Dk. Mwinyihaji Abanwa Barazani.

Buti Zatumika Kuipiga Bajeti yake .


 Akiri ilikuwa Changamoto Kubwa 


HATIMAYE wajumbe wa Baraza la Wawakilishi wameipitisha bajeti ya wizara ya Nchi Ofisi Rais na Mwenyekiti wa Baraza la Mapinduzi, baada ya kuipigishwa katwa kwa zaidi ya masaa matatu wakipitisha mafungu ya matumizi.

Wajumbe wa kadhaa wa Baraza hilo waliiwekea vipingamizi vya kupitisha mafungu ya matumizi ya wizara hiyo wakihoji na kutaka ufafanuzi wa matumizi ya fedha hizo kabla ya kuziidhinisha.

Pamoja na mjadala mkali huku baadhi ya mawaziri wakimsaidia Dk. Mwinyihaji kuelezea matumizi hayo, Mwakilishi wa jimbo la Mji Mkongwe, Ismail Jussa Ladhu alifanikiwa kuyaondoa matumizi ya yenye utata ya ununuzi wa televisheni katika Idara ya Uratibu wa Shughuli za Wazanzibari walionje ya nchi.

Matumizi hayo yenye utata yalionesha ununuzi wa televisheni hiyo kwa shilingi milioni 40, huku kabrasha jengine likionesha matumizi hayo shilingi milioni 141.

Waziri alipotakiwa kutoa ufafanuzi juu ya hoja hiyo, alisema si ununuzi wa televisheni bali ni wa jenereta, jambo ambalo lilipingwa na Jussa na kutaka matumizi hayo yaondolewe, jambo ambalo waziri huyo aliliridhia.

Kwa upande wake Mwenyekiti wa Kamati ya Wenyeviti, Hamza Hassan Juma alisema waziri huyo ameponzwa na watendaji wake kutokana na kutompa taarifa sahihi.

“Waziri ametoa majibu tofauti baada ya kupokea tarifa kutoka juu, hili tatizo la watendaji wetu, ndugu Mwenyekiti kwa ruhusa yako namuomba waziri tusiende kwenye kura, akubali fungu lipunguzwe”.

Naye Ismail Jussa alisema ni vyema fungu hilo likaondolewa ili iwe fundisho kwa watendaji ambao wanaonekana kutotekeleza vyema majukumu yao ya kumsaidia waziri.

“Kwa leo tutumie nidhamu kwa fuatwa utaratibu wa kupitisha matumizi ya fedha za wananchi, nawaomba wajumbe wenzangu tumpitishie fedha za ununuzi wa televisheni mwakani”,alisema Jussa.

Wajumbe wengine waliyoibana bajeti hiyo ni pamoja na Asha Bakari Makame, Makame Mshimba Mbarouk, Rashid Seif Suleiman, Mbarok Wadi Mussa ambapo waziri Mohammed Aboud, Omar Yussuf Mzee, Juma Duni Haji na Mwanasheria Mkuu wa serikali Othman Massoud ndio waliokuwa vinara wa kumsaidia waziri huyo.

Baada ya wajumbe kupitisha mafungu ya matumizi ya bajeti hiyo, waziri huyo kabla ya kutoa hoja alisema ilikuwa changamoto kubwa.

Awali akitoa ufafanuzi na kujibu hoja wa Wajumbe wa Baraza la Wawakilishi, waziri Nchi Ofisi ya Rais na Mwenyekiti wa Baraza la Mapinduzi, Dk. Mwinyihaji Makame Mwadini alisema kuwa serikali itamshughulikia askari na ofisa wa Chuo cha Mafunzo atakayebainika kuwapatia bangi wanafunzi wa vyuo hivyo.

Waziri huyo alilazimika kueleza hayo kufuatia baadhi ya wajumbe wa Baraza hilo, kulalamikia kuwepo tabia ya matumizi ya bangi kwa wanafunzi wa vyuo vya Mafunzo.

Alisema suala la uvutaji bangi kwa wanafunzi wa vyuo hivyo linaumiza vichwa na kwamba endapo askari au ofisa yeyote atakabainika kuwapatia bangi wafungwa atachukuliwa hatua za kisheria ikiwemo kufukuzwa kazi.

‘Wanafunzi wanapelekwa Vyuo vya Mafunzo kurekebishwa tabia kutokana na makosa waliyoyafanya, sasa itakuwaje wawepo askari au maofisa wanaowapenyezea bangi wanafunzi, tukibaini askari  tuamshugulikia’, alisema waziri huyo.

Akizungumzia suala la upatikanaji wa vitambulisho vya Mzanzibari Mkaazi (ZAN ID), alisema Idara ya Vitambulisho haitia vitambulisho kwa ubaguzi.

Alisema kitambulisho cha Mzanzibari Mkaazi ni haki ya kila mwananchi wa Zanzibar, lakini kutolewa kwake kunahitaji kufuatwa utaratibu uliowekwa ikiwemo kuthibitisha sifa ya Uzanzibari.

Alifahamisha kuwa wapo wananchi waliobainika kughushi hati za kuzaliwa na kula viapo vya uongo mahakamani ili waweze kufanikisha kupata vitambulisho hivyo, lakini hata hivyo wametiwa adabu kwa kushitakiwa na kunyang’anywa vitambulisho hivyo.

Dk. Mwinyihaji alisema takwimu zilizopo zinaeleza kuwa kiasi cha wananchi 112,420 katika wilaya zote za Unguja na Pemba hawajenda kuchukua vitambulisho vyao katika ofisi za wilaya.

Aidha aliwataka wananchi watoe taarifa kama wapo wageni waliopata vitambulisho hivyo, ambapo wale waliobainika kuvipata vitambulisho hivyo ambao si Wanzibari wamefikishwa katika vyombo vya sheria.

Akizungumzia juu ya mikato ya fedha kwa ajili ya chakula kwa askari wa vikosi Maalum, alisema utaratibu huo umeondoshwa na kwamba suala la chakula kwa askari hao limebebwa na serikali kwa kuongea bajeti kutoka milioni 400 hadi kufikia milioni 750.

Kuhusu nyumba za viongozi wa serikali, alisema kamati maalum imeundwa ambayo inashughulikia suala hilo na kwamba kwa hatua ya kwanza kamati hiyo imeshatembelea eneo lote la Mazizini.