Trifonia yasaidia yatima wa kituo cha ZASO

Mratibu wa kituo cha kulelea watoto Yatima  ZASO Shaaban Ali Abdalla Akiwapatia  maelezo watendaji wa skuli ya Trifonia kuhusiana na  watoto hao wakati walipowatembelea katika kituo hicho kilichopo Mambosasa  na Kuwafariji .

Mratibu wa kituo cha kulelea  watoto Yatima ZASO Shaaban Ali Abdalla Akiwapatia maelezo wanafunzi wa Skuli ya Trifonia kuhusu watoto hao wakati walipowatembelea katika kituo hicho kilichopo Mambosasa  na Kuwafariji .

Mkurugenzi wa Skuli ya Trifonia Academy  Grace Bernad akizungumza na watoto yatima wa ZASO (hawamo pichani) wakati walipowatembelea na kuwafariji

Mwalimu mkuuu wa Skuli ya Trifonia Protas. Bernardo Nicodemu akimkabidhi msaada wa vitu mbalimbali  msimamizi msaidizi  wa   kituo cha kulelea na kutuniza watoto yatima ZASO  Maryam Mohammed  wakati walipotembelea kituo hicho na kuwafariji.

 

PICHA NA FAUZIA MUSSA-MAELEZO ZANZIBAR 

Na Rahma Khamisi Maelezo.    

 

Jamii imeshauriwa kusaidia taasisi zinazoshughulikia watoto wanaoishi katika  mazingira magumu ili waweze kupata haki zao kama watoto wengine.

 

Akizungumza  mara baada ya kupokea msaada wa vitu mbalimbali kutoka kwa uongozi wa  Skuli ya Trifonia ,Msimamizi wa Kituo cha Kulelea Watoto Yatima (ZASO) Shaabani Ali Abdalla amesema watoto hao  wanahitaji faraja  na kuenziwa kutokana na hali walizokuwanazo.

 

 Amesema vituo vinavyotunza na kusimamia watoto hao vinajukumu  la kuwapatia elimu,malazi bora,matibabu na chakula, hivyo aliiomba jamii kuongeza nguvu za kuwalea vyema  watoto hao hadi kufikia malengo na kukamilisha ndoto zao za maisha.

 

Alisema katika kituo hicho  wapo watoto wenye fani mbalimbali hivyo wakiendelezwa wataweza kujitegemea na kusaidia watoto wenzao katika siku za baadae .

 

 "Sisi kama taasisi inayosaidia watoto tuna haki ya kuwatunza kwa kuwapatia vitu mbalimbali ikiwemo mahitaji ya skuli kwani wana haki kama watoto wengine" alisisitiza Msimamizi wa Kituo.

 

Mbali na hayo msimamizi huyo alisema watoto hao wanakabiliwa na changamoto mbalimbali ikiwemo kukosa  usafiri maalum kwa watoto wanaosoma Skuli za mbali jambo ambalo linawapa  usumbufu wanafunzi hao.

 

Hata hivyo  alisema  watoto pamoja  na uongozi wa  kituo hicho umefarajika kutembelewa na wanafunzi na walimu wa skuli hiyo   kwani ujio wao umesaidia kutatua baadhi ya changamoto zinazowakabili.

 

Nae Mkurugenzi wa Skuli hiyo Grace Bernad amesema kwa pamoja  wana jukumu la kusaidia watoto hao hivyo uongozi wa skuli ya Trifonia utajitolea kusomesha watoto kumi wa kituo hicho  katika skuli yao bila malipo ili kuwapunguzia masafa marefu ya  kwenda kutafuta haki yao ya elimu.

 

Mapema aliwataka  watoto hao kuwa na nidhamu ya kuwasikiliza walezi wao na kuwa na bidii ya  masomo yao ili kuepusha kuwa tegemezi  katika  maisha ya baadae.

 

Nao  watoto hao wameushukuru Uongozi wa Trifonia na kuwataka kuendelea kuwatembelea  mara kwa mara ili kuimarisha ushirikiano kati yao.

 

Skuli ya Trifonia ilikabidhi vitu mbalimbali kwa watoto wa kituo hicho ikwemo mafuta,sukari, unga ,maharage ,mayai na sabuni ikiwa ni mrejesho kwa jamii kutoka kwa skuli hiyo inayotimiza miaka 25 tangu kuanzishwa kwake.