Zanzibar ina fursa kuwa eneo tengefu kiuchumi

Na Ramadhan Makame

WAZIRI wa Biashara Viwanda na Masoko, Nassor Ahmed Mazrui amesema utafiti wa kuigeuza Zanzibar kuwa eneo tengefu la kiuchumi ‘Special Economic Zone’ (SEZ), umekamilika na kubainisha maeneo yatakayoiwezesha kukua kiuwekezaji na kiviwanda.

Waziri huyo alieleza hayo jana katika ukumbi wa Baraza la Wawakilishi uliopo Mbweni nje kidogo ya mji wa Zanzibar alipokuwa akiwasilisha bajeti ya wizara hiyo.

Waziri huyo alisema utafiti huo umebaini kuwa ipo fursa ya Zanzibar kukua kiviwanda ambavyo vitazalisha bidhaa zitakazosafirishwa nje na kuweza kukuza uchumi wake.

Alifahamisha kuwa utafiti huo umebaianisha kuwa Zanzibar inayo fursa kuwa eneo muhimu la kusafirisha bidhaa za mazao ya kilimo, usafirishaji wa bidhaa zilizosarifiwa pamoja na kuwa eneo la usafirishaji wa bidhaa katika bandari.

Waziri huyo alisema mkakati wa kuifanya Zanzibar kuwa eneo tengefu la kiuchumi linahitaji kwenda sambamba na uwekaji wa miundombinu hasa katika bandari na viwanja vya ndege pamoja na kuwepo maeneo maalum kwa ajili ya uendelezaji mazao ya kilimo.

Akizungumzia kudorora kuimarika kwa sekta ya viwanda, waziri huyo alisema lipo tatizo la ukosefu wa mitaji kwa wazalishaji ikiwemo kukosekana kwa benki ya uwekezaji katika sekta ya viwanda.

Aidha sababu nyengine alisema ni pamoja na ukosefu wa miundombinu hasa ya maji na umeme wa uhakika katika maeno ya Fumba na Micheweni ambayo yametengwa kwa ajili ya uwekezaji.

Akielezea tatizo la wafanyabiashara wa Zanzibar kutozwa kodi mara mbili pale wanapopeleka bidhaa Tanzania bara, waziri huyo alisema suala hilo lilijadiliwa na kuchukuliwa hatua za kisera lakini bado tatizo hilo lipo.

Alifahamisha kuwa katika kulishughulia suala hilo ni vyema wafanyabishara wakawasilisha vielelezo vya kutozwa kodi ili iwe msingi wa kujenga hoja katika majadiliano ya kero za muungano.

Kuhusu mfumo wa bei alisema mwaka 2011 ulifikia 14.7 ambapo ulichangiwa zaidi na uwepo wa hali ya ushindani mdogo wa ndani na masoko ya nje kuyumbisha hali ya bei.

Waziri Mazrui alisema kuanzia Februari hadi mwezi Juni kulishuhudiwa wimbi la usafirishaji wa bidhaa za vyakula muhimu kutoka Zanzibar kupelekwa Dar es Salaam, ambapo hali hiyo inatokana wafanyabiashara hao kufuatia bei katika soko.

Hata hivyo alisema suala hilo limedhibitiwa kwa kuvitumia vyombo vya ulinzi na usalama kuzuia usafirishwaji wa vyakula nje ya Zanzibar pamoja na kutumia sheria kwa wale waliokamatwa wakisafirisha bidhaa hizo.

Akiwasilisha maoni ya kamati ya kamati ya Fedha Bishara na Kilimo, Makamu Mwenyekiti wa kamati hiyo Abdalla Mohammed Ali alisema jitihada kubwa zinahitajika kuchukuliwa ili Zanzibar iweze kusafirisha nje bidhaa.

Makamu huyo aliipongeza serikali kwa kuongeza bei ya karafuu hali iliyofana wakulimwa kuhamasika kuuza karafuu zao katika shirika la ZSTC.

Aidha kamati hiyo imeiomba serikali kuliangalia upya bei ya mwani kwani iko chini pamoja na kuishauri wizara hiyo kuwa makini suala la mfumko wa bei ambao umekuwa ukiathiri wananchi.

Aidha Makamu huyo aliitaka serikali itoa maelezo juu ya mgogro wa kiwanda cha sukari kilichopo Mahonda kwani kamati tatu zimeundwa lakini hakuna taarifa zozote.

Akichangia bajeti hiyo Mwakilishi wa jimbo la Magomeni, Salmin Awadh Salimin alisema sekta ya viwanda ndio roho ya uchumi wa nchi lakini suala la kuimarisha viwanda limekuwa nyimbo.

“Viwanda vilivyopo havijaweza kuchangia uchumi, naona bado tunaifanyia mzaha sekta hii, haijaonesha mchango wowote katika maendeleo ya uchumi”,alisema.

Naye Mwakilishi wa jimbo la Uzini, Mohammed Raza alimtaka waziri huyo asifumbie macho wala kulfanyia mzaha suala la kuingizwa vyakula vilivyomaliza muda wake.

Aidha Mwakilishi huyo alisema yupo tayari kutoa mkopo hata wa shilingi milioni 200 bila ya riba kwa wakulima, wafugaji na wafanyabishara ili waendeleze shughuli zao.

Naye Asha Bakari Makame alitaka kujua vikwazo vinavyochangia uwepo urasimu wa kupelekwa mchele kisiwani Pemba, pamoja na kutaka kujua sababu za kwanini ZSTC haijaundiwa bodi.

Aidha alimtaka waziri wa wizara hiyo kutoa sababu ya kutokufungwa kwa shirika la Magari ambalo badala ya kuuza linachuuza kutokana na kushindwa kujiendesha.

Waziri huyo aliomba kuidhinishiwa jumla ya shilingi milioni 5,580 kwa mwaka wa fedha 2012/2013 ikiwa ni kwa ajili ya kazi za kawaida na kazi za maendeleo.