Serikali kujenga maghala ya kisasa kuhifadhi chakula

 SERIKALI ya Mapinduzi ya Zanzibar kupitia Wizara ya Kilimo, Umwagiliaji, Maliasili na Mifugo imeanza kutekeleza mkakati wa kujenga maghala ya kisasa ya kuhifadhi chakula ili kuimarisha uhakika wa chakula na kukabiliana na athari za mabadiliko ya tabianchi na maafa.

Akizungumza wakati akiwasilisha mikakati ya kugharamia hatari za mabadiliko ya tabianchi, Kaimu Mkuu wa Idara ya Kilimo na Uhakika wa Chakula Pemba, Suleiman Atiki Suleiman, alisema ujenzi wa maghala hayo ni hatua ya kimkakati ya kuhakikisha jamii inakuwa salama hata pindi maafa yanapotokea.

Alisema serikali imeamua kuchukua tahadhari mapema kwa kuanzisha miundombinu ya kisasa ya kuhifadhi chakula ili kuondoa hatari ya upungufu wa chakula wakati wa dharura.

Alifafanua kuwa maghala hayo yatahifadhi zaidi vyakula vya nafaka vinavyotumiwa kwa wingi na wananchi wa Zanzibar, ikiwemo mpunga, mahindi, uwele na mtama.

Aidha, alisema mazao hayo hulimwa ndani ya Zanzibar, lakini endapo mavuno hayatokidhi mahitaji ya chakula na akiba, hulazimika kuagizwa kutoka nje ya visiwa hivyo ili kukidhi mahitaji ya wananchi.

Akitoa takwimu za maghala hayo, alisema Wilaya ya Mkoani kuna ghala moja lenye uwezo wa kuhifadhi tani 708.75 za chakula; Wilaya ya Chake Chake, eneo la Ole Dodeani, lina uwezo wa kuhifadhi tani 650; huku Wilaya ya Wete ikiwa na maghala matatu — la Weni lenye uwezo wa tani 560 na mawili ya Kizimbani yenye uwezo wa kuhifadhi tani 323.78 na 323.79 mtawalia.

Alieleza kuwa baadhi ya maghala hayo tayari yameanza kutumika, likiwemo la Ole Dodeani ambalo limejengwa kupitia Mradi wa Sumukuvu chini ya wizara hiyo.

Alibainisha kuwa endapo hakutatokea maafa yoyote, chakula hicho hakitaruhusiwa kukaa hadi kuharibika, bali serikali kwa kushirikiana na Wizara ya Biashara na Maendeleo ya Viwanda itauza kwa wafanyabiashara kwa kufuata taratibu zilizowekwa.

Alisema utaratibu huo utasaidia kuzungusha akiba ya chakula, kuepusha upotevu na kuimarisha soko la ndani la mazao ya wakulima.

Sambamba na hayo, alitoa wito kwa wakulima kuendelea kuimarisha kilimo cha nafaka ili kuongeza uzalishaji na kuwezesha maghala hayo kuwa na akiba ya kutosha wakati wote.