THBUB yampongeza Rais kwa tamko kuhusu kutotekeleza adhabu ya kifo

-	Tume ya Haki za Binadamu na Utawala Bora Kitalu Na. 8, Mtaa wa Luthuli S.L.P 2643, DAR ES SALAAM Simu: +255 22 2135747/8; 2137125; 2135222 Faksi: +255 22 2111281 B/Pepe: chragg@chragg.go.tz Tovuti: www.chragg.go.tz

Septemba 12, 2017

                                                                                                       

TAARIFA KWA VYOMBO VYA HABARI

THBUB yampongeza Rais kwa tamko kuhusu kutotekeleza adhabu ya kifo

Tume ya Haki za Binadamu na Utawala Bora (THBUB) imepokea tamko la Mhe. Rais wa Jamhuri ya Muungano wa Tanzania, Dkt. John Pombe Magufuli alilolitoa Septemba 11, 2017 kuhusu kutotekeleza adhabu ya kifo wakati wa uongozi wake, kuwa ni tamko lenye kuzingatia haki ya msingi ya kuishi.

Tume inapenda kuungana na wadau wengine kumpongeza Mhe. Rais kwa tamko hilo ambalo limekuja muda mfupi kabla ya Siku ya Kimataifa ya kuhamasisha nchi wanachama wa Umoja wa Mataifa kufuta adhabu ya kifo, ambayo huadhimishwa Oktoba 3 ya kila mwaka.  

Uamuzi wa Mhe. Rais unaendana na Mkataba wa Kimataifa na maazimio ya Umoja wa Mataifa yanayozitaka nchi wanachama kufuta au kusimamisha utekelezaji wa adhabu ya kifo (abolition/moratorium on the death penalty).

Tume inatambua kwamba adhabu ya kifo haijatekelezwa hapa nchini katika kipindi cha takriban miaka 20 iliyopita na hivyo kudhihirisha kwamba Tanzania ni nchi isiyotekeleza adhabu ya kifo kwa hiari yake yenyewe pamoja na uwepo wa adhabu hiyo katika sheria za nchi.

Kwa kuzingatia kauli ya Mhe. Rais pamoja na mahitaji ya sheria za kimataifa za haki za binadamu, Tume ya Haki za Binadamu na Utawala Bora inapenda kuchukua nafasi hii, kuishauri Serikali iridhie Itifaki ya pili ya Mkataba wa Kimataifa wa Haki za Kiraia na Kisiasa; Itifaki ambayo inazitaka nchi wanachama kufuta adhabu ya kifo.

Imetolewa na:

(SIGNED)

Bahame Tom Nyanduga

Mwenyekiti

TUME YA HAKI ZA BINADAMU NA UTAWALA BORA

Septemba 12, 2017