Viongozi Waliotajwa Kamati teule Wahojiwa

Na Mwanatanga Ame

WAZIRI asiyekuwa na wizara Maalum, Mansour Yussuf Himid, amesema serikali tayari imeanza kuwahoji viongozi wa serikali ambao wametajwa katika ripoti ya kamati teule ya Baraza la Wawakilishi.

Kauli ya waziri huyo ilikuja baada ya wajumbe wengi Baraza la Wawakilishi kuishutumu bajeti ya serikali ya mwaka 2012/2013 kwa kudai ni kwanini serikali iko kimya kwa kushindwa kuwachukulia hatua watu waliotajwa katika ripoti hiyo.

Alisema sio kweli kama serikali iko kimya kuifanyia kazi ripoti hiyo kwani tayari wapo viongozi waliotajwa kuhusika na wizi unaodaiwa kufanyika katika taasisi mbali mbali za serikali.

Alisema serikali ilikubali kuunda kamati teule kwa kutambua suala hilo linafanyika kwa taratibu za kisheria baada ya kuamuliwa na chombo hicho na kuwekewa muongozo wa kuifanya kazi hiyo.

Alisema haiwezekani suala saerikali ikatoa maamuzi ya jazba kwani viongozi waliotajwa nao hawana haki ya kusikilizwa na ni lazima kwa serikali yenye kufuata misingi ya kisheria kuwapa haki ya kusikilizwa.

Alisema si vyema kunyosheana vidole na waipe nafasi serikali kuifanyia kazi ili kuweza kuleta majibu sahihi  juu ya suala hilo.

Akizungumzia juu ya suala la yeye kutajwa kuhusika katika kundi la Jumuiya ya Uamsho, alisema hahusiki nalo na hakubaliani na vitendo vya vurugu wanavyofanya.

Alisema vurugu zinazofanywa na Jumuiya ya Uamusho yeye hakubaliani nazo kwa vile haungi mkono kwa Wazanzibari kurudi katika visa vya uhasama vilivyowahi kutokea hapa nchini.

Akiendelea alisema jambo linalohitajika kufanywa ni kuona kunajengwa uvumilivu kwa kuwaelekeza zaidi wananchi nini cha kufanya na sio kuandaliwa mazingira ya kupambana na wanaotoa kauli za kuukataa Muungano.

Aidha, Mwakilishi huyo alisema bajeti iliyoiandaa serikali ni vyema wajumbe wa Baraza hilo wakaikubali kwani bajeti iliyopita imeonekana kupata mafanikio mbali mbali.

Alisema suala la kuongeza kodi lililofanyika kwa Zanzibar bado hazilingani na kodi za bajeti za ukanda wa Afrika Mashariki lakini serikali imeanza kuwa na bajeti inayojitegemea kwa baadhi ya huduma.

Alisema hatua hiyo ni jambo la faraja kwa serikali ya Zanzibar na ni vyema kwa Wajumbe wa baraza hilo wakaliunga mkono suala hilo.

Alisema serikali kwa kiasi kikubwa imesaidia kuona misamaha ya kodi kwa mwaka huu imeweza kuokowa bilioni 9 jambo ambalo ni tofauti na miaka iliyopita.

Nae Mwakilishi wa Micheweni, Subeit Khamis Faki aliiomba serikali kuzingalia vyema kero za Muungano kwa kuhakikisha inazipatia ufumbuzi kwa haraka