Epiq BSS yaingia hatua za mwisho, mashabiki waombwa kupiga kura

 

Mshiriki Joshua Kahoza akiimba wakati wa mkutano na waandishi wa habari. Anayetazama kushoto ni Mtaalamu wa Huduma za Ziada wa Zantel, Cecil Muhina, na jaji mkuu wa Epiq BSS, Ritha Paulsen.

 

Jaji Mkuu wa Epiq BSS, Ritha Paulsen, akizungumza na waandishi wa habari leo kuhusiana na maenedeleo ya kipindi hicho. Kulia kwake ni Haji Yussuf, Meneja Huduma za ziada, na kushoto ni Mtaalamu wa huduma za ziada, Cecil Muhina.

 Mshiriki First Godfrey akiimba mbele ya waandishi wa habari. Anayetazama kushoto ni Mtaalamu wa Huduma za Ziada wa Zantel, Cecil Muhina, na jaji mkuu wa Epiq BSS, Ritha Paulsen, mwisho ni Haji Yussuf, Meneja Huduma za Ziada

Mshiriki Elizabeth Mwaakijambile akitoa burudani kwa waandishi wa habari leo. Anayetazama kushoto ni Mtaalamu wa Huduma za Ziada wa Zantel, Cecil Muhina, na jaji mkuu wa Epiq BSS, Ritha Paulsen.

Dar es Salaam, 7-10-2013: Shindano la kuimba la Epiq BSS limeingia hatua za mwisho wiki hii likiwa limebakiza washiriki kumi na mbili, kuelekea kumpata mshindi wa shilingi milioni hamsini pamoja na mkataba wa kurekodi.

Washiriki waliochaguliwa kwa usaili wa simu, nao waliungana na wenzao waliongia kumi bora wiki hii na konyesha uwezo mkubwa, hali inayoashiria kutakuwa na kazi kubwa kumchagua mshindi.

Washiriki waliobaki mpaka sasa na namba zao za ushiriki ni Amina Chibaba (03), Elizabeth Mwakijambile (08), Emmanuel Msuya (21), First Godfrey (11), Francis Flavian (09), Furaha Charles (14), Furaha Mkwama (06), Joshua Kahoza (02), Maina Thadei (5), Mandela Nicholas (10), Melisa John (22) na Raymond John (23).

Akizungumzia hatua ambayo shindano limefikia, jaji mkuu wa shidano hilo, Ritha Paulsen, aliwataka wananchi watumie vema nafasi ya kupiga kura kwa kuchagua washiriki wenye vipaji vikubwa.

‘Hatua hii ni muhimu sana, hasa kwa kuwa inalirudisha shindano kwa wananchi ili waweze kumchagua mshindi wao, hivyo nawaomba wawapigie kura kwa wingi’ alisema Ritha.

Akizungumzia ubora wa washiriki wa mwaka huu, Ritha alisema wamepata washiriki bora zaidi, na pia mafunzo wanayoyapata ndani ya jumba la Epiq BSS ni makubwa hivyo mashabiki watarajie mchuano mkubwa zaidi katika kuwania milioni hamsini.

Kwa upande wake Afsa Biashara Mkuu wa Zantel, Sajid Khan, amewataka wananchi wawapigie kura washiriki wanaoamini ni wazuri na watafanya vizuri kwenye soko.

‘Maana ya kufungua laini za watu kupiga kura mapema ni kuwapa nafasi ya kuchagua mshindi wanayempenda’ alisema Khan.

Kampuni ya Zantel pia imerahisisha namna ya upigaji kura kwa kutoa namba maalumu ya kupiga kura kwa kupiga simu namba 0901551000, na kwa njia ya ujumbe mfupi mashabiki wa Epiq BSS wataweza kuwapigia washiriki wanaowapenda kwa kuandika neno KURA, halafu waache nafasi, namba ya mshiriki halafu watume kwenda 15530.