Wawili mbaroni kwa mauaji

Na Abdi Suleiman, Pemba

JESHI la Polisi Mkoa wa Kusini Pemba, linawashikilia watu wawili kwa tuhuma za mauaji ya Makame Ali Suleiman (Dude), aliyeuawa katika mazingira ya kutatanisha.

Akizungumza na mwandishi wa habari hizi, Kamanda wa Polisi mkoa huo, Juma Yussuf Ali, alisema marehemu aliokotwa chini ya mnazi ambao unagemwa pombe, hali inayoonesha kulikuwepo ugomvi wa kuwania pombe baina ya marehemu na watu waliofanya mauaji hayo.

Alisema baada ya upelelezi kukamilika, watuhumiwa watafikishwa katika vyombo vya sheria ili sheria ichukue mkondo wake.

Tukio hilo lililotokea usiku wa kuamkia Febuari 6 katika bonde la Oka Kangani wilaya ya Mkoani, baada ya wananchi waliokuwa wakipita njiani kuona mwili wa marehemu ukiwa umetelekezwa.

Marehemu alikatwa bega la kushoto na kutolewa lote, kuharibiwa sehemu za usoni na macho, kupasuliwa kichwani, kukatwa masikio na kukatwa vidole.

Aidha alisema mtu mmoja anashikiliwa baada ya kuvamia nyumba moja katika kijiji cha Pujini na tayari ameshafikishwa mahakamani.

Kamanda huyo alimtaja mtuhumiwa huyo kwa jina moja la Fesha, ambaye ana rekodi nyingi za matukio ya uhalifu.