Serikali yaelezea dhamira yake kuboresha huduma za Afya, Elimu, Maji safi na salama

 

SERIKALI ya Mapinduzi ya Zanzibar imeeleza dhamira yake ya kuboresha na kuendeleza huduma za jamii kwa wananchi wake ikiwemo kuimarisha huduma za Afya, Elimu, Maji Safi na Salama na kudumisha usafi wa mazingira.

Rais wa Zanzibar na Mwenyekiti wa Baraza la Mapinduzi, Dk. Hussein Ali Mwinyi aliyasema hayo Ikulu, Zanzibar alipozungumza na Mwakilishi Mkaazi Mpya wa Shirika la Umoja wa Mataifa la Kuhudumia Watoto (UNICEF)Bi.Elke Wisch aliyefika kujitambulisha.

Dk. Mwinyi, alisema jitihada za Serikali kuendelea kuboresha huduma za jamii ikiwemo miundombinu na rasilimali watu kwa kuwaendeleza wataalamu waliopo kwa ustawi wa huduma hizo.

Rais Dk. Mwinyi alisema Serikali pia inajivunia ushirikiano wake wa bega kwa bega na Wadau wa Maendelo wakiwemo UNICEF pamoja na kusifu kazi kubwa zinazofanywa na Shirika hilo katika miradi mbambali ya maendeleo iliyotekelezwa kuiunga mkono SMZ.

“UNICEF imefanya makubwa Tanzania hususani ushirikiano wa karibu na Wizara za SMZ inaungamkono jitihada za Serikali yetu kwenye masuala mbalimbali ya maendeleo” alisifu Rais Dk. Mwinyi.

Dk. Mwinyi alimweleza Mwakilishi huyo kwamba, daima Serikali ya Mapinduzi ya Zanzibar itaendelea kuishukuru UNICEF kwa kuiunga mkono Zanzibar kwenye masuala ya Afya na Elimu na yote yanayohusu ustawi wa watoto nchini.

Naye, Mwakilishi huyo wa UNICEF, Tanzania Elke Wisch alishukuru ushirikiano uliopo baina ya UNICEF na Serikali ya Mapinduzi ya Zanzibar hasa kwenye ustawi wa masuala ya watoto na kuahidi kuendeleza ushirikiano huo.

UNICEF ni Shirika la Umoja wa Mataifa (UN) lililoanzishwa mwaka 1946 jijini New York, Marekani, linashughulika na masuala ya Elimu na Watoto duniani, linafanyakazi kwenye maeneo zaidi ya 190 duniani kote, katika kuwafikia watoto na vijana walio kwenye matatizo kutokana na majanga mbalimbali kwa kuboresha chanjo kwa watoto na kutoa lishe bora katika kuimarisha huduma za dharura mbali na mambo mengine yanayowahusu watoto.

Mbali na mambo mengi UNICEF iliyofanya kwa Zanzibar kupitia miradi mbalimbali ya Afya na Elimu, Shirika hilo lilifanikiwa kwa asilimia 75 kuwarejesha skuli watoto wengi walioacha masomo kwa mazingira tofauti waliyokumbana nayo kwenye makuzi yao.

IDARA YA MAWASILIANO IKULU, ZANZIBAR.