli zinazotoa
elimu hiyo kutoka kidato cha kwanza hadi cha sita na hivi sasa zipo skuli za
sekondari 252 zenye wanafunzi 84,099 kutoka skuli 227 zilizokuwa na wanafunzi
78,794 mwaka 2010. Serikali imekamilisha ujenzi wa skuli mpya za sekondari 13
kati ya 16 ambazo zimeshapatiwa samani na vifaa vya maabara na kuanza
kutumika. Skuli 3 ambazo ni Paje- Mtule,
Dimani na Tunguu ujenzi wake umefikia asilimia 94. Skuli hizi zilikuwa
zikamilike mwaka 2015 kwa mujibu wa maelekezo ya Ilani na mipango ya awali, lakini
Serikali imezikamilisha kabla ya wakati wake.
Katika
uimarishaji wa elimu ya Sekondari, Serikali imekamilisha ujenzi wa skuli tatu
za ghorofa katika maeneo ya Mpendae, Kwamtipura na Mazizini zinazotarajiwa
kufunguliwa katika sherehe za maadhimisho ya miaka 50 ya Mapinduzi. Aidha,
ujenzi wa skuli nyengine mbili za ghorofa unaendelea vyema katika vijiji vya
Kibuteni Mkoa wa Kusini Unguja na Mkanyageni katika Mkoa wa Kusini Pemba.
Serikali vile vile, imekamilisha matengenezo makubwa katika skuli za sekondari
za Forodhani na Tumekuja Unguja na Utaani na Fidel Castro kwa Pemba.
Matengenezo katika skuli za sekondari za Hamamni kwa Unguja na Uweleni Pemba
yako katika hatua za mwisho kumalizika.
Aidha,
kwa lengo la kuwaendeleza watoto wa kike katika masomo ya Sayansi, serikali
imeamua kuzifanya skuli za sekondari ya Benbella Unguja na Utaani Pemba
zitumike kwa azma hio.
Ndugu Waandishi wa Habari
na Ndugu Wananchi
Fursa
ya elimu ya juu nayo imezidi kuimarika kwa kuongeza idadi ya vijana wanaojiunga
na elimu ya chuo kikuu hapa Zanzibar ambapo ndani ya kipindi hiki cha miaka
mitatu vijana waliojiunga katika vyuo vikuu vya SUZA, chuo cha Elimu Chukwani
na Chuo Kikuu cha Zanzibar wameongezeka
kutoka vijana 3,624 mwaka 2010 hadi vijana 4,485 mwaka 2013. Idadi hii haijumuishi
vijana wanaoendelea kujisajli katika vyuo hivyo kwa mwaka wa masomo 2013 /2014.
Katika
kipindi hiki Chuo Kikuu cha Taifa SUZA kimeongeza idadi ya skuli za masomo
kutoka skuli moja mwaka 2010 hadi skuli tano. Skuli hizo ni skuli ya Elimu
Endelezi, skuli ya Elimu ya Lugha ya Kiswahili na Lugha za Kigeni na skuli ya
Sayansi ya Asili na Jamii na katika mwezi wa Oktoba, 2013 Skuli ya Tiba
(Medical School) ilizinduliwa. Vile vile, Chuo kimeanzisha shahada ya uzamifu
(PhD) ya lugha ya Kiswahili. Sambamba na hatua hiyo, Chuo hiki kimeongeza idadi
ya kampasi zake na kufikia tatu badala ya mbili ambapo sasa chuo kimepata haiba
nzuri kwa kuanza kutumia kampasi yake mpya ya Tunguu iliyoanza kutumika mwaka
2012.
Kadhalika,
ndani ya kipindi hiki Chuo Kikuu cha Zanzibar nacho kimeongeza masomo
yanayofundishwa katika chuo hicho, masomo yaliyoongezwa ni shahada ya Uzamili
katika Utawala wa Umma na Sayansi ya Uchumi na Fedha. Masomo mengine ni ya Shahada ya Benki ya Kiislamu
na Fedha, Shahada ya Teknolojia ya Habari na Uchumi, Shahada ya Lugha na Ualimu
pamoja na Shahada ya Uuguzi. Chuo Kikuu cha Elimu Chukwani nacho kimeimarisha
masomo yake ikiwa ni pamoja na kuanza kusomeshwa kwa somo la lugha ya Kiswahili
kwa wananchuo wa maandalizi (pre- university) na wa Shahada ya ualimu.
Ndugu Waandishi wa Habari
na Ndugu Wananchi,
Ili
kuwawezesha vijana wengi zaidi wanaopata sifa ya kuendelea na masomo yao
vyuoni, Serikali imeongeza fedha kwa ajili ya mikopo ya wanafunzi kutoka Tsh.
2.3 bilioni mwaka 2010 hadi Tsh. 9.1 bilioni mwaka 2013. Serikali iliwapa
mikopo waombaji wapya 1000 katika mwaka huu wa fedha wa 2013/2014. Serikali
imechukua juhudi za makusudi ili kuongeza fedha kwa matumizi ya sekta ya elimu
kwa ulinganisho wa matumizi ya serikali na Pato la Taifa kutoka asilimia 15.6
mwaka 2010 hadi asilimia 21.4 mwaka wa fedha uliomalizika wa 2012/2013.
Kadhalika,
kwa upande wa madarasa ya kisomo kwa ajili ya
wasojua kusoma na kuandika, mafanikio yamepatikana kwa kupungua watu
wenye tatizo hilo na kuwa na wanakisomo 463 katika mwaka huu wa 2013 kutoka
wanakisomo 6,980 mwaka 2010.
Sambamba
na jitihada hizo, Serikali pia imeendelea
kuimarisha mafunzo ya ualimu yanayotolewa katika chuo cha Kiislamu
Mazizini, Chuo cha Kiislam Micheweni na Chuo cha Benjamin William Mkapa
Kisiwani Pemba pamoja na mafunzo ya Ualimu na Daraja la 3A yanatolewa na utaratibu wa Elimu masafa
kwenye vituo 9 vya walimu Unguja na Pemba.
Katika mwezi wa Aprili, 2013 jumla ya walimu 675 walimaliza mafunzo yao
ya cheti cha ualimu Daraja hilo.
Ndugu Waandishi wa Habari
na Ndugu Wananchi,
Katika
kuimarisha elimu ya ufundi na mafunzo ya amali, serikali imefanikiwa katika
kuimarisha mazingira na taaluma
inayotolewa katika Taasisi ya Karume ya Sayansi na Teknolojia pamoja na vituo
vya mafunzo ya Amali vya Mwanakwerekwe na Mkokotoni kwa Unguja na Vitongoji
huko Pemba. Idadi ya wanafunzi katika taasisi ya Karume imeongezeka kutoka 237
mwaka 2010 hadi 1,215 mwaka 2012/2013. Kwa upande wa masomo ya kujiendeleza ya ufundi
stadi, stashahada ya ICT, mafunzo ya Sayansi na Hisabati kwa elimu ya msingi na
kidato cha nne, Taasisi ina jumla ya wanafunzi 996. Aidha, idadi ya wanafunzi
wanaochukua masomo mbali mbali ya ufundi
na amali katika vituo vya mafunzo vya Mwanakwereke, Mkokotoni na
Vitongoji imeongezeka kutoka wanafunzi 449 mwaka 2010 hadi wanafunzi 784 maka 2012/2013.
Kwa
jumla nimeridhishwa sana na mafanikio ya sekta ya elimu licha ya changamoto
zinazoikabili sekta hii ikiwemo uhaba wa walimu hasa wa sayansi, matokeo
yasioridhisha ya mitihani ya Taifa, ukosefu wa samani na kuwepo kwa idadi kubwa
ya wanafunzi katika baadhi ya madarasa ya skuli za mijini, uhaba wa fedha
katika Bodi ya mikopo ya wanafunzi na nyenginezo. Hata hivyo, ninamatumaini
kuwa changamoto hizi tutaweza kuzitatua hatua kwa hatua kwa ushirikiano na
wananchi wakiwemo sekta ya binafsi kwa kuwekeza zaidi katika sekta ya huduma za
jamii ikiwemo sekta ya elimu.
AFYA
Ndugu Waandishi wa Habari
na Ndugu Wananchi,
Ni
wajibu tufurahie mafanikio makubwa tuliyoyapata katika Sekta ya Afya. Ukiacha
mambo ya jumla ambayo tumeendelea nayo tangu awamu zilizopita kama vile ujenzi
wa vituo 134 vya afya, ambavyo vimepelekea kupunguza masafa ya kupata huduma
kwamba mwananchi wa Zanzibar hendi masafa ya kilomita 5, bila ya kupata huduma
za afya. Huduma zimeimarishwa kwenye
hospitali 4 za koteji kila moja ikiwa na
vitanda 40, na huduma muhimu zikiwemo za
uchunguzi wa maradhi wa Maabara, huduma za meno, upasuaji mdogo na kadhalika.
Lengo letu la kuziimarisha hospitali hizi ili ziwe hospitali za Wilaya,
limefikia hatua nzuri; hasa kwa hospitali ya Koteji ya Makunduchi na
Kivunge. Yapo mambo mengine ya msingi
ambayo Serikali imeyafanya katika kipindi
cha miaka mitatu iliyopita katika kutekeleza Ilani ya CCM ya 2010 - 2015.
Kwa
mfano katika kusimamia utekelezaji wa sera ya afya na ushirikishwaji wa
wananchi na sekta binafsi katika kuchangia maendeleo ya afya kwa kuzingatia
malengo ya Milenia, Dira ya 2020 na MKUZA, Serikali imezifanyia mapitio sera
kadhaa pamoja na kushughulikia uanzishwaji wa Bima ya afya.
Ndugu
waandishi wa Habari na Ndugu Wananchi,
Katika
kuendelea kuimarisha huduma za Hospitali ya Mnazi Mmoja, ili ifikie hadhi na
kiwango cha Hospitali ya Rufaa, Serikali imeweza kuyafanya mambo yafuatayo:-
kuweka Mtambo wa Oxygen kwenye chumba
cha upasuaji (theatre), wodi ya
wagonjwa mahututi (ICU), wodi ya wazazi (maternity ) na chumba cha dharura na
mashine ya kisasa ya kufanyia operesheni (minimal access surgery) kwenye chumba
cha upasuaji.
Serikali
imefungua “kituo cha meno cha tabasamu” (smiling
center) kwa mashirikiano na wataalamu kutoka China na madaktari wazalendo
wa Zanzibar kwa kufanya marekebisho kwa midomo yenye kasoro, Mfumo wa kuweka
kumbukumbu za wagonjwa kwa kutumia kompyuta (Electronic medical Record System)
umeanzishwa, vifaa vya kisasa vikiwemo kompyuta kwa ajili ya kazi hiyo
vimewekwa sehemu ya mapokezi na umeanza kurikodi kumbukumbu za wagonjwa wa nje (OPD).
Mafunzo
ya utafiti wa afya (clinical research)
yametolewa kwa wafanyakazi 30 ili waweze kufanya tafiti mbali mbali na kusaidia
kuimarisha huduma za afya, pamoja na kuifanyia ukarabati mdogo wodi ya wazazi
na chumba cha wagonjwa wa dharura.
Mashirikiano na Hospitali ya Haukeland University ya Norway yameendelezwa
kwa kubadilishana wataalamu. Kwa mwaka 2013 wataalamu wetu watano (madaktari
wawili na wauguzi watatu 3) wamerejea kutoka Norway ambako walipata mafunzo kwa
miezi sita wakati wafanyakazi watano (madaktari 2 na wauguzi 3) wa hospitali
hiyo hivi sasa wapo katika Hospitali ya Mnazi Mmoja wakisaidiana na madaktari
na wauguzi wetu wazalendo katika kutoa huduma bora za afya. Kurudi kwao
kumeongeza ujuzi zaidi wa kukabiliana na kesi za maradhi mbali mbali.
Kadhalika,
ipo miradi iliyobuniwa ambayo tayari imeanza kutekelezwa. Miradi hio ni:- Mradi wa kuimarisha huduma za
mama na mtoto, Mradi wa ujenzi wa jengo la wodi ya watoto, Mradi wa upasuaji wa
maradhi ya kichwa na uti wa mgongo (Neurosurgical unit), Mradi wa kitengo cha
“Gastro-Enterology”, Mradi wa kuimarisha kitengo cha kisasa cha wodi ya
wagonjwa mahututi (ICU) na Mradi wa elimu ya utafiti. Vile vile, maandalizi ya utibabu wa matatizo
ya maradhi ya haja ndogo na figo yameanza.
Hospitali
ya Wete imefanyiwa matengenezo katika wodi ya wanaume pamoja na vyoo vyake,
kliniki ya watoto pamoja na kupatiwa vifaa vya kisasa. Aidha, imejengwa Maabara
mpya kubwa na ya kisasa kwa kushirikiana na “International Center for Aids care and treatment Programme” ( ICAP)
katika hospitali ya Micheweni.
Kwa
kupitia mashirikiano yaliyoanzishwa baina ya hospitali ya Kivunge na mradi wa HIPZ, hospitali
imefanikiwa kuanzisha kitengo cha huduma
za dharura (Emergency Unit)
kitakachotoa huduma za haraka kwa wagonjwa wanaofikishwa hospitalini hapo
pamoja na kufanyiwa matengenezo kwa kituo cha elimu ya kujiendeleza (Resource Centre) iliyopo hospitalini
hapo.
Katika kutekeleza mpango wa kuifanya Hospitali ya
Abdalla Mzee kuwa hospitali ya Mkoa, mchakato umeanza ambapo Hospitali hii
itajengwa kwa msaada mkubwa kutoka Jamhuri ya Watu wa China na itakuwa ni ya
kisasa yenye uwezo wa kutoa huduma za wagonjwa wa maradhi mbali mbali na
wagonjwa mahututi (ICU), huduma za dharura (accident
and emergency) na huduma za uchunguzi wa CT Scan.
Katika kipindi hiki huduma za
matibabu ya macho zimefanyika na uchunguzi na utibabu wa macho kwa wafanyakazi
na wanafunzi 69 wa Jeshi la Polisi umefanyika. Askari 51 walipatiwa miwani na 18 walipewa dawa za
macho. Huduma za uchunguzi na utibabu wa macho zimetolewa kwa wananchi katika
maeneo mbali mbali Unguja na Pemba.
Kwa kushirikiana na Kitengo cha Elimu Mjumuisho na
Stadi za Maisha cha Wizara ya Elimu, na Timu za Afya za Wilaya, kitengo cha
maradhi ya macho kimeweza kufanya uchunguzi na utibabu wa macho kwa jumla ya
wanafunzi 2,665 wa skuli mbali mbali ambao
kati yao, 587 walipatiwa matibabu ikiwemo dawa za macho, ushauri wa
kiafya na utoaji wa miwani.
Serikali iliahidi kukiimarisha Chuo cha Taaluma za Sayansi ya Afya pamoja
na watumishi wa sekta ya afya kwa kuwapatia mafunzo ya ndani na nje ya nchi.
Utekelezaji wa ahadi hii umekwenda vizuri ambapo wafanyakazi 226
wamepelekwa mafunzo ya muda mrefu na ya muda mfupi katika vyuo mbali
mbali.
Chuo
cha Taaluma za Sayansi za Afya sasa kitaunganishwa na SUZA katika kukiendeleza,
uamuzi huu hivi sasa unafanyiwa kazi na Serikali.
Katika kuziimarisha afya za wanawake,
Serikali imeondoa ada ya Tsh. 40,000 kwa akinamama wanaokwenda kujifungua kwa
operesheni. Kadhalika, huduma za bohari kuu ya dawa zimeimarishwa ili
kurahisisha upatikanaji wa dawa nchini.
Bohari Kuu mpya ya dawa ilifunguliwa rasmi huko Maruhubi katika
shamrashamra ya Sherehe za Maadhimisho
ya miaka 49 ya Mapinduzi mwezi Januari, 2013.
UTAWALA BORA
Ndugu Waandishi wa Habari
na ndugu Wanachi,
Suala la Utawala Bora hivi sasa nimeliweka
katika Ofisi ya Rais na Mwenyekiti wa Baraza la Mapinduzi, kufuatia mabadiliko
ya Wizara niliyoyafanya hivi karibuni.
Katika kutekeleza dhamira yetu ya kupambana na
rushwa, Serikali ya Awamu ya Saba imeanzisha Taasisi ya Kuzuia Rushwa na
Uhujumu wa Uchumi kwa kupitisha sheria namba 1 ya mwaka 2012. Kuanzishwa kwa
Taasisi hiyo ambayo imeshaanza kufanya kazi kutaisaidia Serikali kupambana na rushwa nchini kama
Ilani ya CCM ya Uchaguzi Mkuu ya mwaka 2010 ilivyoagiza.
Serikali inaendelea kuimarisha Ofisi ya
Mkurugenzi wa Mashtaka Zanzibar ili iweze kuendesha mashtaka katika ngazi zote
za mahakama. Aidha, Ofisi ya Mkaguzi Mkuu wa Hesabu za Serikali inazidi
kuimarisha kwa kuwapa mafunzo wafanyakazi wake kwa lengo la kuimarisha
ukaguzi na uhakiki wa mali za Serikali. Asilimia 88 ya wafanyakazi katika ofisi hii
wameweza kupatiwa elimu ya juu. Aidha, mazingira ya kufanyia kazi yameimarishwa
ikiwa ni pamoja na kuipatia Ofisi kwenye majengo ya kisasa na vitendea kazi vya
kisasa.
Ofisi ya Mkaguzi Mkuu wa Hesabu za Serikali
imepata sifa ndani na nje ya nchi kama vile katika Jumuiya ya Afrika Mashariki
pamoja na SADC kwa ufanisi katika utendaji wake. Baadhi ya nchi zinaleta
wataalamu wao kuja Zanzibar kujifunza
hasa Computerized Auditing. Kadhalika, nchi kadhaa zimekuwa
zikitaka ushauri kutoka Ofisi hii.
Utekelezaji wake umefikia asilimia 67 kwenye lengo la ukaguzi.
Ndugu Waandishi wa Habari
na Ndugu Wananchi,
Katika kuimarisha utoaji wa haki, Serikali
inaendelea kuimarisha Mahakama Kuu na Mahakama ya Kadhi kwa kufanya ukarabati
wa majengo yake. Ndani ya kipindi cha miaka mitatu mahakama ya watoto imeweza
kuanzishwa kwa lengo la kulinda haki za watoto nchini.
Vile vile, idadi ya majaji imeweza kuongezeka
kutoka watatu hadi kufikia 6 wakiwemo majaji wanawake kwa mara ya kwanza.
Kadhalika, Mahakama inaendeleza mapitio ya sheria mbali mbali ili kuweza kuimarisha utoaji wa huduma katika
sekta hiyo.
Kuhusu kuanzishwa kwa mahakama ya biashara,
sheria imeshapitishwa na sasa kanuni zinaendelea kutayarishwa hivyo, mahakama
hiyo itaanza kufanya kazi hivi karibuni.
TAWALA ZA MIKOA NA SERIKALI ZA MITAA
Suala la Tawala za Mikoa, Serikali za Mitaaa
na Idara Maalum za SMZ nimeziweka kwenye Ofisi ya Rais, katika mabadiliko ya
wizara niliyoyafanya hivi karibuni.
Kuwepo kwa serikali za mitaa ni mafanikio
makubwa yanayotokana na demokrasia na utawala bora nchi. Ndani ya kipindi cha
miaka mitatu Serikali imeanza kuifanyia mapitio Sheria za Serikali za Mitaa na
Tawala za Mikoa ambapo Mpango wa Mageuzi ya Tawala za Mikoa na Serikali za
Mitaa, umeandaliwa na Sera yake imeshapitishwa na karibuni inatarajiwa kuanza
kufanya kazi. Serikali za Mitaa zimeanza
kuimarishwa kwa kuajiriwa watalaamu wa fani mbali mbali, vifaa vya kisasa na
vitendea kazi ili kutoa huduma bora kwa wananchi. Jitihada kubwa inafanywa katika kuwahamasisha
wananchi kuunda Kamati za Maendeleo yao ili kusukuma kasi ya maendeleo. Vitendo vya uhalifu vinadhibitiwa kupitia
mfumo wa Ulinzi Shirikishi na Polisi Jamii.
Suala la usafi wa miji na hifadhi ya mazingira nalo linashughulikiwa.
UTUMISHI WA UMMA
Katika kipindi hiki cha miaka mitatu
nimeanzisha utaratibu wa Watendaji na Mawaziri kubainisha utekelezaji wa bajeti
za Wizara zao na jinsi wanavyosimamia mipango iliyoandaliwa kwa kila robo mwaka
hapa Ikulu. Aidha, Serikai imeandaa miundo ya Utumishi ya Wizara na Taasisi zake kwa lengo
la kuleta uwiano wa kimaslahi kwa
kuzingatia viwango vya elimu na uzoefu wa utumishi wa wafanyakazi.
Utekelezaji wa miundo ya utumishi utaanza hivi karibuni. Masuala ya Kazi na Utumishi wa Umma nayo
nimeyaaweka katika Ofisi ya Rais katika mabadiliko ya Wizara niliyoyafanya hivi
karibuni.
Ndugu Waandishi wa Habari
na Ndugu Wananchi,
Serikali ya Mapinduzi ya Zanzibar, Awamu ya
Saba, imefanya jitihada ya kuimarisha mishahara na stahili nyengine za
wafanyakazi mara mbili katika kipindi cha miaka mitatu. Vile vile, Serikali
imeongeza nafasi za mafunzo kwa watendaji wa Serikali ndani na nje ya nchi.
Chuo cha Utawala wa Umma kimezidi
kuimarishwa kwa kupatiwa jengo jipya huko Tunguu ambalo lilizinduliwa tarehe 5
Januari, 2013.
WAZEE, WATU WENYE ULEMAVU NA WATOTO
Ndugu Waandishi wa Habari
na Ndugu Wananchi,
Katika
jitihada za Serikali za kuanzisha makundi maalumu, Serikali ya Awamu ya Saba
imeweza kuzimiimarisha huduma za wazee kwa kuwaongeza posho hadi Tsh. 40,000
kwa mwezi, kuwapatia chakula cha uhakika kwa kila siku, kuimarisha huduma za
maji pamoja na kuimarisha ulinzi kwa wazee wanaoishi kwenye nyumba za Sebleni,
Limbeni na Gombani Pemba. Vile vile, Serikali imeimarisha juhudi za kulinda
haki za watoto kwa kuanzisha sheria mpya
ya kumlinda mtoto ya mwaka 2011, kuongeza vituo vya Mkono kwa Mkono hadi
kufikia vinne pamoja na kuanzisha mahakama ya watoto hapa Zanzibar kwa lengo la kuzilinda haki zao.
Katika
kipindi hiki cha miaka mitatu,huduma za watu wenye ulemavu zimeimarishwa. Zoezi la usajili kwa ajili ya kuimarisha
huduma na haki zao, likiwemo suala la elimu kwa watoto limefanyika. Tarehe 28 Septemba, 2012 Serikali iliizindua
Mfuko wa kuwasaidia watu wenye ulemavu na
hadi sasa jumla ya Tsh. 198 milioni zimepatikana.
HABARI, UTAMADUNI NA
MICHEZO.
Ndugu Waandishi wa Habari
na Ndugu Wananchi,
Katika
eneo la vyombo vya Habari, Ilani ya Uchaguzi ya CCM ya Uchaguzi Mkuu ya mwaka
2010-2015 inaelekeza Serikali kusimamia utekelezaji wa Sera ya Habari na
kuendeleza uhuru wa vyombo vya habari nchini. Katika kutekeleza agizo hili, Serikali katika kipindi cha
miaka
mitatu imetoa vibali vya kuanzishwa Redio nne (4) za FM na Televisheni tano (5). Sambamba na
hatua hizo, Shirika
la Magazeti ya Serikali limeweza
kuwafikia wasomaji wengi zaidi kwa kuongeza maeneo ya usambazaji Unguja na
Pemba na Tanzania Bara.
Ndugu Waandishi wa Habari
na Ndugu Wananchi,
Katika
kipindi hiki Shirika la Utangazaji la Zanzibar (ZBC) lilianzishwa na Serikali
ililazimika kuchukua hatua kadhaa, kama vile kununua vifaa na mitambo ya kisasa, ili viweze
kuyarusha matangazo yake kwa ufanisi, kuonekana na kusikika katika sehemu mbali
mbali ndani na nje ya Zanzibar na Tanzania kwa ujumla. Katika kipindi hiki
Serikali ilifanya uamuzi wa kuingia katika utaratibu wa kisasa wa digitali kwa
kununua vifaa na mitambo mipya, kwa ajili ya kuimarisha shughuli za utangazaji
Zanzibar na mafunzo ya kuwaendeleza wanahabari mbali mbali yalitolewa kwa lengo
la kuyatekeleza majukumu yao kwa ufanisi mkubwa. Katika kipindi hiki jumla ya
waandishi 38 wameweza kupatiwa mafunzo katika viwango vya stashahada, shahada
ya kwanza na shahada ya pili. Vile vile, Serikali iliyaimarisha matangazo ya redio kwa
kuuhamisha mnara wa masafa ya kati (medium waves) kutoka Chumbuni na kuupeleka
Bungi, ambako Ofisi na Studio mpya na nyumba mbili (2) za kisasa za familia nne
za wafanyakazi zimejengwa. Aidha,
ukarabati wa mnara wa mawimbi mafupi (short
wave) nayo umefanyika. Ukarabati huo umefanywa kwa ushirikiano wa Serikali
ya Mapinduzi ya Zanzibar na Serikali ya Jamhuri ya Watu wa China.
Ndugu Waandishi wa Habari
na Ndugu Wananchi,
Chuo
cha Uandishi wa Habari nacho kimeimarishwa kwa lengo la kujitosheleza kwa
wanahabari. Vifaa vya kufundishia
vilinunuliwa na walimu wenye ujuzi waliajiriwa.
Katika kuimarika kwa chuo hicho, hivi sasa wanafunzi wanaosomea cheti na
stashahada wameongezeka kutoka 75 mwaka 2009/2010 hadi kufikia 122 kwa mwaka
2010/2011.
Kwa upande mwingine, Serikali
imelishughulikia tatizo la uingizaji wa vifaa vya utangazaji vilivyopitwa na
wakati TV na redio ili kuepusha Zanzibar kugeuzwa jaa. Serikali ilitekeleza kwa mafanikio makubwa
Mkakati wa Mageuzi
ya Teknolojia
ya Utangazaji kutoka analogi kwenda dijitali nao umetekelezwa vyema.
Vile vile, jengo la Utangazaji la
zamani liliopo Rahaleo limefanyiwa ukarabati mkubwa ili liweze kutumika kwa
ajili ya studio za kurikodia nyimbo za wasanii wetu. Hivi sasa Serikali tayari ishachukua hatua ya
kununua vifaa vya studio hio.
Ndugu Waandishi wa Habari
na Ndugu Wananchi,
Katika
kipindi cha miaka mitatu iliyopita, Serikali imechukua hatua za kuifanyia
mapitio marekebisho sera ya Utamaduni na Michezo na sheria zinazoongoza taasisi
zinazosimamia utamaduni ili ziweze kuenda sambamba na wakati huu wa kuihusisha
sekta ya utamaduni na utalii kwa wote.
Katika
kuufanya utamaduni uwe na tija zaidi, wizara imeweza kukamilisha mchoro wa
ramani ya Utamaduni katika shehia za Unguja na Pemba pamoja na Utafiti wa
Urithi wa Utamaduni katika mikoa mitano ya Zanzibar na hatimaye ihifadhiwe na
itangazwe nchi za nje kwa kuingizwa katika orodha ya “UNESCO” ya tamaduni
zinazohifadhiwa. Hivi sasa Serikali imo katika mchakato wa kuifanyia
marekebisho makubwa sheria ya sanaa inayokusanya mambo yote ya utamaduni. Mswada huo wa sheria hivi sasa unaandaliwa.
Kuhusu ujenzi wa kiwanja cha kisasa cha michezo na
sherehe za kitaifa, Serikali imeuchagua uwanja wa Mao Tse Tung uliopo mjini Unguja utumike kwa shughuli hizo. Hatua
iliofikiwa hivi sasa ni
kukamilika michoro ya awali. Serikali ya Jamhuri ya Watu wa China imekubali
kushirikiana na Serikali ya Mapinduzi ya Zanzibar katika ujenzi huo na mkataba
wa makubaliano tayari umetiwa saini na pande mbili.
Ndugu Waandishi wa Habari
na Ndugu Wananchi,
Uwanja
wa Gombani Pemba tayari ulifanyiwa marekebisho kwa kuweka nyasi bandia na hivyo
kukidhi haja ya mashindano ya kimataifa ya mpira wa miguu. Halikadhalika,
matengenezo ya taa za uwanja yamekamilika ambayo yanauwezesha uwanja kutumika
hata wakati wa usiku. Serikali hivi sasa imeanza utaratibu wa kuezeka paa jipya
na ujenzi wa njia ya kukimbilia ili kutoa fursa ya michezo ya riadha kufanyika
kukidhi viwango vya kimataifa. Aidha, kwa kushirikiana na Serikali ya Japan
ujenzi wa kiwanja cha michezo ya ndani umeanza na unategemewa kukamilika
mwishoni mwa mwezi wa Disemba 2013.
Kwa
upande wa Uwanja wa Amaan, ukarabati mkubwa unafanyika kuimarisha eneo la
kuchezea ambapo utawekewa nyasi bandia. Kazi hii inatarajiwa kukamilika
katikati ya mwezi wa Disemba na utatumika kwa ajili ya mashindano ya
maadhimisho ya miaka 50 ya Mapinduzi.
Ndugu Waandishi wa Habari
na Ndugu Wananchi,
Katika kipindi hiki cha miaka mitatu ya Uongozi wangu,
Serikali imechukua hatua mbali mbali kuzilinda, kuzihifadhi na kuzidumisha mila, silka na
maadili mema ya Wazanzibari. Hatua
zimechukuliwa za kuzikagua kazi za sanaa na kuchukuliwa hatua za kuilinda na
kuhifadhi mila na silka kulingana na matokeo ya ukaguzi huo. Kukamilika kwa kamusi la
Kipemba, Kimakunduchi, Kitumbatu kutapelekea wananchi kuyatumia makamusi hayo
ili kuulinda utamaduni wetu.
Aidha,
kumekuwa na uhakiki wa Matamasha, Matangazo
ya kibiashara, Video
za nyimbo, Tenzi
zenye maudhui mbali mbali
na Filamu tofauti katika
maduka ya kukodishia
kanda Unguja na
Pemba. Bodi imekagua pia vikundi vya ngoma, michezo ya kuigiza jukwaani,
tenzi na mashairi ya kughani ili kuhakikisha mila, silka na utamaduni wa
Kizanzibari hauathiriwi na mambo hayo.
Hatua hizo zimekwenda sambamba na hatua za
kuhifadhi kumbukumbu za kihistoria na Mambo ya Kale. Utafiti wa uchimbaji wa eneo la Ngome
Kongwe, Forodhani Unguja kulingunduliwa vigae vya vyungu, ‘Kwale pottery’ vya
karne ya kwanza. Aidha, matengenezo yamefanyika kwa jengo la makumbusho la
Mahodhi ya Hamamni (Hamamni Baths) ili kulirudisha katika hadhi yake ya awali
na kuweza kuongeza idadi ya vivutio kwa wageni. Serikali imeyafanyia
matengenezo majengo ya Mangapwani kwenye Mahandaki ya Vita Kuu ya Pili ya Dunia
pamoja na mnara wake na magofu ya Kizimbani na Hamamni na jengo la Beit el
Ajaib.
MAZINGIRA
Ndugu Waandishi wa Habari na Ndugu Wananchi,
Katika kipindi cha miaka mitatu iliyopita Serikali
imeweza kutekeleza majukumu muhimu ya kuyalinda na kuyahifadhi mazingira ya
nchi yetu kwa kulingana na Sheria, Sera na Ilani ya CCM ya Uchaguzi Mkuu wa
mwaka 2010- 2015.
Mambo makuu yote
yaliyozingatiwa kwenye Ilani na kwenye MKUZA II yameweza kutekelezwa kwa
mafanikio makubwa. Serikali imeweza kufanya mapitio ya Sera ya Mazingira ya mwaka 1992 na
kuzindua Sera ya Mpya ya Mazingira ya mwaka 2013 ambayo inatoa muongozo kwa
shughuli za uhifadhi wa mazingira nchini kwa kuzingatia hali halisi ya
kimazingira ilivyo na kwa kuzingatia athari za mabadiliko ya tabianchi. Mapitio
ya Sheria ya Mazingira ya mwaka 1996 yamelenga katika kuongeza nguvu za
kisheria katika kuyahifadhi na kuyasimamia mazingira nchini. Sambamba na hatua hizo, Serikali imepitisha
kanuni mbili za usimamizi wa mazingira.
Kanuni
ya kwanza ni ya usimamizi wa maliasili zisizorejesheka, ambayo inatoa miongozo
ya uvunaji endelevu wa maliasili hizo na kupunguza wimbi la uchimbaji kiholela
wa mawe na mchanga. Kanuni ya pili ni ya
kupiga marufuku mifuko ya plastiki, ambayo inakataza kuingiza, kutumia,
kusafirisha na kuhifadhi mifuko ya aina yote ya plastiki hapa Zanzibar. Jumla ya tani 288 za plastiki zimekamatwa na
kuteketezwa na wanaohusika wanachukuliwa hatua za kisheria.
Hivi
karibuni Serikali ilianzisha na kuzindua Kikosi kazi cha udhibiti wa uharibifu
wa mazingira katika visiwa vya Zanzibar.
Uanzishwaji wa Kikosi kazi hicho ni hatua muhimu na ya lazima ya kulinda
mazingira yetu, dhidi ya vitendo vyote vibaya vinavyoathiri mazingira. Tangu kilipozinduliwa kikosi kazi hicho watu kadhaa wameshakamatwa
na taratibu za kisheria zimechukuliwa dhidi yao.
Ndugu waandishi wa Habari na Ndugu Wananchi,
Sera mpya ya Mazingira ya 2013 inaelekeza kutoa elimu kwa
wananchi juu
ya umuhimu wa utunzaji na hifadhi ya mazingira na kuimarisha ukaguzi katika
maeneo ya makaazi, viwanda na
mahoteli. Elimu imesisitizwa juu ya
umuhimu wa kuhifadhi misitu,umuhimu wa mikoko, maliasili
zisizozalishika,uhifadhi wa bioanuwai, na kadhalika.
Ndugu Waandishi wa Habari na Ndugu Wananchi,
Kwa
upande mwingine Serikali imefanya mapitio ya Uchaguzi ya miradi ya vitega
uchumi ili kujua athari za mazingira na kupendekeza hatua za utekelezaji.
Katika kipindi hicho jumla ya miradi 160 imefanyiwa ukaguzi na kupewa miongozo
na ushauri wa kimazingira. Vilevile miradi ya maendeleo na vitega uchumi 51
imefanyiwa tathmini ya athari za kimazingira na kutolewa vyeti vya mazingira
kwa miradi hiyo.
Masuala mengine yaliyotekelezwa katika kipindi hicho ni
kushughulikia suala la mabadiliko ya tabianchi kwa kufanya utafiti, kuangalia
athari za mabadiliko ya tabianchi kwa uchumi wa Zanzibar na kuorodhesha maeneo
yanayoingia maji ya chumvi ambapo jumla ya maeneo 148 yameathirika Unguja
(maeneo 25) na Pemba (123).
Aidha,
Serikali imeandaa ramani ya mazingira na kuanzisha mfumo wa kuweka taarifa za
kimazingira kwa njia ya ramani kwa kutumia kompyuta yaani Zanzibar Environmental Information Management System (ZEIMS).
USHIRIKIANO WA KIMATAIFA
NA WAZANZIBARI
WANAOISHI NCHI ZA NJE (DIASPORA)
Ndugu Waandishi wa Habari
na Ndugu Wananchi,
Serikali
ya Mapinduzi ya Awamu ya Saba imeanzisha
Idara ya Ushirikiano wa Kimataifa na Uratibu wa Wanzanzibari Wanaoishi
Nje (Dispora) kwa lengo la kurahisisha
na kushajishisha ushiriki wao katika
harakati za maendeleo ya nchi yao. Kwa
kupitia idara hii, Wazanzibari walioko nje wanaendelea kutoa michango mbali
mbali ikiwemo ya fedha na kitaalamu katika sekta mbali mbali za kiuchumi na
kijamii. Aidha, Idara imekuwa ikifanya kazi ya kuwahamasisha Wazanzibari
walioko nje kuja kuwekeza nchini.
Kupitia
Wizara ya Mambo ya Nchi za Nje na Ushirikiano wa Kimataifa wa Serikali ya
Jamhuri ya Muungano wa Tanzania, Idara
ya Ushirikiano wa Kimataifa na Uratibu wa Wanzanzibari Wanaoishi nje imeimarisha ushiriki wa Serikali yetu katika
masuala na mikutano mbali mbali ya Kimataifa.
Vile
vile, Serikali ya Mapinduzi ya Zanzibar, Awamu ya Saba, imeimarisha
mashirikiano na nchi mbali mbali, Taasisi za Kimataifa na washirika wote wa
Maendeleo.
MWISHO
Ndugu Waandishi na Ndugu Wananchi,
Napenda
nitoe shukurani zangu za dhati kwa wananchi wote kwa kushirikiana na Serikali.
Ni matumaini yangu kwamba wananchi wataendelea kushirikiana na Serikali na vile
vile wafanyakazi wote wa Serikali wataendelea kuongeza juhudi zao ili tuweze
kutekeleza malengo yetu ya DIRA YA MAENDELEO 2020. Hivi sasa tumebakiwa na miaka sita tu hadi
kuyafikia malengo hayo. Pindi kama tukiyafikia, hapana shaka tutaitoa nchi
katika kundi la nchi za kipato cha chini na kuwa katika kundi la nchi za kipato
cha kati (Middle income).
Bila
ya shaka yoyote, hali hiyo tutaifikia tu tukiwa makini, watiifu wa amani na
utulivu nchini. Utiifu wa sheria ni hatua moja muhimu katika kuyafanikisha
hayo. Ni jukumu la viongozi wote wa Serikali,
wanasiasa, viongozi wa dini na viongozi wengine katika jamii, sote kwa
pamoja tutekeleza wajibu wetu kwa kuhakikisha kwamba amani na utulivu
unadumishwa na sheria za nchi zinafatwa.
Ilivyokuwa Serikali inaongozwa kwa misingi ya Katiba na Sheria zake,
basi vyama vyote vya siasa, taasisi zisizokuwa za Serikali na zile za jamii
nazo ni lazima ziongozwe kwa kuzingatia katiba za nchi, katiba zao na kanuni
zao na kuzifuata sheria za nchi. Sura ya
Tatu ya Katiba yetu imeelezea kuhusu Kinga ya Haki za Lazima, Wajibu wa Uhuru wa
Mtu Binafsi, kuanzia kifungu cha 11 hadi kifungu cha 25. Lakini kila mtu ana wajibu wa kufuata na
kuitii Katiba ya Zanzibar na Sheria zake. Hili ni jambo muhimu na ni lazima
tuyaenzi na tuyadumishe Mapinduzi yetu na tuudumishe na tuuendeleza Muungano wetu
kwani ndio nguzo yetu kubwa ya maendeleo
na vilivyotufikisha hapa tulipofika hivi sasa na tunakokusudia kufika katika
miaka mingi ijayo. Katika kipindi hiki
tumeshuhudia Muungano wetu umeendelea kuwa imara zaidi tangu pale ulipoanzishwa
na nchi yetu imepata heshima kubwa sana katika Jumuiya ya Kimataifa. Tumepata mafanikio makubwa ya kisiasa,
kiuchumi na ustawi wa jamii, ingawa zimekuwepo baadhi ya changamoto lakini
zitaendelea kushughulikiwa hatua kwa hatua.
Napenda
niwahakikishie wananchi wote kwamba Serikali ya Mapinduzi ya Zanzibar
itaendelea kushirikiana na Serikali ya Jamhuri ya Muungano wa Tanzania katika
kuendeleza Muungano wetu, kuimarisha na kuwatumikia wananchi. Katika kuuimarisha Muungano wetu, sote
tumetimiza wajibu kwa kutoa maoni yetu kwa ajili ya kuandaliwa Katiba Mpya ya
Jamhuri ya Muungano wa Tanzania. Tume ya
Kuratibu Maoni ya Katiba Mpya umefanya kazi nzuri na itaendelea kuifanya kazi
hio kama vile sheria inavyoiongoza.
Hatua zilizobakia nazo zitakamilishwa kwa kuzingatia sheria iliyopo ili
hatimae tupate Katiba Mpya itakayoliongoza Taifa letu na kuimarisha Muungano
wetu. Napenda nimshukuru na nimpongeze sana Rais wa Jamhuri ya Muungano wa
Tanzania Mhe. Dk. Jakaya Mrisho Kikwete kwa kusimama imara katika kuutetea na
kuuendeleza Muungano wetu na kwamba siku zote yuko tayari kuzizungumzia
changamoto zinazoukabili Muungano wetu na kutafuta njia za kuzipatia ufumbuzi
kila zinapotokea.
Serikali
ya Mapinduzi ya Zanzibar itaendelea kushirikiana na Serikali ya Jamhuri ya
Muungano wa Tanzania katika kuuendeleza na kuudumisha Muungano kwa manufaa ya
nchi zetu mbili.
Hivi
sasa tumemaliza miaka mitatu tangu SMZ yenye Mfumo wa Umoja wa Kitaifa imeingia
madarakani. Hata hivyo, bado ipo kazi
kubwa mbele yetu ambayo inahitaji jitihada zetu sote. Tuendelee kushikamana na kupendana,
tushindane kwenye mfumo wa vyama vingi vya siasa bila ya kugombana,
kukashifiana, kulaumiana, kutukanana na kudharauliana. Zanzibar haitajengwa kwa
mambo hayo yasiyokuwa na tija wala faida.
Huu ni wakati wa kuongeza kasi na kuijenga nchi yetu, ili tusije
tukaachwa nyuma.
Napenda
kuwahakikishia wananchi wote kuwa serikali kwa upande wake itaendelea
kutekeleza wajibu wa kikatiba na sheria kwa kuilinda amani, utulivu, mali na
maisha ya watu. Hakuna atakayedhulumiwa wala kuonewa, lakini pia hakuna
atakayevumiliwa kwa kuvunja sheria.
Tukiwa
tumo katika kipindi cha shamrashamra ya kusherehekea miaka 50 ya Mapinduzi ya
Zanzibar, natoa wito kwa kila mmoja wetu awe ni sehemu ya kuzifanikisha sherehe
zetu kwa furaha, salama, amani na utulivu. Tushirikiane sote kwa pamoja na
tuendeleze umoja na mshikamano katika kuzifanikisha sherehe zetu, ili tuioneshe
dunia mafanikio yetu ya miaka 50, utamaduni wetu na kwamba tunauthamini umoja
wetu, amani na mshikamano.
Ahsanteni
kwa kunisikiliza.
No comments:
Post a Comment