Kikoao cha Baraza la Wawakilishi Kupitisha Miswaada Miwili

TANGAZO

Katika kikao cha Baraza la Wawakilishi kitakachofanyika Tarehe 22/10/2014, Baraza la Wawakilishi la Zanzibar linatarajia kupitisha Miswaada miwili ambayo ni; Mswaada wa Sheria ya Madaili ya Viongozi wa Umma na Kuanzisha Tume ya Maadili ya Viongozi na Mambo mengine yanayohusiana na hayo. 

Serikali imeamua kuwasilisha Mswada huu ambao utasimamia Maadili ya Viongozi wote hapa Zanzibar waliotajwa kwenye Jadweli la Mswada huu.

Katika  Mswaada huu Kiongozi yeyote wa Umma aliyetajwa katika Sheria atatakiwa ndani ya kipindi ambacho  kimeelezwa katika Mswaada huu kuwasilisha kwa Mwenyekiti tamko la mali kwa maandishi kuhusu mali zake anazomiliki na alizonazo wakala wake, madeni anayodaiwa pamoja na mali na madeni ya mwenza wake, watoto wake au watoto walio chini ya uangalizi wake.

Kwahivyo, Tume ambayo itaanzishwa kwa mujibu wa Mswaada huu itakuwa na majukumu mengi mbali mbali ikiwemo kupokea na kuhifadhi tamko la mali ambalo limetolewa na Kiongozi wa Umma chini ya Sheria hii, Kupokea tuhuma na taarifa za uvunjwaji wa maadili kutoka kwa wananchi, Kufanya uchunguzi juu ya madai au tuhuma za uvunjwaji wa maadili kwa kiongozi yeyote wa Umma.

Mswaada mwengine ni Mswada wa Sheria ya Kufuta Sheria ya Wauguzi na Wakunga (Uanzishwaji wa Baraza la Usajili wa Wauguzi na Wakunga) Nam. 9 ya mwaka 1986 na kuanzisha badala yake Sheria mpya ya Wauguzi na Wakunga na mambo yanayohusiana na hayo.

Madhumuni ya kutungwa sheria hii mpya ni kuleta pendekezo la kufuta Sheria ya Wauguzi na Wakunga, Sheria Namba 9 ya 1986 ambayo imeonekana kwamba imepitwa na wakati na kupendekeza kuanzishwa kwa Sheria mpya ya Wauguzi na Wakunga ambayo itaweza kusimamia vyema misingiya taaluma na maadili ya fani hii kuendana na mabadiliko ya nchi kisiasa, kijamii na kiuchumi. Aidha mswaada huu unakusudia kuanzisha Baraza la na Wakunga litakalokuwa na wajibu ya kusimamia fani ya wauguzi na wakunga. Miongoni mwa sababu za msingi zilizopelekea kufuta Sheria hiyo ni Mabadiliko ya Sera ya Afya; Mabadiliko ya ukuaji wa kiuchumi na kuongezeka mahitaji ya kijamii yanayotokana na ongezeko la watu na mabadiliko ya kimazingira; Kutanuka kwa taaluma ya Wauguzi na Wakunga katika taasisi binafsi na za serikali.  

 Kwahivyo tunakaribisha michango na maoni kwa wananchi wote katika miswaada hiyo na kwa mtu yeyote anaehitaji nakala ya Mswaada tunawakaribisha katika Ofisi zetu za Baraza la Wawakilishi zillizopo Chukwani kwa Unguja na kwa waliopo Pemba tunawakaribisha kwenye Ofisi yetu iliypo Wete  au unaweza kuupata kupitia kwenye mtandao wetu www.zanzibassemly.go.tz.

Mwisho wa kupokea maoni hayo ni Tarehe 12 – 10 – 2014.