Waziri wa Mambo ya Nje wa Falme za Kiarabu Azungumza na Waandishi wa Habari Zanzibar Wakati wa Ziara Yake.

Waziri wa Nchi na Ushirikiano wa Kimataifa wa Muungano wa Falme za Kiarabu (UAE)Reem Ibrahim Alhashimy  akizungumza na Waandishi wa Habari baada ya kumaliza Mkutano   uliowakutanisha Viongozi wa Serikali ya Mapinduzi ya Zanzibar wakiongozwa na Waziri wa Nchi Ofisi ya Rais na Mwenyekiti wa Baraza la Mapinduzi Mhe,Issa Haji Ussi na  Ujumbe wa Wataalamu kutoka Nchi za Falme za Kiarabu kuhusiana na mambo mabalimbali  na sekta mbalimbali ambazo wanaweza kusaidia mkutano uliofanyika Hoteli ya Park Hyyat Shangani mjini Zanzibar.

Na Faki Mjaka-Maelezo Zanzibar

Serikali ya Falme za kiarabu (UAE) inatarajia kufungua 

Ubalozi wake mdogo Zanzibar kabla ya kumalizika Mwaka 

2018 ikiwa ni mwendelezo wa kuimarisha mahusiano ya 

kidugu katika nchi hizo.

Hayo yameelezwa na Waziri wa Nchi na Ushirikiano wa 

Kiamataifa wa UAE, Reem Ibrahim Alhashimy 

alipozungumza na Wanahabari mara baada ya kumalizika 

kwa mkutano wa majadiliano kati ya Viongozi wa Serikali ya 

Zanzibar na UAE ukumbi wa Hotel ya Park Hyyat Mjini 

Zanzibar.  

Amesema kufunguliwa kwa Ubalozi huo kutazidisha 

mashirikiano yaliyopo na kuongeza kasi ya utekelezaji wa 

yale yaliyokubaliwa baina ya nchi hizo mbili.

Waziri Reem amesema madhumuni ya kuja Zanzibar ni 

kuihakikishia Serikali na Wananchi wa Zanzibar kwamba 

UAE ipo tayari kutekeleza yale yaliyoahidiwa katika Ziara ya 

Dkt Shein iliyofanyika nchini humo mwanzoni mwa mwaka 

huu.

Amesema kwa muda mrefu Wananchi wa UEA wamekuwa 

wakitembelea Zanzibar na kuwekeza katika maeneo mbali 

mbali kutokana na mahusiano mema yaliyojengeka miaka 

mingi.

“Binafsi sio mara ya kwanza kuja Zanzibar nimekuwa 

nikitembelea kutokana na uzuri wa Zanzibar  na watu wake 

na hivyo kuna kila sababu ya kuendelea kushirikiana katika 

mambo yetu” alisema Reem

Sekta muhimu ambazo Serikali ya ya UAE imeonesha nia ya 

kuisaidia Zanzibar ni pamoja na Sekta ya Afya, Kilimo na 

Miundombinu.

Hata hivyo hakuainisha zaidi ni eneo gani kati ya Bandari na 

Uwanja wa ndege ambalo UAE wataweza kuisaidia Zanzibar.

Kwa upande wake Wanziri wa Nchi Ofisi ya Rais na 

Mwenyekiti wa Baraza la Mapinduzi Issa Haji Ussi Gavu 

amesema ziara hiyo imefungua matumaini makubwa kwa 

Zanzibar na kwamba itasaidia Zanzibar kujikwamua 

kiuchumi.

Amesema mbali na miradi iliyoombwa na Serikali ya 

Mapinduzi kwa UAE nchi hiyo pia ipo tayari kuisaidia 

Zanzibar katika miradi mingine ya ziada, ikiwemo uwezeshaji 

wa Vijana ili kukabiliana na tatizo la ajira.

Timu hiyo ya Wataalam iliwasili jana na kufanya Mikutano 

mbalimbali ya majadiliano na Viongozi wa Serikali ya 

Mapinduzi Zanzibar ikiwa ni utekelezaji wa ahadi 

mbalimbali zilizotolewa katika ziara ya Dkt. Shein 

aliyoifanya January mwaka huu katika Falme za Kiarabu.