Amuua mkewe kwa wivu

Na Fatina Mathias, Dodoma

WATU wawili wamefariki dunia wilayani Mpwapwa mkoani hapa kwa kupigwa katika matukio mawili tofauti.

Akizungumza na waandishi wa habari, Kamanda wa Polisi mkoani hapa, David Misime, alisema tukio hilo lilitokea juzi majira ya saa tano na nusu usiku katika kijiji Mzogole.

Alisema mkazi wa Mzogole Richard Kodi (55) aliuawa kwa kupigwa na wananchi baada ya kumuua mkewe Mwajuma Chomola (48) kutokana na wivu wa mapenzi.

Kamanda huyo alisema marehemu Mwajuma aliuawa kwa kupigwa rungu tumboni upande wa kushoto na mume wake huyo.

“Baada ya Mwajuma kuuawa Richard naye aliuawa siku iliyofuata majira ya saa tatu asubuhi kwa kushambuliwa na wananchi waliojichukulia sheria mkononi na alifariki dunia,”alisema.

Alisema marehemu Richard alifariki akiwa anaendelea na matibabu katika hospitali ya wilaya ya Mpwapwa.

Alisema uchunguzi wa awali unaonesha chanzo cha mauaji hayo 

ni wivu wa mapenzi.

Alisema Mwajuma aliuawa baada ya kuchelewa kurudi kutoka kwenye sherehe iliyokuwa hapo kijijini akidhani kuwa ameenda 

kwenye masuala mengine.

Aidha alisema jeshi la polisi bado linawatafuta wananchi waliojichukulia sheria mkononi ili wafikishwe mahakamani.