Akilimali wa Yanga Matatani

Ni baada ya kumtaja ‘mchawi’ anayemzuia Maximo

Apewa siku saba kuthibitisha tuhuma hizo au…

Na Mwandishi Wetu, Dar es Salaam

KATIBU wa Baraza la Wazee wa klabu ya Yanga Ibrahim Akilimali, ameingia matatani kufuatia shutuma alizotoa dhidi ya mwana blogu Shafii Dauda, kwamba ndiye anayetia fitina ili Marcio Maximo asije nchini kuifundisha timu hiyo.

Akilimali aliitisha mkutano na waandishi wa habari Jumatatu Juni 18 mchana kwenye makao makuu ya Yanga mtaa wa Jangwani jijini Dar es Salaam, ambapo pamoja na mambo mengine, alimshutumu Dauda kwamba amekuwa akiwasiliana na Maximo na kuichongea klabu hiyo.

Kupitia mkutano huo, mzee Akilimali alinukuliwa akisema kwamba yeye (Shaffii Dauda), ndiye kikwazo cha ujio wa kocha wa kimataifa wa Brazil, Marcio Maximo ambaye  Yanga inataka kumleta nchini.

Akilimali aliweka wazi kuwa Dauda amekuwa akiwasiliana na Maximo, na kumwambia mambo mengi ya uongo kuhusu Yanga ili aweze kutimiza lengo lake la kumuona kocha huyo hatii mguu klabuni humo. 

Aidha amenukuliwa akisema kwamba Dauda amekuwa akimtumia ujumbe mfupi wa simu, barua pepe na kumpigia simu Marcio Maximo kumwambia asiende Yanga kwa kuwa timu hiyo ni maskini na ina madeni.

Katika maelezo yake, Akilimali pia amesema,  Maximo amewatumia ujumbe viongozi wa Yanga akiwaambia kuwa, Dauda anamsumbua sana juu ya suala hilo hivyo sasa anaogopa hata  kupokea simu kutoka Tanzania kutokana na  usumbufu wa mwandishi huyo.

Akizungumzia kadhia hiyo, Dauda amesema, akiwa na akili timamu na kukiwa na uhakika kuwa hakulazimishwa na mtu, mzee Akilimali alimtupia shutuma nzito ambazo anadiriki kuziita za uongo ambazo zinaweza au zimeshafanikiwa kuharibu jina lake kama mwandishi wa habari pia binadamu wa kawaida.

Dauda amefahamisha kuwa, kauli za Katibu huyo zimelenga kumharibia sifa yake nzuri aliyojijengea kwa kutumia nguvu na kufanya vizuri kazi yake.

Amesema kuwa, kamwe hawezi kuzinyamazia tuhuma hizo nzito na chafu dhidi yake, na kuziacha zipite hivi hivi, na ndio maana ameona vyema azilitolee majibu. 

Amedai kuwa tuhuma hizo sio tu zinaweza kumchafua, bali pia zinamgombanisha na mamilioni ya wapenzi na wanachama ya klabu ya Yanga pamoja na wapenzi wote wenye kupenda maendeleo ya mchezo wa soka hapa nchini.

Amesema yeye na wanamichezo wengine, wamekuwa mstari wa mbele kupigania maendeleo ya michezo hapa nchini hususan soka, hivyo kwao, ujio wa Maximo wanauona ungeweza kuisaidia klabu hiyo pamoja na nchi kwa ujumla. 

Amempa mzee huyo siku saba kuthibitisha madai hayo kwa ushahidi wa vielelezo ambavyo amedai anavyo, na iwapo atashindwa, itabidi aitishe tena mkutano wa waandishi wa habari kama alivyofanya awali, ili akanushe aliyoyasema na kumuomba radhi la sivyo sheria itachukua mkondo wake.