Waziri Mkuu Amefunga Kongamano la Saba la Uwezeshaji Wananchi Kiuchumi

 

Waziri Mkuu akikata utepe kuzindua Taarifa  ya Mwaka  Utekelezaji  wa Sera ya Uwezeshaji Wananchi Kiuchumi  wakati alipofungua  Kongamano la Saba la Uwezeshaji Wananchi Kiuchumi katika ukumbi wa Mikutano wa Jakaya Kikwete jijini Dodoma, Oktoba 2, 2023.  Wa  pili kulia ni Waziri wa Nchi Ofisi ya Waziri Mkuu, Sera, Bunge na Uratibu, Jenista Mhagama, kushoto ni Katibu Mtendaji wa Baraza la Taifa la Uwezeshaji Wananchi Kiuchumi, Beng'i Issa na kulia ni Mwenyekiti wa  Baraza hilo, Profesa Aurelia Kamuzora.

Waziri Mkuu akionesha nakala za  Taarifa  ya Mwaka ya Utekeleza wa Sera ya Uwezeshaji Wananchi   Kiuchumi  wakati alipofungua  Kongamano la Saba la Uwezeshaji Wananchi Kiuchumi katika ukumbi wa Mikutano wa Jakaya Kikwete jijini Dodoma, Oktoba 2, 2023.  Wa  pili kulia ni Waziri wa Nchi Ofisi ya Waziri Mkuu, Sera, Bunge na Uratibu, Jenista Mhagama, Kushoto ni Katibu Mtendaji wa Baraza la Taifa la Uwezeshaji Wananchi Kiuchumi, Beng'i Issa na kulia ni Mwenyekiti wa  Baraza hilo, Profesa Aurelia Kamuzora.

Baadhi ya Wakuu wa Mikoa wakishirki kuimba Wimbo wa Taifa  wakati Waziri Mkuu, Kasim Majaliwa alipowasili kwenye Ukumbi wa Mikutano wa Jakaya Kikwete jijini Dodoma kufunga  Kongamano la Saba la Uwezeshaji Wananchi Kiuchumi.

Waziri Mkuu, Kassim Majaliwa akizungumza wakati alipofunga Kongamano la Saba la Uwezeshaji Wananchi Kiuchumi katika ukumbi wa Mikutano wa Jakaya Kikwete jijini Dodoma, Oktoba 2, 2023. (Picha na Ofisi ya Waziri Mkuu)

WAZIRI MKUU Kassim Majaliwa ametoa miezi mitatu kwa Wakuu wa Mikoa yote nchini ambao bado hawajaanzisha vituo vya uwezeshaji wananchi kiuchumi kama ilivyoelekezwa katika Ilani ya Uchaguzi ya mwaka 2020/2025 wawe wameshaanzisha kabla ya mwaka 2024.

Pia, Mheshimiwa Majaliwa amewataka Viongozi na Watendaji Wakuu wa Taasisi za Umma na Sekta Binafsi waimarishe huduma za uwezeshaji ili waweze kuyafikia malengo waliojiwekea na kutimiza dhamira ya Mheshimiwa Rais  Dkt. Samia Suluhu Hassan katika kukuza uwezeshaji na kupunguza umaskini nchini.

 

Waziri Mkuu ametoa maagizo hayo leo (Jumatatu, Oktoba 2, 2023) wakati akifunga Kongamano la Saba la Uwezeshaji Kiuchumi katika ukumbi wa Mikutano wa Jakaya Kikwete jijini Dodoma. “Suala la kuanzisha vituo vya uwezeshaji ni maelekezo ya Ilani ya Chama cha Mapinduzi (CCM) ya mwaka 2020/2025 katika Ibara ya 26 (k) na hili ni jukumu letu viongozi kuhakiksha ilani inatekelezwa.”

 

Aidha, Mheshimiwa Majaliwa ametumia fursa hiyo kuwaagiza viongozi wa mikoa na halmashauri zote nchini wahakikishe wanaimarisha Majukwaa ya Uwezeshaji Wanawake Kiuchumi ili kuwawezesha kushiriki kikamilifu katika shughuli za kiuchumi ambazo zitawaongezea kipato.

 

“Katika hili ninawapongeza Mkoa wa Dodoma kwa kuwezesha Jukwaa la Mkoa kuanzisha SACCOs 76 za wanawake  zenye wanachama 322 pamoja na Halmashauri ya Ushetu ambayo imeanzisha Jukwaa linaloendesha Mradi wa Kampuni ya Usafi wa Mazingira na usindikaji wa mboga za majani maarufu kwa jina la Nsansa.”

 

Awali, Katibu Mtendaji wa Baraza la Taifa la Uwezeshaji Wananchi Kiuchumi (NEEC), Beng'i Issa alisema kongamano hilo linalenga kuongeza ufahamu wa wadau mbalimbali kuhusu dhana ya uwezeshaji wananchi kiuchumi na kuwakumbusha majukumu waliyonayo katika kuwawezesha Watanzania.

 

Alisema malengo mengine ni pamoja na wadau kupeana uzoefu katika kutekeleza shughuli za uwezeshaji wananchi kiuchumi, kuzindua taarifa ya mwaka 2022/2023 ya utekelezaji wa Sera ya Taifa ya Uwezeshaji Wananchi Kiuchumi ya mwaka 2004 ambayo pia imejumuisha masuala ya ushiriki wa Watanzania katika miradi ya kimkakati na uwekezaji unaofanyika nchini.

 

Katibu Mtendaji huyo alitaja kaulimbiu ya kongamano hilo kuwa ni  “Uwezeshaji kwa Uchumi Endelevu”. “Kaulimbiu hii inaendana na azma ya Serikali ya awamu ya sita ya kuhakikisha watanzania wanawezeshwa kushiriki kikamilifu katika uchumi wa nchi ili kuweza kutimiza malengo ya Dira ya Taifa ya Maendeleo 2025.”

 

Aliongeza kuwa katika kipindi cha mwaka 2022/ 2023, mifuko na programu za uwezeshaji ilifanikiwa kutoa mikopo yenye thamani ya shilingi bilioni 743.7 kwa wanufaika wapatao 6,064,957 ambapo miongoni mwao wanaume ni asilimia 46 na wanawake asilimia 54.

 

 (mwisho)

IMETOLEWA NA:

OFISI YA WAZIRI MKUU,

JUMATATU, OKTOBA 2, 2023.