Bunge la katiba lapangua ratiba ya Baraza la Wawakilishi

Na Khamisuu Abdallah

KIKAO cha Baraza la Wawakilishi cha mwezi Machi kimehamishia mwezi Januari mwaka huu, na kwamba kikao hicho kitaanza Januari 22 mwaka huu, huko Chukwani nje kidogo ya Mji wa Zanzibar.

Akizungumza na mwandishi wa habari hizi, huko ofisini kwake katibu wa Baraza hilo,  Nd. Yahya Khamis Hamad, alisema kikao hicho awali kinakuwa mwezi Machi na kuangukia Aprili,  ambapo mwaka huu kitaanza mapema kutoka na bunge la katiba.

Katibu huyo alifahamisha kuwa bunge la katiba linatarajiwa kukaa mwezi Fabuari ambapo litachukua muda wa kati ya siku zisizopungua 70 na kuweza kufikia Mei, jambo ambalo litakuwa vigumu kufanya kikao cha Baraza katika mwezi huo.

Alisema kutokana na wajumbe wa baraza hilo kuwa ni wabunge wa Bunge la katika hivyo ni vyema kikao cha Baraza kikatangulia, ambapo baada ya kumaliza kikao hicho wajumbe hao wageukie kwenye bunge la katiba.

"Tunatarajia bunge hilo litaanza mwezi wa pili na kukaa siku zisipongua 70 na inaweza kufika Mei halijamaliza itakuwa ni vigumu sisi kufanya kikao katika mwezi huo kama iliyokawaida", alifafanua katibu huyo.

Alisema Mkutano huo utakaoanza Januari 22 utakuwa ukijadili kamati za kudumu kwa mwaka mzima ambapo unatarajiwa kumalizika Febuari 10 mwaka huu.

"Wakati Rais wa Jamuhuri ya Muungano wa Tanzania, Mhe. Jakaya Mrisho Kikwete alipokabidhiwa rasimu ya pili ya katiba na Jaji Joseph Warioba hivi karibuni alisema atalitangaza bunge ili lianze kazi yake”, alisema.

Akizungumzia suala la Wajumbe wa Baraza kukwepa na kutoroka vikao alisema bado suala hilo halijafanyiwa kazi na wanategemea vikao vinayokuja kulipelekea Barazani na kufanyiwa kazi na kupitishwa rasmi ili kuondoa tatizo hilo.