BOT YAAGIZWA KUONGEZA UDHIBITI WA MIKOPO UMIZA

Naibu Waziri wa Fedha, Mhe. Laurent Deogratius Luswetula (Mb) akiiagiza Benki Kuu ya Tanzania (BoT) kuendelea kuongeza udhibiti wa mikopo yenye riba kubwa (mikopo umiza) wakati akijibu swali la Mbunge wa Viti Maalum, Mhe. Mhe. Dkt. Neema Peter Majule, aliyetaka kufahamu Serikali imechukua hatua gani kwa watu ambao wamejinufaisha kwa mikopo yenye riba kubwa, bungeni jijini Dodoma.

(Picha na Kitengo cha Mawasiliano Serikalini, 

Wizara ya Fedha)

Na. Peter Haule, WF, Dodoma.

Naibu Waziri wa Fedha, Mhe. Laurent Deogratius Luswetula 

(Mb) ameiagiza Benki Kuu ya Tanzania (BoT) kuendelea 

kuongeza udhibiti wa mikopo yenye riba kubwa (mikopo 

umiza) ili wananchi wapate mikopo yenye tija.

 

Ametoa maagizo hayo  bungeni jijini Dodoma, wakati akijibu 

swali la nyongeza la Mbunge wa Viti Maalumu, Mhe. Dkt. 

Neema Peter Majule, aliyetaka kufahamu hatua 

zilizochukuliwa na Serikali kwa watu wanaojinufaisha kwa 

kutoza riba kubwa kwenye mikopo, hatua inayopunguza 

jitihada za Serikali za kuwakwamua wananchi kiuchumi 

hususani wanawake na vijana.

 

Mhe. Luswetula alisema kuwa Serikali imeanza kuchukua 

hatua kwa wote wanaokiuka taratibu zilizowekwa na Serikali 

za utoaji mikopo kwa kusitisha leseni zao na hatua nyingine za 

kisheria.

 

“Wizara ya Fedha imejipanga kuhakikisha taasisi zote 

zinazotoa mikopo zinafuata taratibu na tayari Serikali 

imeandaa rasimu ya kusimamia mikopo ya kidigitali 

inayotarajiwa kuanza kutekelezwa Mwaka wa Fedha 

2026/2027”, alisema Mhe. Luswetula.

 

Akijibu swali la msingi kuhusu hatua zilizochukuliwa kudhibiti 

mikopo hatarishi inayotolewa na baadhi ya taasisi zisizo 

rasmi, Mhe. Luswetula alisema kuwa Serikali, BoT na wadau 

wengine, imechukua hatua mbalimbali za kudhibiti mikopo 

hatarishi yenye riba kubwa kwa kuendelea kutoa elimu kwa 

wananchi.

 

Alisema kuwa mikopo inapaswa kutolewa na watoa huduma 

wenye leseni kutoka BoT kwa mujibu wa Sheria ya Benki na 

Taasisi za Fedha ya Mwaka, 2006 pamoja na Sheria ya 

Huduma Ndogo za Fedha ya Mwaka, 2018.

 

Hatua nyingine iliyochukuliwa ni pamoja na kuwatambua na 

kuchukua hatua za kiutawala dhidi ya watoa mikopo 

wasioidhinishwa ambapo programu 69 za mikopo ya kidigitali 

zilizobainika kutoa mikopo bila leseni zilisitishwa na 

programu 126 zilifungiwa.

 

Vilevile kutoa Mwongozo maalum kwa watoa huduma za 

mikopo ya kidigitali ili kuhakikisha uwazi, uendeshaji wa 

kimaadili, utoaji wa taarifa kamili kuhusu gharama za mikopo 

pamoja na ulinzi wa watumiaji wa huduma za kifedha.

 

Mhe. Luswetula alilitaja eneo lingine kuwa ni pamoja na 

kuandaa rasimu ya kanuni za kusimamia mikopo ya kidigitali, 

ambazo zinatarajiwa kuanza mwaka wa fedha 2026/27 

ambapo Kanuni hizo zinalenga kuimarisha udhibiti wa 

wakopeshaji wa kidijitali nchini Tanzania.

 

Aidha, Mhe. Luswetula alisema kuwa Serikali kupitia Wizara 

ya Fedha, imekuja na programu ya elimu ya fedha ya mwaka 

2020/2021 hadi 2025/2026 ikiwa ni mpango maalum wa 

kutoa elimu kwa wananchi kwa makundi yote ambayo 

inalenga kuwawezesha wananchi kupata uelewa, maarifa na 

kuwajengea maarifa ya kusimamia mapato na matumizi na 

kufanya maamuzi sahihi katika kutumia huduma rasmi za 

kifedha.

Alisema kuwa Wizara ya Fedha kila mwaka 

imekuwa ikiadhimisha Wiki ya Huduma ya Fedha Kitaifa 

kuanzia mwaka 2021 na mwaka huu yamefanyika Jijini Tanga 

kuanzia Januari 21, lengo likiwa wananchi kupata elimu ya 

fedha.

 

Mhe. Luswetula alisema miongoni mwa Mikoa ambayo 

maadhimisho hayo yamefanyika kuanzia mwaka 2021 ni 

pamoja na Dar es Salaam, Arusha, Mwanza, Mbeya na sasa 

Tanga.

 

Hadi sasa takribani mikoa 16 imefikiwa na huduma ya elimu 

ya Fedha na zaidi ya wananchi 64,000 wamefikiwa ikiwa ni 

pamoja na wanawake 40,000 na wanaume 24,000 na  

Halmashauri 94.

 

Mwisho.