Rais wa Zanzibar Dk Shein Akutana na Balozi wa China Ikulu leo.

STATE HOUSE ZANZIBAR

OFFICE OF THE PRESS SECRETARY

PRESS RELEASE

  Zanzibar                                                                                                           10.3.2015

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein amesema kuwa Zanzibar itaendeleza uhusiano na ushirikiano wa kihistoria uliopo kati yake na China na kusifu juhudi za nchi hiyo kwa kuendelea kuiunga mkono Zanzibar katika sekta za maendeleo na uchumi.

Dk. Shein aliyasema hayo leo huko Ikulu mjini Zanzibar wakati alipokuwa na mazungumzo na Balozi wa Jamhuri ya Watu wa China nchini Tanzania Mhe. Lv Youqing aliyefuatana na ujumbe wake akiwemo Balozi mdogo anayefanyia kazi zake hapa Zanzibar Mhe. Xie Yunliang.

Katika mazungumzo hayo, Dk. Shein alisisitiza kuwa Zanzibar inathamini uhusiano huo na ushirikiano na China ambao umeasisiwa na Marehemu Mzee Abeid Amani Karume na Marehemu Mwalimu Julius Kambarage Nyerere pamoja na kiongozi wa China wakati huo Marehemu Mao tse tung.

Dk. Shein alisema kuwa China inahistoria kubwa katika harakati zake za kuiunga mkono Zanzibar na ni miongoni mwa nchi za mwanzo zilizoyatambua Mapinduzi ya Januari 12, 1964 na kuanzia hapo hadi leo inaendeleakuwa bega kwa bega na Zanzibar.

“Zanzibar na China ni marafiki wa kweli... uhusiano wa Zanzibar na China ni wa kihistoria na ulianza mara tu baada ya Mapinduzi matukufu ya Januari 12, 1964 ambapo kuanzia hapo China imeweza kuiunga mkono Zanzibar katika shughuli zake mbali mbali hadi leo hii.. wananchi wa Zanzibar wanathamini uhusiano huu na watauendeleza’, alisema Dk. Shein.

Aidha, Dk. Shein alisema kuwa tokea wakati huo Zanzibar imeweza kupata misaada mbali mbali kutoa China hatua ambayo imeweza kusaidia mafanikio yake makubwa yaliopatikana hapa nchini hivi sasa.

Alisema kuwa China imeweza kuisaidia Zanzibar katika kuimarisha sekta mbali mbali za Maendeleo zikiwemo afya, elimu, kilimo, michezo na nyenginezo ambapo kwa upande wa sekta ya afya China imeendelea kutoa madaktari wake na wataalamu kuja kufanya kazi Zanzibar tokea mwaka 1964.

Kwa upande wa sekta ya michezo, Dk. Shein aliipongeza China kwa kuiunga mkono Zanzibar katika kuimarisha miundombinu ya michezo ikiwa ni pamoja na ujenzi wa uwanja wa Amaan mjini Unguja sambamba na kusaidia sekta hiyo kwa ujumla.

Kutokana na mafanikio hayo, Dk. Shein alisema kuwa azma ya China ya kuisaidia Zanzibar katika ujenzi wa uwanja wa mpira wa Mao tse tung itasaidia kwa kiasi kikubwa katika kuimarisha sekta ya michezo sambamba na kusaidia shughuli nyengine za kijamii na kimaedeleo.

Dk. Shein pia, alimueleza Balozi huyo hatua zinazoendelea za ujenzi wa Hospitali ya Abdalla Mzee, Mkoani Pemba na kusisitiza kuwa ujenzi huo utsaidia kwa kiasi kikubwa kuimarisha sekta ya afya na kuimarisha huduma zake.

Pamoja na hayo, Dk. Shein alieleza hatua za ujenzi wa kiwanda cha Sukari Mahonda pamoja na viwanda vyengine vidogo vidogo viliojengwa wakati huo ambapo nchi hiyo imeweza kutoa ushirikiano na msaada mkubwa sambamba na kuendelea kutoa nafasi mbali mbali za mafunzo nchini humo na kuleta wataalamu wa sekta kadhaa.

Dk. Shein pia, alitumia fursa hiyo kumuelza Balozi Youqing kuwa miongoni mwa mafanikio makubwa yaliopatikana Tanzania kutokana China ni pamoja na ujenzi wa Reli ya TAZARA kati ya Tanzania na Zambia ambayo ni mfano mkubwa kwa nchi za Afrika.

Nae Balozi wa Jamhuri ya Watu wa China Mhe. Lv Youqing alitumia fursa hiyo kutoa pongezi kwa mafanikio makubwa yaliopatikana hapa Zanzibar na yanaoendelea kupatikana chini ya uongozi wa Dk. Shein katika sekta mbali mbali za maendeleo ikiwemo kiuchumi, kijamii na kisiasa.

Pamoja na hayo, Balozi huyo alitumia fursa hiyo kumpongeza Dk. Shein kwa mara nyegine tena pamoja na Serikali anayoiongoza kwa kutimiza miaka 51 ya Mapinduzi Matukufu ya Januari 12, 1964.

Balozi huyo wa China alimueleza Dk. Shein kuwa China inathamini sana uhusiano na ushirikiano wa muda mrefu kati yake na Zanzibar na kuahidi kuuendeleza kwa manufaa ya pande zote mbili.

Balozi Youqing alimueleza Dk. Shein kuwa licha ya China kuendelea kuiunga mkono Zanzibar na Tanzania kwa jumla katika harakati zake za maendeleo nchi hiyo pia, inathamini sana juhudi za Tanzania katika kuiunga mkono nchi hiyo kwenye Umoja wa Mataifa.

Aidha, Balozi huyo aliipongeza Zanzibar kutokana na  mafanikio iliyoyapata kwenye sekta ya utalii huku akiendelea kusifu juhudi za kuendeleza amani na utulivu hapa nchini hatua ambayo imeendelea kuijengea sifa kubwa Zanzibar duniani kote kutokana na juhudi zake hizo.

Sambamba na hayo, Balozi huyo alitumia fursa hiyo kutoa shukurani zake na pongezi kwa Zanzibar ikiwa ni pamoja na kufikisha salam za Makamu wa Rais wa wa nchi hiyo Mhe. Li Yuanchao aliyetembelea Zanzibar hapo mwaka jana kutokana na ukarimu mkubwa na mapokezi aliyoyapata wakati wote alipokuwepo hapa Zanzibar.

Rajab Mkasaba, Ikulu Zanzibar

Postal Address: 2422 Tel.:0777427449. Fax: 024 2231822 

 E-mail: rajabmkasaba@yahoo.co.uk