Na Farida Abdallah MUM
WANAJAMII wamesisitizwa kuripoti matukio yoyote ya unyanyasaji wa kijinsia dhidi ya wanawake na watoto katika vituo mbali mbali vya polisi ili kuendeleza juhudi za serikali kupinga vitendo hivyo vya
ukatili.
Mkuu wa polisi Mjini Magharibi ambae pia ni mwenyekiti wa mtandao wa polisi wa wanawake mkoa wa Mjini Magharibi, Salma Khamis Juma wakati akizungumza na gazeti hili ofisini kwake kwenye maadhimisho ya siku 16 ya kupinga ukatili.
Alisema bado wanajamii wanaogopa kutoa taarifa katika vituo vya polisi pindi tatizo linapojitokeza kwa kuhofiwa kutengwa, kuadhibiwa au kufanyiwa kitu kibaya na jamii inayowazunguka hali ambayo inapelekea
vitendo hivyo vya udhalilishaji kuota mizizi nchini.
Alisema “wananchi lazima waamke na kushirikiana na polisi kwa hali na mali ili kutokomeza kabisa unyanyasaji huu wa kijinsia kwani kukaa kimya kunawapa nguvu wahalifu hao kuendelea na vitendo hivyo vichafu”, alisema.
Akizungumzia kuhusu tathimini ya maadhimisho ya siku 16 za kupinga ukatili dhidi ya wanawake alisema bado wananchi wanamuamko mdogo katika kupambana unyanyasaji wa kijinsia dhidi ya wanawake na watoto
kwani hata maudhurio yao yaliokuwa hafifu sana kinyume na matarajio ya waandaji.
Alisema ni wazi kwamba wananchi wanapuza suala zima la ukatili dhidi ya wanawake na watoto na kuliona ni suala la kifamilia zaidi na kuendelea kukaa kimya japokuwa wathirika wakuu ni watoto wao ambao
wanaharibiwa na ndugu au jamaa zao wa karibu katika familia.
Aidha aliwataka wanajamii kutosita kutoa taarifa za vitendo hivyo hata kama vimefanywa na mwanafamilia kwani vimekwa ni sababu kubwa ya kuwaathiri kisaikolojia watoto na wanawake na kurudisha nyuma juhudi
za kuleta maendelea yao binafsi na Taifa kwa ujumla.