.JPG)
.jpg)
.jpg)
HOTUBA YA MAKAMU WA PILI WA RAIS
WA ZANZIBAR, MHE. BALOZI SEIF ALI IDDI WAKATI WA KUTOA HOJA YA KUAKHIRISHA MKUTANO WA TISA WA BARAZA LA TISA
LA WAWAKILISHI, TAREHE 28 FEBUARI, 2018
Mheshimiwa Spika,
kwanza kabisa, hatuna
budi kumshukuru Mwenyezi Mungu Mtukufu, mwingi wa rehma, mwenye kuneemesha
neema zote hapa ulimwenguni na kesho Akhera, kwa kutujaalia hali ya uzima na
afya njema ambayo imetuwezesha kuwepo hapa wakati huu baada ya kufanikisha
vizuri Mkutano wa Tisa wa Baraza hili Tukufu la Tisa la Wawakilishi ulioanza tarehe 07 Febuari, 2018. Shughuli
zote zilizopangwa katika ratiba ya Mkutano huu zimekamilika kwa wakati na kwa
ufanisi wa kupigiwa mfano.
Mheshimiwa Spika, napenda kuchukua fursa hii kukupongeza wewe mwenyewe binafsi
Mheshimiwa Zubeir Ali Maulid, Naibu Spika Mheshimiwa Mgeni Hassan Juma pamoja
na Wenyeviti wote wa Baraza kwa kuviendesha vyema vikao vyetu kwa hekima,
busara na weledi mkubwa na kukifanya kikao hiki kumalizika kwa mafanikio
makubwa.
Mheshimiwa Spika, kwa umuhimu na uzito wa kipekee nampongeza kwa dhati
Rais wa Zanzibar na Mwenyekiti wa Baraza la Mapinduzi, Mheshimiwa Dkt. Ali
Mohammed Shein, kwa kuisimamia vyema Serikali ya Mapinduzi ya Zanzibar pamoja
na Chama chetu cha Mapinduzi (CCM). Usimamizi wake huo umetuletea mafanikio ya
kupigiwa mfano ambayo tunajivunia na kutufanya twende kifua mbele.
Mheshimiwa Spika, nampongeza tena Rais wa Zanzibar na Mwenyekiti wa Baraza la
Mapinduzi, Mheshimiwa Dkt. Ali Mohamed Shein kwa kukamilisha ziara yake ya nchi
ya Falme za Kiarabu. Safari ambayo italeta manufaa makubwa ya kuinua uchumi wa
nchi yetu ikiwemo masuala ya utafiti na uchimbaji wa mafuta, Sekta ya Utalii,
Sekta ya Biashara, Sekta ya Afya, ushirikiano wa kidiplomasia, uanzishaji wa
viwanda vidogo vidogo pamoja na ujenzi wa barabara. Lakini pia, ziara hiyo imeimarisha uhusiano
wetu mzuri uliopo baina ya Zanzibar na UAE.
Mapokezi aliyoyapata yana dhihirisha kuimarika huko kwa uhusiano wetu
huo.
Mheshimiwa Spika, katika kuimarisha na kuhamasisha michezo nchini, Rais wa Zanzibar na
Mwenyekiti wa Baraza la Mapinduzi Dkt. Ali Mohamed Shein ametimiza ahadi yake aliyoitoa kwa wanamichezo wetu na kuwapa
zawadi mbali mbali wanamichezo wetu wa timu ya Taifa ya Zanzibar Heroes na Sand
Beach Heroes kwa kila mchezaji na viongozi wa timu hizo kwa juhudi na moyo
waliouonyesha kwa kuipatia sifa nchi yetu na
kufungua ukurasa mpya katika tasnia ya michezo katika ramani ya dunia.
Mheshimiwa Spika, vile vile, napenda kutoa pongezi zangu za dhati kwa Rais wa Jamhuri ya
Muungano wa Tanzania, Mheshimiwa Dkt. John Pombe Joseph Magufuli kwa kumteua
Ndg. Mohammed Hassan Haji kuwa Kamishna wa Polisi Zanzibar. Uteuzi huo
unaonesha imani ya Mheshimiwa Rais aliyonayo kwa utendaji wake wa kazi.
Ninaamini kwamba Kamishna Haji ataendelea kuliimarisha Jeshi la Polisi katika
utekelezaji wa majukumu ya ulinzi wa raia na mali zao hapa Zanzibar kwa
uadilifu na umakini mkubwa pamoja na kuitunza amani ya nchi yetu.
Mheshimiwa Spika, kadhalika
tunakipongeza Chama Cha Mapinduzi kwa kutimiza miaka 41 tokea kuzaliwa kwake
mwaka 1977 kwa mafanikio makubwa sana. Chama hichi kimeweza kuisimamia amani,
umoja, utulivu na mshikamano katika nchi yetu na kuendelea kutoa maelekezo na
miongozo kwa viongozi na watendaji mbali mbali wa Serikali na kuleta ufanisi
katika utendaji wetu wa kazi za kuwatumikia wananchi wetu. Tunaamini kwamba, miongozo na maelekezo hayo
yanasaidia sana katika kuongeza uweledi na uwajibikaji unaotoa mchango mkubwa
wenye kuleta maendeleo endelevu nchini.
Mheshimiwa Spika,
Serikali ya Mapinduzi ya
Zanzibar imekamilisha na kuwasilisha Taarifa ya Utekelezaji wake wa Ilani ya
Uchaguzi ya CCM ya mwaka 2015 - 2020 kwa muda wa miaka miwili kuanzia mwezi
Oktoba, 2015 hadi Septemba, 2017 na kuwasilishwa katika Mkutano Mkuu wa CCM
uliofanyika mwezi Disemba, 2017 Mkoani Dodoma. Taarifa hiyo imeonesha
utekelezaji halisi wa maagizo ya Ilani yetu na tayari karibu asilimia 60 ya
maagizo hayo yamekamilika utekelezaji wake. Nazisihi Taasisi zote za Serikali
kuendelea na utekelezaji wa maagizo yaliyobakia kwa kufuata taratibu na
miongozo inavyotuelekeza.
Mheshimiwa Spika,
nawapongeza Waheshimiwa
Mawaziri, Makatibu Wakuu, Wakurugenzi na watendaji wote kwa kusimamia vyema
utekelezaji wake na nawaomba waendelee na juhudi hizo ili lengo la Serikali
likamilike kwa wakati. Ofisi yangu itaendelea kuziratibu Taasisi za Serikali
ili kuhakikisha utekelezaji wa Ilani unafikia asilimia 100 ifikapo 2020.
Mheshimiwa Spika, katika mapambano dhidi ya vitendo vya udhalilishaji wa kijinsia,
Serikali inaendelea kuchukua hatua kali za kisheria juu ya wote watakaobainika
kushiriki katika kadhia hii ikiwemo wafanyaji na wale wote wanaoshiriki katika
kuwalinda na kuwakingia kifua wahalifu wa udhalilishaji. Aidha, Serikali haitamvumilia wala kumuonea
aibu wala muhali mtu yeyote wa cheo chochote na ngazi yeyote pindi ikibainika
kutenda jambo hilo. Waheshimiwa inatupasa tutambue kwamba, sheria ni msumeno.
Mheshimiwa Spika, navisihi vyombo vya ulinzi na usalama kupambana zaidi juu ya mambo
hayo yanayoitia aibu nchi yetu pamoja na kuharibu maisha ya wananchi wetu. Ni wajibu wa jamii kutoa ushirikiano wa kutosha ili
kukabiliana na tatizo hilo, kwa kuwafichua na kutoa taarifa za matukio hayo,
kutozimaliza kesi hizi majumbani na nawasihi wahusika kufika mahakamani na
kutoa ushahidi ili sheria iweze kuchukua mkondo wake na haki itendeke na
hatimae kuvimaliza vitendo hivi katika nchi yetu.
Mheshimiwa Spika, tayari Baraza lako Tukufu limekwishapitisha sheria ya adhabu. Sheria
ambayo imeweka bayana kuwa mtuhumiwa yeyote wa kosa la udhalilishaji hatopaswa
kupewa dhamana. Sheria hiyo sasa
inangojea kuwekwa saini na Mheshimiwa Rais tu ili iwe Sheria ambapo Mheshimiwa
Rais ataifanya kazi hiyo baada ya muda sio mrefu.
Mheshimiwa Spika, katika mapambano dhidi ya dawa za kulevya, Serikali kupitia Tume ya
Kuratibu na Udhibiti wa Dawa za Kulevya imeendelea na juhudi mbali mbali
ikiwemo kutoa taaluma za athari za matumizi ya dawa za kulevya kwa makundi ya
kijamii zikiwemo skuli 446 za Msingi na Sekondari, ambapo tayari Tume
imewafikia wanafunzi 54,532. Tume pia
imetoa taaluma katika vyuo vya elimu ya juu, maeneo mbali mbali ya kazi pamoja
na vikosi vya ulinzi na usalama. Kadhalika, Tume imeandaa na kurusha vipindi
456 vya taaluma. Aidha, Serikali inaendelea kuzisaidia nyumba za upataji nafuu
kwa vijana walioamua kwa hiyari zao kuacha matumizi ya dawa za kulevya. Katika mwaka 2017 jumla ya vijana 370
wameweza kupatiwa huduma katika vituo hivyo Unguja na Pemba.
Mheshimiwa Spika, napenda kuwahimiza Wajumbe wote wa Baraza lako Tukufu na Viongozi
wengine katika ngazi mbali mbali kuunga mkono juhudi za kupambana na dawa za
kulevya kwa kuwaelimisha wazee na jamii nzima kwa ujumla kuondoa unyanyapaa kwa
vijana ambao wameamua kuacha matumizi ya
dawa za kulevya na tuwe tayari kuwapokea na kuishi nao vijana wetu ili wajihisi
kuwa ni sehemu ya jamii na wanathaminiwa na siyo kuwavunja moyo na kuwakatisha
tamaa. Tuwaonyeshe vijana hao kuwa
hawatengwi tena na jamii.
Mheshimiwa
Spika,
suala la upatikanaji wa maji safi na salama mijini na vijijini limekuwa
likishughulikiwa ipasavyo na Serikali yetu. Katika kuimarisha hali ya
upatikanaji wa maji kwa wananchi Serikali imejipanga kutekeleza miradi mikubwa
minne ifuatayo:
i.
Mradi
wa kwanza ni wa Kuimarisha Miundombinu ya Maji na Kuijengea Uwezo Mamlaka
kifedha unaofadhiliwa na Mfuko wa Maendeleo ya Afrika wa Awamu ya 12 (ADF 12).
Mheshimiwa Spika, Mradi
huu unatarajia kubadilisha mabomba
machakavu na kuweka mabomba mapya yenye urefu wa kilomita 68 katika maeneo ya
Bumbwisudi, Kinumoshi, Kianga, Welezo, Mwembe Mchomeke, Amani, Kiponda na Mji
Mkongwe; na kujenga matangi 2, Saateni 1 na Mnara wa mbao 1. Utekelezaji wa Mradi huu tayari umeshaanza na
unatarajiwa kugharimu jumla ya Shilingi za Kitanzania Bilioni 48 hadi kukamilika kwake.
Mheshimiwa Spika, Mradi wa pili ni
kuimarisha Miundombinu ya maji mjini unaofadhiliwa na Shirika la Maendeleo la
Japan (JICA).
Mheshimiwa Spika, Mradi
huu utatekelezwa kwa ujenzi wa matangi katika maeneo ya Welezo juu, Welezo
Magharibi na Zoni ya Migombani kwa ulazaji wa mabomba yenye urefu wa kilomita
120 na uwekaji wa umeme katika maeneo
husika ya utekelezaji wa mradi huu ambao unatarajiwa kugharimu jumla ya
Shilingi za Kitanzania Bilioni 225.
Mheshimiwa spika, mradi wa
tatu ni Mradi wa Uimarishaji wa Miundombinu ya Maji Mjini unaofadhiliwa na
Serikali ya India. Huu ni mradi mpya utakaohusisha ulazaji wa mabomba katika
maeneo ya Zoni ya Mfenesini, Kizimbani, Tunguu na Fumba kwa kuchimba visima,
kuweka mabomba ya kuvutia maji pamoja na kuvuta umeme katika maeneo ya visima
vitakavyo chimbwa. Mradi huu unatarajiwa kugharimu jumla ya Shilingi za
Kitanzania Bilioni 207 hadi kukamilika kwake; na
Mradi wa nne ni uchimbaji wa visima
na usambazaji wa maji vijijini unaofadhiliwa na Serikali ya Jamhuri ya Watu wa
China.
Mheshimiwa Spika, Mradi
huu unahusisha uchimbaji wa visima 11 katika maeneo ya Chaani, Donge,
Kisongoni, Kiboje na Miwani; pamoja na Ujenzi wa matangi 3, Kisongoni 1, Kiboje
1 na Miwani 1; pia ulazaji wa mabomba yenye urefu wa kilomita 20.178 katika
maeneo ya Kiboje na Miwani na uvutaji wa umeme. Mradi huu unatarajiwa kugharimu
Shilingi za Kitanzania Bilioni 12 hadi kukamilika kwake.
Mheshimiwa
Spika,
ili miradi hiyo yote iwe endelevu, tunawaomba
wananchi waondokane na dhana ya
uchangiaji wa maji kuwa ni jukumu la Serikali pekee. Kwa maana hiyo tunawaomba wananchi
kuchangia gharama za huduma hizo kwa wale wote wanaopata huduma hiyo.
Mheshimiwa Spika,
kwa kuzingatia miradi
hiyo na gharama zake, mkopo wa Shs: Milioni 200 uliopendekezwa kutolewa kwa
Serikali usingefaa chochote wala lolote.
Mheshimiwa
Spika,
hivi karibuni kumekuwepo na upungufu wa mafuta
nchini ambao umeathiri shughuli za kiuchumi.
Upungufu huo umesababishwa na kuwepo na foleni kubwa ya upakizi katika
bandari ya Dar es Salaam pamoja na kuongezeka kwa idadi kubwa ya matumizi ya
nishati hiyo kwa kiwango cha juu kutoka lita Milioni 10 katika mwezi wa
Disemba, 2017 hadi kufikia lita Milioni 17 kwa mwezi wa Januari, 2018. Aidha, Serikali ilikuwa inatumia mfumo wa
uingizaji wa mafuta kwa pamoja (BPS) ambao ulituwezesha kujua idadi halisi ya
matumizi ya mafuta Zanzibar kwa wakati huo pamoja na kudhibiti ubora wa mafuta
unaoingizwa nchini, ambapo kwa sasa mfumo unaotumika ni kila kampuni kuingiza
mafuta yake wenyewe (Multiple Importation).
Mheshimiwa
Spika,
Serikali inalishughulikia suala la upungufu wa
mafuta kwa umakini wa hali ya juu na imejipanga kuchukua hatua za muda mfupi,
wa kati na mrefu ili suala la upungufu wa mafuta liwe historia nchini
mwetu. Kwa taarifa zaidi zitaelezwa kwa
undani katika bajeti ijayo. Hivyo, natoa
wito kwa wananchi kuwa wastahamilivu na kwani sio nia ya Serikali kuwapa
wananchi wetu usumbufu. Serikali
inalitambua suala hilo inakereka nalo na haifurahii kuwepo kwa tatizo hili hapa
nchini na iko mbioni kulimaliza suala hili lisitokee tena.
Mheshimiwa Spika, kuhusu suala la ulipaji
umeme kwa deni la TANESCO kwa upande wa Zanzibar, Serikali iliamuru Shirika la
umeme ZECO lilipe deni la umeme kwa TANESCO kwa kiwango cha Shilingi Bilioni
mbili kila mwezi na Wizara ya Fedha kulipa deni hilo kwa kiwango cha TZS
Bilioni moja kila mwezi, Shirika la
umeme na Wizara ya Fedha walianza utekelezaji huo.
Katika
utekelezaji huo changamoto zimejitokeza kwa upande wa Shirika la Umeme ZECO kwa
kutoweza kuendelea kulipa kwa ukamilifu kiwango kilichoagizwa na Serikali cha
TZS Bilioni 2 kila mwezi. ZECO imeweza kulipa deni hilo kwa kiwango
kilichoagizwa na Serikali kwa kipindi cha miezi minne (4) kuanzia Juni, 2017
hadi Oktoba, 2017, miezi mengine iliyobakia ililipa deni hilo chini ya kiwango
kilichoagizwa na Serikali.
Mheshimiwa Spika, kutoweza kutimiza agizo
hilo ni kutokana na changamoto ya ukusanyaji wa mapato yanayotokana na Ankara
za matumizi ya umeme kutoka kwa baadhi ya Taasisi za Serikali ya Mapinduzi ya
Zanzibar na zile za Muungano zilizopo Zanzibar ambayo inapelekea kutokuwa na mapato
ya kutosha kulipa deni hilo kila mwezi kama ilivyoagizwa na Serikali baada ya
kukidhi mahitaji mengine ya msingi ya kuliendesha Shirika hilo.
Mheshimiwa Spika, kuhusu ulipaji wa Ankara
za matumizi ya umeme kwa Taasisi za Serikali, Serikali ya Mapinduzi ya Zanzibar
iliagiza Wizara ya Fedha kulipa deni la Ankara za matumizi ya umeme kwa Taasisi
za Serikali ya Mapinduzi ya Zanzibar hadi mwezi wa April, 2017. Pia, kuanzia
mwezi wa Mei, 2017 Taasisi za Serikali ya Mapinduzi ziliagizwa kuendelea kulipa
Ankara za matumizi yao ya umeme ya kila mwezi, naamini Taasisi hizo zimeendelea
kufanya hivyo.
Mheshimiwa
Spika, Viongozi wetu Wakuu Wastaafu wameitumikia nchi
yetu na watu wake kwa juhudi, maarifa, uweledi na mapenzi makubwa. Serikali ya
Mapinduzi ya Zanzibar imekuwa ikitenga fedha maalum katika bajeti yake ili
kuwaenzi na kuwahudumia viongozi wake hao kwa mujibu wa Sheria na hakuna hata
kiongozi mmoja miongoni mwao aliyewahi kulalamika kwa kukoseshwa huduma
wanazostahiki kwa mujibu wa Sheria. Nakuombeni sana Waheshimiwa Wawakilishi
kufanya uchunguzi wa kina kabla ya kutoa hoja zenu au kuchangia mijadala katika
Baraza lako Tukufu. Sio busara wala
haikubaliki kutoa hoja kwa ajili ya kujijengea umaarufu tu bila ya kuchunguza
na kuthibitisha ukweli wa hoja inayotolewa. Hii itasaidia sana kuondoa mizozo
na migongano miongoni mwa wananchi na kuifanya mijadala hiyo kutokuwa na tija.
Mheshimiwa
Spika, suala la kupunguza
umasikini ni miongoni mwa vipaumbele vya Serikali yetu. Serikali kupitia Mpango
wa Kunusuru Kaya Masikini TASAF Awamu ya Tatu, kwa mwezi wa Januari – Februari
2018 imelipa jumla ya TShs. Bilioni
1,096,244,000/ kwa Walengwa 30,543 Unguja na Pemba. Hivi sasa walengwa wa mpango huo wanaendelea na kazi
za ajira za muda Unguja na Pemba na hivyo kuwapunguzia ukali wa maisha.
Mheshimiwa
Spika,
Serikali inaendelea kufuatilia kwa umakini utekelezaji wa Mfuko wa Maendeleo ya
Jimbo unaohusisha kusaidia miradi midogo midogo inayoibuliwa na wananchi katika
majimbo yote ya Unguja na Pemba. Ninawaomba Waheshimiwa Wajumbe wa Baraza lako
Tukufu kufuata sheria zake na kufanya marejesho kwa wakati ili Serikali iweze
kukamilisha taratibu nyengine za mfuko huo.
Serikali haitatoa fedha kwa Jimbo lolote ambalo halitafanya marejesho ya
matumizi ya fedha iliyotolewa awali.
Mheshimiwa Spika, elimu ndio msingi mkubwa wa mafanikio yetu katika kukuza maendeleo na
mustakbali wa nchi yetu na wananchi wake. Kwa kulitambua hilo, Serikali
inaendela na ujenzi wa majengo mapya ya skuli pamoja na kufanya matengenezo kwa
majengo yaliyochakaa Unguja na Pemba.
Lengo ni kuwa na miundombinu iliyo bora na salama ambayo itapelekea
kupata elimu bora na ya uhakika. Hivyo basi, natoa rai kwa walimu na wazazi
kuwahamasisha watoto wasome kwa bidii pamoja kusimamia malezi yaliyo bora kwa
watoto wetu ikiwa ni pamoja na kuzingatia mila, utamaduni na silka zetu,
hususan katika kipindi hichi cha utandawazi. Vile vile, Serikali inaahidi
kusimamia zaidi suala la Elimu ikiwemo upatikanaji wa vifaa vya kukalia,
maabara na vitabu vya kiada na ziada ili kuwa na matokeo mazuri katika mitihani
yao.
Mheshimiwa Spika, Serikali ina jukumu la msingi la kuhakikisha huduma za afya zinatolewa
na kupatikana na wananchi wote. Kutokana
na hali hiyo, Serikali inaendelea kuimarisha utoaji wa huduma hiyo mijini na
vijijini. Pamoja na hayo, Serikali inatumia fedha nyingi ili kuwanusuru
wananchi wake kukabiliana na maradhi ya aina mbali mbali ikiwemo maradhi ya
malaria pamoja na maradhi mengine yasiyoambukiza, kama vile sukari. pressure na
kadhalika.
Mheshimiwa Spika, kinachosikitisha ni kuona baadhi ya wananchi wanakataa kupigiwa dawa
za mbu na vidudu vingine vinavyoweza kusababisha maradhi na wataalamu wetu.
Ninawaomba wananchi waachane na tabia hizo pamoja na imani walizonazo juu ya
dawa hizo. Serikali inawajali na inatambua umuhimu wa kazi hiyo kwa mustakabali
wa watu wake na haipo tayari kuona jamii inakumbwa na matatizo. Ninawaomba
Wajumbe wa Baraza lako Tukufu wawasimamie wananchi katika majimbo yao ili
wakubali nyumba zao kupigiwa dawa na kujiepusha na maradhi yanayosababishwa na
mbu.
Mheshimiwa Spika, katika kuimarisha makaazi na kuweka mandhari
nzuri ya Mji wetu wa Zanzibar, Serikali kupitia Mfuko wa Hifadhi ya Jamii -
Zanzibar inaendelea na ujenzi wa nyumba za makaazi katika eneo la Mbweni
Zanzibar ambao umeanza mwezi Novemba, 2015.
Mradi huu utakuwa na majengo 18 na kila jengo litakuwa na ghorofa yenye
nyumba 14. Ifikapo mwishoni mwa mwezi wa Machi, mwaka huu tunategemea
kukabidhiwa majengo matano (5) ambayo ni sawa na nyumba 70. Napenda kuchukua
nafasi hii kuwataka wananchi kujitokeza kununua au kukodi nyumba hizi za ZSSF
ambazo ni za bei nafuu.
Mheshimiwa Spika, Serikali imeanzisha Mamlaka ya Usimamizi wa Viwanda Vikubwa, vya Kati
na Vidogo vidogo ikiwa na madhumuni ya kukuza uchumi wa nchi, ajira na kuongeza
kipato cha mtu binafsi. Kwa muktadha huu, Serikali inawaomba na kuwataka
wawekezaji wa ndani na wa nje kuwekeza katika sekta hii muhimu ili kufikia
katika uchumi wa kati kupitia ujenzi wa viwanda. Viwanda vitasaidia sana uchumi wan chi na pia
vitasaidi upatikanaji wa ajira kwa vijana wetu.
Mheshimiwa Spika, katika kipindi kijacho tunategemea kupata mvua za masika ambazo zina
manufaa makubwa sana kwa nchi yetu. Nawaomba wakulima watumie vizuri mvua hizo
kwa kuotesha mazao ya chakula na biashara kwani ni njia moja muhimu sana ya
kuongeza vipato vyetu na kuondokana na umasikini. Hata hivyo, tunawasihi wale
ambao bado wanakaa katika njia za maji na mabondeni kuchukua tahadhari kubwa
sana juu ya ujio wa mvua hizo kwani nchi yetu ilikumbwa na majanga yatokanayo
na mvua yakiwemo mafuriko katika kipindi kilichopita. Mafuriko yaliyosababisha vifo na uharibifu wa
mali. Mamlaka husika zitaendelea kutoa
tahadhari na tunapaswa kuchukua hatua kukabiliana na hali hiyo.
Mheshimiwa Spika, katika mkutano wetu huu
wa Tisa jumla ya Maswali ya Msingi 74 na Maswali ya Nyongeza ….. yaliulizwa na
yalijibiwa na Waheshimiwa Mawaziri.
Mkutano wetu pia, umejadili kwa kina miswada mitatu muhimu ambayo ni:
i) Mswada wa Sheria ya kufuta Sheria ya Kusimamia mwenendo
wa Biashara na kumlinda mtumiaji
ya Zanzibar Nam. 2 ya Mwaka 1995 na Kutunga Sheria
Mpya ya Ushindani Halali wa Biashara
na Kumlinda Mtumiaji, Kuweka Masharti Bora zaidi pamoja na Mambo Mengine Yanayohusiana na Hayo;
ii) Mswada wa Sheria ya kufuta Sheria ya
Adhabu na kutunga Sheria Mpya ya Adhabu,
Kuweka Masharti Bora zaidi
pamoja na Mambo Mengine Yanayohusiana
na Hayo; na
iii) Mswada wa Sheria ya kufuta Sheria ya Mwenendo
wa Jinai Nam. 7 ya mwaka 2004 na kutunga Sheria
Mpya ya Mwenendo wa Jinai na Kuweka Utaratibu Bora wa Upelelezi wa Makosa ya
Jinai na Usikilizaji wa Kesi za za Jinai na Mambo Mengine Yanayohusiana na Hayo.
Mheshimiwa Spika,
Miswada yote hii
ilichangiwa kwa kina na sasa tayari tumeshaipitisha kuwa sheria ambazo
zitatuwekea utaratibu ulio bora zaidi wa kushughulikia kero za wananchi wetu
katika maeneo ya biashara na utoaji wa haki.
Kwa kuwa Miswada hii ilijadiliwa vya kutosha sina haja ya kuongeza jambo
lolote. Hata hivyo, napenda mtambue
kwamba, sheria hizi hazitafanya kazi vizuri kama hazitotungiwa kanuni baada ya
kupitishwa kama tulivyokumbushwa na Mheshimiwa Mwenyekiti wa Kamati ya Kanuni
na Sheria Ndogo Ndogo, na kusisitizwa na Waheshimiwa Wajumbe wa Baraza hili
Tukufu. Hivyo, nawasihi Mawaziri wote
ambao bado hawajazitungia kanuni sheria zinazohusu Sekta zao wafanye hivyo mara
moja.
Mheshimiwa Spika, kadhalika mkutano wetu
ulipokea na kujadili Ripoti za Kamati za Kudumu za Baraza letu ambazo ni:-
1.
Ripoti ya Kamati ya Kusimamia Ofisi za Viongozi Wakuu wa Kitaifa ya Mwaka
2017/2018.
2.
Ripoti ya Kamati ya Sheria,
Utawala Bora na Idara Maalum ya Mwaka 2017/2018.
3.
Ripoti ya Kamati ya Fedha, Biashara na Kilimo ya Mwaka 2017/2018.
4.
Ripoti ya Kamati ya Maendeleo ya Wanawake, Habari na Utalii ya Mwaka
2017/2018.
5.
Ripoti ya Kamati ya Ustawi wa Jamii ya Mwaka 2017/2018.
6.
Ripoti ya Kamati ya Ardhi na Mawasiliano ya Mwaka 2017/2018.
7.
Ripoti ya Kamati ya Kuchunguza na Kudhibiti Hesabu za Serikali (PAC) ya
Mwaka 2017/2018 na
8.
Ripoti ya Kamati ya Bajeti ya Mwaka 2017/2018.
Mheshimiwa Spika, vile vile Baraza lako Tukufu lilipokea na
kujadili Ripoti ya Serikali kuhusu hoja binafsi ya Mjumbe kuhusu kuweka
miundombinu bora kwa watu wenye Ulemavu katika majengo, barabara, makaazi,
maeneo ya kupumzikia na maeneo mengine; Ripoti ya Serikali kuhusu maombi ya
wananchi wa Kisakasaka Zanzibar kuhusu namna wanavyoweza kufaidika kutokana na
machinjio ya wanyama yaliopo kwenye maeneo yao; pamoja na Ripoti ya Mapendekezo
ya Muelekeo wa Mpango wa Taifa.
Mheshimiwa Spika,
baada ya kutoa maelezo ya
jumla kuhusu ripoti zilizotolewa naomba uniruhusu kuzungumzia kidogo Ripoti ya
Kamati ya Kuchunguza na Kudhibiti Hesabu za Serikali na Mashirika ya Umma
(PAC).
Serikali
inaelewa wazi kuwa heshima yake mbele ya macho ya wananchi wake inategemea kwa
kiasi kikubwa jinsi tunavyoshughulikia wabadhirifu wa mali ya umma. Bila shaka,
Serikali yetu haitaifumbia macho Ripoti ya Kamati ya Kuchunguza na Kudhibiti
Hesabu za Serikali na Mashirika ya Umma (PAC). Watumishi wote walioguswa na
ripoti hii watachukuliwa hatua kwa mujibu wa sheria zetu. Serikali imekuwa
ikifanya hivyo na itaendelea kufanya hivyo bila ya kumuonea mtu.
Mheshimiwa Spika, Ripoti zote hizi kwa
jumla zinaonyesha umahiri na kiu ya maendeleo waliyokuwa nayo Wajumbe wako ya
kuitaka nchi yetu iondoke hapa ilipo na ielekee kwenye maendeleo makubwa zaidi
yanayojali maslahi ya wengi. Napenda
kuwaahidi Waheshimiwa Wajumbe wa Baraza lako Tukufu pamoja na wananchi kuwa,
mapendekezo ya Waheshimiwa Wajumbe waliyoyatoa katika ripoti zote hizo yatafanyiwa
kazi ipasavyo.
Mheshimiwa Spika, Napenda kuwashukuru
Waheshimiwa Mawaziri na Naibu Mawaziri kwa umakini wao wa kuyatolea ufafanuzi
wa kina maswali yote yaliyoulizwa. Nawaomba tuendelee kwa bidii kutekeleza na
kusimamia kazi zetu ili kuwaletea maendeleo endelevu wananchi wetu.
Mheshimiwa Spika, Kwa mara nyengine tena
napenda kukupongeza wewe Mheshimiwa Spika, Mheshimiwa Naibu Spika pamoja na
Wenyeviti kwa kuliendesha vyema Baraza hili. Hekima na busara zenu zimesaidia
sana katika kuumaliza mkutano huu salama. Aidha, kuwashukuru Waheshimiwa
Wajumbe wote kwa kushiriki kikamilifu na kutoa michango na mapendekezo ya
kuimarisha utendaji wa Serikali. Nawaomba muendelee na moyo wa kuijali Serikali
na wananchi wake.
Mheshimiwa Spika, naomba kumalizia hotuba yangu kwa
kuwashukuru wananchi wote kwa kuendelea kuchapa kazi na kushirikiana na
Serikali yao katika maendeleo ya kila siku. Kwa mara nyengine tena napenda
kuvishukuru vyombo vyetu vya habari vyote vyote vya Serikali na binafsi, pamoja
na Wakalimani wetu wa lugha za alama kwa kazi zao nzuri za kuwajuvya wananchi
wetu mambo yanayoendelea kwenye Baraza letu Tukufu.
Mheshimiwa Spika, mwisho napenda kuwaombea Waheshimiwa
Wajumbe safari njema ya kurejea kwenye vituo vyao salama ili wakawatumikie
wananchi wao na kuwaletea maendeleo.
Mheshimiwa Spika, Baada ya kuyasema hayo, sasa naomba kuchukua
fursa hii kutoa hoja kwamba Baraza lako Tukufu liahirishwe hadi siku ya
Jumatano tarehe 9 Mei, 2018 saa 3.00 barabara
za asubuhi Mwenyezi Mungu akitujaalia.
Mheshimiwa Spika, naomba kutoa hoja.
.jpg)
No comments:
Post a Comment