Watoto 30 wanusurika kufa baada ya kula mbegu za mbono

Na Tatu Makame

WANAFUNZI 30 wa Almadrasatu Nurul-huda ya Matetema Kitope wilaya ya kaskazini ‘B’ Unguja, wamenusurika kufa baada ya kula mbegu za mbono.

Tukio hilo lilitokea juzi saa 10:00 za jioni wakati watoto hao walipochuma mbegu za mti huo na kula wakati wakicheza nje ya madrasa yao.

Sheha wa shehia ya Matetema, Mohammed Bakari,alisema watoto hao awali walikuwa wametolewa kwa ajili ya kwenda kusali pamoja na mapumziko ndipo walipokwenda kwenye miti hiyo na kuchuma mbegu zake na kula.

Akithibitisha kutokea kwa tukio hilo Kaimu Kamanda wa Polisi  mkoa wa kaskazini Unguja, Salma  Khamis, alisema ni kweli alipata taarifa ya watoto wa kijiji hicho kula mbegu za mti huo, lakini walikuwa 24 tu.

Alisema watoto hao walikimbizwa hospitali ya KMKM Kibweni na 22 kati ya hao walitibiwa na kuruhusiwa kurudi nyumbani na wawili bado wanaendelea na matibabu.

Aliwataja wanaoendelea na matibabu hospitalini hapo  kuwa ni Mulhati  Foum Khamis (3) na Amina Haji Khamis (6) wote wakaazi wa kijiji cha Matetema.

Alitoa wito kwa wazazi na walimu wa madrasa kuwaelimisha watoto kuhusu madhara ya mbegu za mti huo.