Ufunguzi wa Msikiti Mkuu Paje Wilaya ya Kusini Unguja leo 12-5-2023

MUONEKANO wa Msikiti Mkuu wa Paje Wilaya ya Kusini Unguja uliofunguliwa leo 12-5-2023 na Rais wa Zanzibar na Mwenyekiti wa Baraza la Mapinduzi Alhajj Dk.Hussein Ali Mwinyi, na kujumuika na Wananchi wa Paje katika Ibada ya Sala ya Ijumaa iliyofanyika katika msikiti huo baada ya ufubguzi wake

RAIS wa Zanzibar na Mwenyekiti wa Baraza la Mapinduzi Alhajj Dk.Hussein Ali Mwinyi akiondoa pazia kuashiria uwekaji wa Jiwe la Msingi la Ufunguzi wa Msikiti Mkuu wa Paje Wilaya ya Kusini Unguja (kushoto) Mfadhili wa ujenzi wa Msikiti huu Dkt. Mahir Bakar,hafla hiyo ya ufunguzi wa msikiti huo uliyofanyika leo 12-5-2023 na kujumuika na Wananchi wa Paje katika Ibada ya Sala ya Ijumaa, baada ya ufunguzi wake

RAIS wa Zanzibar na Mwenyekiti wa Baraza la Mapinduzi Alhajj Dk.Hussein Ali Mwinyi akikata utepe kuufungua Msikiti Mkuu wa Paje Wilaya ya Kusini Unguja leo 12-5-2023, na (kulia kwa Rais) Mfadhili wa Ujenzi wa Msikiti huo Dkt. Mahir Bakar na Waziri wa Nchi Ofisi ya Rais Katiba,Sheria, Utumishi na Utawala Bora Zanzibar Mhe. Haroun Ali Suleiman na (kushoto kwa Rais) Mkuu wa Mkoa wa Kusini Unguja Mhe. Hadid Rashid Hadid

RAIS wa Zanzibar na Mwenyekiti wa Baraza la Mapinduzi Alhajj Dk.Hussein Ali Mwinyi akizungumza na kuwasalimia Wananchi wa Paje Wilaya ya Kusini Unguja baada ya kumalizika kwa Ibada ya Sala ya Ijumaa iliyofanyika katika Msikiti huo baada ya kufunguliwa leo 12-5-2023

RAIS wa Zanzibar na Mwenyekiti wa Baraza la Mapinduzi Alhajj Dk.Hussein Ali Mwinyi akijumuika na Wananchi wa Paje kuitikia dua ikisomwa na Katibu Mtendaji wa Ofisi ya Mufti Mkuu wa Zanzibar Sheikh Khalid Ali Mfaume, baada ya kumalizika kwa Ibada ya Sala ya Ijumaa iliyofanyika katika Msikiti Mkuu wa Paje Wilaya ya Kusini Unguja na (kushoto kwa Rais) Mfadhili wa Ujenzi wa Msikiti huo Dkt. Mahir Bakar na (kulia kwa Rais) Waziri wa Nchi Ofisi ya Rais Katiba, Sheria,Utumishi na Utawala Bora Zanzibar.Mhe. Haroun Ali Suleiman na Mkuu wa Mkoa wa Kusini Unguja Mhe. Hadid Rashid Hadid

RAIS wa Zanzibar na Mwenyekiti wa Baraza la Mapinduzi Alhajj Dk.Hussein Ali Mwinyi akiwasalimia Watoto wa Paje Wilaya ya Kusini Unguja baada ya kumalizika kwa Ibada ya Sala ya Ijumaa iliyofanyika katika Msikiti Mkuu wa Paje leo 12-5-2023, baada ya kuufungu na (kushoto kwa Rais) Mkuu wa Mkoa wa Kusini Unguja Mhe. Hadid Rashid Hadid.

RAIS wa Zanzibar na Mwenyekiti wa Baraza la Mapinduzi, Al hajj Dk. Hussein Ali Mwinyi, amechangia shilingi milioni 10 kwaajili ya ujenzi wa maduka matano, yanayokusudiwa kutoa gharama za uendeshaji wa msikiti mkuu wa Paje, Mkoa wa Kusini, Unguja.

Al hajj Dk. Mwinyi alitoa mchango huo alipofungua msikiti huo na kuiasa jamii na waumini msikitini hapo, kujitoa kwa hali na mali kuchangia ujenzi wa maduka hayo ili kukamilisha ujenzi.

Alisema ujenzi wa maduka hayo utachangia gharama za uendeshaji wa misikiti huko endapo utahitaji matengenezo na ukarabati, gharama za maji na umeme pamoja na gharama za kuwalipa masheikh na maimamu watakaouendesha msikiti huo.

Aidha, Al hajj Dk. Mwinyi aliwanasihi waumini na viongozi wa msikiti huo kuutumia vyema kwa mambo ya khairati na yenye kujenga jamii iliyobora, ikiwemo kusaliwa, kuwafundishia vijana maadili mema na kuwakataza mabaya, ili kuwanusuru na majanga ya kilimwengu ikiwemo athari za dawa za kilevya na masula ya udhalilishaji wa kijinsia.

Pia, aliwaeleza waumini hao lengo la kujengwa misikiti hiyo kwa waumini ni kusaliwa kwa wakati na kufanyiwa ibada kwa wingi, hivyo aliwaomba kujaza safu wakati wote wa kutekelezwa kwa ibada msikitini hapo.

Al hajj Rais Dk. Mwinyi, pia alitumia fursa hiyo kuwashukuru wafadhili wa ujenzi wa msikiti huo pamoja na kuwashukuru wazawa kwa weledi wa kujitoa kwao kuanza ujenzi wa msikiti huo kabla ya kupata wafadhili.

“Tunawashukuru sana wafadhili wetu kwa kujitoa na kuijenga misikiti mizuri na yenye hadhi kubwa kama huu, lakini ningependa zaidi niwashukuru, niwapongeze na niwatakie kila la kheir wale ndugu zetu walioanza ujenzi wa msikiti huu kabla ya kupata wafadhili, hawakukaa wakafunga mikono wakasema tunamsubiri mfadhili, walianza wao. Hii ni imani kubwa walioionesha kidogo walichokua nacho walianza nacho hadi walimaliza msingi wa jengo lote.” Alipongeza Al hajj Dk. Mwinyi.

Naye, Waziri wa Nchi Ofisi ya Rais, Utumishi wa Umma na Utawala Bora, Haroun Ali Suleiman alisema, wananchi na waumini wa Mkoa wa Kusini Unguja wanaungamkono jitihada zinazofanywa na Rais Al hajj Dk. Mwinyi.

Akizungumza kwenye halfa ya ufunguzi wa msikiti huo, Mfadhili Dk. Maheer Bakari alieleza misikiti ni nyumba za Mwenyezi Mungu, hivyo aliwaomba waumini wazitukuze, wazitunze na kuziheshimu kwaajlili ya kimtaja Mwenyezi Mungu muda nyakati zote.

Pia alimshukuru Rais Al Hajj Dk. Mwinyi kwa harakati zake kwenye masuala ya dini.

Pia sheha wa Paje, Mohamed Rajab nae alieleza ujenzi wa msikiti huo ulianza mwaka 2021 kwa wananchi wa shehia hiyo kujitolea kuchimba msingi na kuutengeneza wote na mwaka jana walitokea wafadhali na kuujenga msikiti huo hadi kukamilika kwake.

Alitumia fursa hiyo kuwashukuru wafadhili hao kwa kuukamilisha ujenzi wa msikiti huo.

 IDARA YA MAWASILIANO, IKULU ZANZIBAR