Karafuu gunia 20 zilikamatwa magendo

NAIBU wa waziri wa Biashara, Viwanda na Masoko, Thuwaiba Edington Kisasi amesema gunia 20 za karafuu zenye uzito wa kilo 848 zilikamatwa zikitaka kusafisrishwa magendo nje ya Zanzibar katika msimu uliokwisha.

Naibu waziri alieleza hayo jana katika ukumbi wa Baraza la Wawakilishi alipokuwa akijibu suali la nyongeza la Mwakilishi wa Mtambile, Mohamed Haji Khalid aliyeuliza kiasi cha karafuu zilizokamatwa msimu uliopita zilizotaka kusafirishwa kwa magendo.

Alisema karafuu hizo kwanza zilikamatwa zikiwa kwenye vipolo ambapo vilikuwa 31 na zilisafishwa na baadae kupatikana gunia hizo ambapo kwa baada kupimwa zilikuwa na thamani ya zaidi ya shilingi milioni 12.7.

Naibu huyo alisema katika msimu uliokwisha karafu nyingi za magendo zilikamatwa katika mkoa wa Kaskazini Pemba.

Akizungumzia mgao wa fedha zitokanazo na ukamataji wa karafuu za magendo, Naibu huyo alisema mkoa uliohusika ukamatwaji wa karafuu hizo hupatiwa asilimia 50 ya maunzo.

Aidha alisema asilimia 20 ya mgao wa fedha zilizokamatwa kwa njia ya magendo hupelekwa kwa aliyetoa taarifa za magendo, huku asilimia 30 ikipelekwa kwa walioshiriki kukamatwa kwa karafuu hizo.

Alisema fedha hizo hutolewa kama kutoa motisha kwa waliokamata karafuu hizo.