Sheria ya Uvuvi Huenda Ikafanyiwa Marekebisho

Faki Mjaka-Maelezo Zanzibar 03/07/2012

Waziri wa Mifugo na Uvuvi Zanzibar Abdillah Jihad Hassan amesema Serikali  ilipitisha Sheria ya uvuvi ya mwaka 2010 kwa nia njema na siyo kuwakwaza wavuvi lakini kama kuna haja ya kufanyiwa marekebisho Serikali itakaa na kufikiria cha kufanya.

Hayo yamesemwa na Waziri huyo wakati alipokuwa akimuwakilisha Makamu wa Pili wa Rais Balozi Seif Ali Idd katika mkutano wa Jumuiya ya Maendeleo ya Wavuvi wa Kojani KOFDO uliofanyika Ukumbi wa Wizara ya Habari Kikwajuni Mjini Zanzibar.

Amesema yeye hakuwepo Barazani wakati wa kupitishwa sheria hiyo ila anaamini Serikali haina nia mbaya ya kuwakomoa wavuvi badala yake inakusudia kuwaendeleza wavuvi ili waendelee kufanya kazi zao kwa maslahi yao na taifa kwa ujumla.

Waziri Jihadi amewaahidi wanajumuiya hiyo kuwa mawazo ambayo wameyatoa katika mkutano huo atayawasilisha kwa Makamu wa Pili ili kufanyiwa kazi kama ambavyo wameyatoa.

Awali Mwenyekiti wa Jumuiya ya KOFDO Omar Mohammed wakati akisoma Risala ya jumuiya hiyo alisema Wavuvi wa Visiwa vya Zanzibar wamekuwa wakiandamwa na matatizo mengi ambayo yanafanywa na Idara ya Uvuvi ikiwemo utumiaji wa nguvu za ziada katika kupambana na wavuvi kwa madai ya uvuvi haramu.

Omar amedai kuwa nguvu hizo hazitumiki katika kuwaelimisha na kuwawezesha wavuvi kuvua uvuvi halali na kuachana na uvuvi haramu ambapo pia ameiomba Serikali kuwawezesha wavuvi jinsi ya kuvua katika bahari kuu.

Ameongezea kuwa kumekuwa na taarifa nyingi za kutolewa misaada mbali mbali kwa vikundi vya wavuvi wadogo wadogo Zanzibar lakini cha kusikitisha misaada hiyo haiwafikii wavuvi husika.

Aidha Omari amesisitiza umuhimu wa kujengewa Soko la kuuzia Samaki jumla na reja reja lenye hadhi sambamba na Serikali kufikiria kuanzisha Chuo cha Uvuvi Zanzibar.

Mkutano huo ambao ulihudhuriwa na Wanajumuiya hiyo ya KOFDO yenye maskani yake Mtoni Unguja ulihudhuriwa pia na wawakilishi wa wavuvi kutoka mikoa mitatu ya Unguja ambapo pia walielezea matatizo ambayo wanakumbana nayo katika kazi zao.

IMETOLEWA NA IDARA YA HABARI MAELEZO ZANZIBAR 03/07/2012