Rais wa Zanzibar na Mwenyekiti wa Baraza la Mapinduzi Mhe.Dk.Hussein Mwinyi Azungumza na Balozi wa Italia Nchini Tanzania Ikulu Zanzibar

RAIS wa Zanzibar na Mwenyekiti wa Baraza la Mapinduzi Mhe.Dk.Hussein Ali Mwinyi akiwa katika mazungumzo na mgeni wake Balozi wa Italia Nchini Tanzania Mhe.Guiseppe Sean Coppola, mazungumzo hayo yaliyofanyika katika ukumbi wa Ikulu Jijini Zanzbar leo 26-9-2024

RAIS wa Zanzibar na Mwenyekiti wa Baraza la Mapinduzi Mhe.Dk.Hussein Ali Mwinyi akizungumza na mgeni wake Balozi wa Italia Nchini Tanzania Mhe. Guiseppe Sean Coppola, mazungumzo hayo yaliyofanyika katika ukumbi wa Ikulu Jijini Zanzibar leo 26-9-2024

RAIS wa Zanzibar na Mwenyekiti wa Baraza la Mapinduzi Mhe.Dk.Hussein Ali Mwinyi akiagana na mgeni wake Balozi wa Italia Nchini Tanzania Mhe. Guiseppe Sean Coppola,baada ya kumaliza mazungumzo yaliyofanyika katika ukumbi wa Ikulu Jijini Zanzibar leo 26-9-2024.

SERIKALI ya Mapinduzi ya Zanzibar imesema hatua ya kuanzisha bima ya afya kwa watalii inalenga kuimarisha sekta ya utalii pamoja na kuandaa mazingira salama na rafiki kwa wageni wanaokuja nchini.

Rais wa Zanzibar na Mwenyekiti wa Baraza la Mapinduzi, Dk. Hussein Ali Mwinyi ameyasema hayo Ikulu, Zanzibar alipozungumza na balozi mpya wa Italia nchini, Giuseppe Sean Coppola aliyefika kujitambulisha.

Dk. Mwinyi amesema bima ya afya kwa watalii sio jambo geni kwani mataifa mengi duniani tayari wamekuwa na huduma hiyo ambayo kwa kiasi kikubwa inamjengea mtalii uhakika wa kupata huduma bora za afya, ulinzi wa ustawi wake ikiwemo kumuondoshea usumbufu anapopata tatizo lolote kama kupoteza mizigo yake au hati za kusafiria.

Amefafanua kwamba Serikali imekua ikibeba mzigo mkubwa wa gharama kwa wageni wanaongia nchini hasa wanapopata matatizo ya ugonjwa, ajali wakati mwengine vifo, hivyo ameeleza kuanzishwa kwa bima hiyo kutaipa Serikali unafuu.

“Sio nia ya Serikali kutafuta njia nyengine ya kujiongezea mapato, bali ni namna bora ya kuiboresha sekta ya Utalii na kuifanya Zanzibar kuwa kituo Salama kwa watalii wanaoingia nchini” Alifahamisha Dk. Mwinyi.  

Dk. Mwinyi amesifu ushirikiano uliopo baina ya Zanzibar na Italia katika nyanja mbalimbali na kuisisitiza nchi hiyo kuunga mkono juhudi za Serikali ya Mapinduzi ya Zanzibar hususan usimamizi bora wa taka kwa kuziongezea thamani kuwa malighafi, afya na usalama wa bahari.

Akiizungumzia sekta ya Utalii, Rais Dk. Mwinyi ameielezea Itali kuwa mdau mkubwa kwa maendeleo ya utalii wa Zanzibar kwani imekua ikipokea idadi kubwa ya wageni kutoka nchini humo, hivyo amezialika kampuni za uwekezaji kutoka Itali kuja kuwekeza Zanzibar kwenye sekta nyengine.

Naye, Balozi Sean Coppola amemuhakikishia Rais Dk. Mwinyi kushirikiana zaidi maeneo ya afya, utalii, usimamizi wa taka kwa kuzichakata na kuwa rasilimali zenye tija pamoja na maendeleo ya Uchumi wa Buluu ambao kwa Zanzibar umekua ni miongoni mwa sera kuu ya Uchumi.

Kuhusu afya balozi Coppola amesema watashirikiana zaidi hasa kwa maradhi yasiyopewa kipaumbele (NTDs) hususan kisiwani Pemba pamoja na masuala ya afya ya mama na mtoto.

Akiielezea Sekta ya Utalii, balozi huyo amesema, wataungamkono kwenye kuwajengea uwezo, vyuo vya utalii, wadau na watendaji wa sekta hiyo, kwa mafunzo ya muda mfupi na mrefu lengo ni kuifanya Zanzibar kuwa kituo bora cha utalii kinachotambulika duniani.

Balozi Giuseppe Sean Coppola, aliwasilisha nakala ya barua za utambulisho kwa Waziri wa Mambo ya Nje na Ushirikiano wa Afrika Mashariki wa Jamhuri ya Muungano wa Tanzania, Mahmoud Thabit Kombo, Ogasti 05 mwaka huu.

IDARA YA MAWASILIANO, IKULU ZANZIBAR.