TANZANIA, AUSTRIA KUSHIRIKIANA ELIMU YA UFUNDI, UTALII, BIASHARA NA UWEKEZAJI

Waziri wa Maliasili na Utalii, Mhe. Angellah Kairuki ameongoza ujumbe wa Serikali ya Jamhuri ya Muungano wa Tanzania katika kikao maalum na ujumbe kutoka Serikali ya Austria ulioongozwa na Waziri wa Kazi na Uchumi kutoka Serikali ya Austria kujadiliana ushirikiano katika elimu ya ufundi, utalii, biashara na uwekezaji,leo Oktoba 25,2023 jijini Dar es Salaam.

Serikali ya Jamhuri ya Muungano wa Tanzania pamoja na Serikali ya Jamhuri ya Austria zimekubaliana kuimarisha sekta za elimu ya ufundi pamoja na utalii.

Makubaliano hayo yameafikiwa katika Mkutano wa Waziri wa Maliasili na Utalii, Mhe. Angelah Kairuki (Mb) na Waziri wa Kazi na Uchumi wa Austria, Mhe. Prof. Martin Kocher walipokutana katika Ofisi Ndogo za Wizara ya Mambo ya Nje na Ushirikiano wa Afrika Mashariki, Jijini Dar es Salaam.

Waziri Kairuki amesema kuwa wamekubaliana kushirikiana katika masuala ya kilimo, elimu ya ufundi ambapo Tanzania kwa sasa msukumo wake ni elimu ya ufundi na tayari serikali imeanza kuboresha sera ya elimu na mitaala ya elimu.

“Austria wameonesha nia ya kushirikiana na Tanzania katika masuala ya tasnia ya ukarimu na utalii, wenzetu kwa mwaka wanapata watalii takriban milioni 40 na wamepiga hatua kubwa, nimefurahishwa pia kuona katika ujumbe alioambatana nao Prof. Kocher kuna wafanyabiashara na wawekezaji ambao wameonesha nia ya kuwekeza katika maeneo mbalimbali ya utalii, uwekezaji wa hoteli na mnyororo mzima wa thamani katika sekta ya utalii alisema Waziri Kairuki.

Waziri Kairuki aliongeza kuwa pamoja na mambo mengine, wamekubaliana kushirikiana katika sekta za afya, pamoja na sekta binafsi nchini kwa kuwa mazingira ya biashara na uwekezaji ni salama na rafiki.

Naye Waziri wa Kazi na Uchumi wa Austria, Mhe. Prof. Martin Kocher amesema Austria itaendeleaa kushirikiana na Tanzania katika sekta mbalimbali hususan miundombinu, kilimo, usindikaji wa chakula, elimu ya ufundi, afya, ajira/kazi, nishati pamoja na utalii kwa maslahi ya pande zote mbili.

“Tanzania kufungua Ubalozi wake nchini Austria, umetuwezesha kushirikiana katika sekta mbalimbali mathalan sekta ya elimu ya ufundi pamoja na utalii,” alisema Prof. Kocher

Prof. Kocher aliongeza kuwa asilimia 40 ya vijana nchini Austria wamekuwa wakipatiwa elimu ya ufundi katika fani tofautitofauti, hivyo Austria inaamini kuwa endapo watashirikiana na Tanzania kuwapatia vijana elimu ya ufundi itasaidia kuwawezesha kupata fani mbalimbali zitakazo wasaidia kujenga Maisha yao na kuinua uchumi wa taifa kwa ujumla.

Akiongelea kuhusu sekta ya utalii, Prof. Kocher amesema kuwa Austria itaendelea kushirikiana na Tanzania kuhakikisha kuwa Austria na Tanzania zinakuwa na utalii endelevu pamoja na kuhakikisha kuwa mataifa hayo yanakuwa na vivutio bora vya utalii kwa miongo ijayo.

Pamoja na mambo mengine, mazungumzo ya viongozi hao yalijikita katika kuimarisha ushirikiano baina ya Tanzania na Austria kwa manufaa ya pande zote mbili.

Mhe. Waziri Kocher yupo nchini Tanzania kwa ziara yake ya kikazi ya siku moja na ameambatana na ujumbe wa wawekezaji 20 kutoka Austria wanaolenga kuwekeza nchini Tanzania katika sekta za utalii, afya, nishati, elimu, ujenzi na miundombinu.

Waziri wa Maliasili na Utalii, Mhe. Angellah Kairuki akizungumza katika kikao kati ya Serikali ya Tanzania na  Serikali ya Austria kujadiliana kuhusu ushirikiano katika elimu ya ufundi, utalii, biashara na uwekezaji kilichofanyika leo Oktoba 25,2023 jijini Dar es Salaam.

Waziri wa Kazi na Uchumi wa Austria, Mhe. Prof. Martin Kocher akizungumza namna Austria inavyoweza kushirikiana na Tanzania katika elimu, utalii, biashara na uwekezaji kwenye kikao kilichofanyika katika Ofisi Ndogo za Wizara ya Mambo ya Nje na Ushirikiano wa Afrika Mashariki, Jijini Dar es Salaam.

Waziri wa Maliasili na Utalii, Mhe. Angellah Kairuki (Mb) akizungumza katika kikao kati ya Serikali ya Tanzania na  Serikali ya Austria kujadiliana kuhusu ushirikiano katika elimu ya ufundi, utalii, biashara na uwekezaji kilichofanyika leo Oktoba 25,2023 jijini Dar es Salaam. Wengine  ni Katibu Mkuu, Ofisi ya Rais, Mipango na Uwekezaji, Dkt. Tausi Kida (kushoto), Mkurugenzi wa Idara ya Amerika na Ulaya, Wizara ya Mambo ya Nje na Ushirikiano wa Afrika Mashariki, Balozi Swahiba Mndeme (wa pili kutoka kulia) na Mkurugenzi Mtendaji wa Bodi ya Utalii Tanzania, Damas Mfugale (kulia).

Sehemu ya Ujumbe kutoka Serikali ya Jamhuri ya Austria iliyoshiriki kikao cha ushirikiano kati ya Serikali ya Tanzania na Serikali ya Austria kilichofanyika katika Ofisi Ndogo za Wizara ya Mambo ya Nje na Ushirikiano wa Afrika Mashariki, Jijini Dar es Salaam.

Waziri wa Maliasili na Utalii, Mhe. Angellah Kairuki (Mb) akimkabidhi zawadi ya picha ya Mlima Kilimanjaro Waziri wa Kazi na Uchumi wa Austria, Mhe. Prof. Martin Kocher mara baada ya kikao katika ya Serikali ya Tanzania na Austria kilichofanyika katika Ofisi Ndogo za Wizara ya Mambo ya Nje na Ushirikiano wa Afrika Mashariki, Jijini Dar es Salaam.

Waziri wa Maliasili na Utalii, Mhe. Angellah Kairuki (Mb) akimpongeza Waziri wa Kazi na Uchumi wa Austria, Mhe. Prof. Martin Kocher mara baada ya kikao katika ya Serikali ya Tanzania na Austria kilichofanyika katika Ofisi Ndogo za Wizara ya Mambo ya Nje na Ushirikiano wa Afrika Mashariki, Jijini Dar es Salaam.