Athari za mazingira mabadiliko ya tabia nchi bado ni changamoto - Mhe Othman

 

MAKAMU wa Kwanza wa Rais wa Zanzibar Mhe. Othman Masoud Othman, amesema kwamba athari za kimazingira zinazotokana na mabadiliko ya tabia nchi bado ni  changamoto na tishio kubwa la kimazingira linaloendelea hapa Zanzibar licha ya serikali kufanya juhudi kadhaa kukikabili hali hiyo.

Mhe. Othman ameyasema hayo ofisini kwake Migombani mjini Zanzibar  alipokutana na Ujumbe wa Shirika Aga Khan Foundation ulioongozwa na Mtendaji Mkuu wa Kanda ya Afrika Mashariki wa Shirika hilo hilo Riaz Nathu.

 Kikao hicho kililenga kufanya mashauriano ya mashirikiano juu ya masuala mbali mbali yaliyochini ya Ofisi ya Makamu wa Kwanza wa Rais ikiwemo suala la changamoto ya mazingira, madawa ya kulevya, Ukimwi na mabadiliko ya Tabia nchi ambayo ni masuala mtambuka yanayosimamiwa na ofisi hiyo.

Mhe. Othman amesema kwamba athari zinazotokana na janga la kimazingira linaendelea kuwa changamoto kubwa duniani hasa katika nchi za Visiwa ikiwemo Zanzibar ambapo maeneo mbali mbali zikiwemo fukwe hasa katika kanda za utalii Unguja na Pemba yanaendelea kuharibika kutokana na athari za kimazingira.

Amefahamisha kwambva hivi sasa katika maeneo kama vile ya Jambiani , Nunguwi na sehemu nyengine za Pemba kama vile Tovuni Kaskazini Pemba ni miongoni mwa maeneo ambayo mmongonyoko wa  fukwe unaendelea kuathiri maeneo hayo licha ya jitihada mbali mbali za serikali na washirika wa maendeleo zinazochukuliwa kukabiliana na hali hiyo kuendelea.

Mhe. Makamu amesema kwamba  hata hivyo , jitihada za Serikali zimesaidia wakulima zaidi ya 200 wa Bonde la Tovuni  Kiungoini Pemba kurejea katika mashamba yao kuaendelea na shughuli zao za kilimo cha mpungu wa kutegemea  mvua  ambapo kabla ya juhudi hizo wakulima hao walishindwa kuendeleza kazi ya kilimo  hicho kutokana na mashamba hayo kuingiwa na maji ya chumvi.

Amefahamisha kwamba hatua ya kuwarejesha wakulima hao kuendelea na kilomo cha mpunga katika bonde hilo la tovuni ni   mafanikio makubwa ambapo pia ni matokeo ya juhudi za serikali na washirika mbali mbali wa maendeleo  katika kusaidiana kuzikabili ipasavyo changamoto na athari za mabnadiliko ya tabia nchini.

Amesema kwamba kutokana na hali hiyo serikali ya Mapinduzi Zanzibar inaendelea kuwakaribiasha na ipo tayari kushirikiana na washirika mbali mbali wa maendeleo  katika kuasaidia juhudi za pamoja za kukabilia hali hiyo na kuweza kupunguza athari zinazoendelea.

Amefahamisha kwamba hivi Serikali ya Mapinduzi ya Zanzibar inakusudia kutekeleza Mradi mkubwa wa Kitaifa wa kuirejesha Zanzibar kuwa ya Kijani ambapo juhudi za  serikali na washirika wa maendeleo zinahitajika sana kuunga nguvu katika kufanikisha utekelezaji wa suala hilo.

Ameufahamisha ujumbe huo kwamba dhamira ya Serikali katika mradi huo  ni kuwajenga wanajamii wa Zanzibar kuanzia watoto maskulini kupanda na kuithamini miti  ya aina mbali mbali kuiwezesha Zanzibar kuwa ya kijani ambapo shughuli hiyo inakusudia kuwa shirikishi kwa wadau mbali mbali wakiwemo wananchi na mashirika ya aina tofauti  kama vile shirika la Aga Khan Foundation.

Kwa upande wake Mtendaji Mkuu wa Aga Khan Kanda ya Afrika Mashariki Riaz Nathu, ameipongeza serikali ya Mapinduzi ya Zanzibar kwa jitihada zake inazozishukua katika kukabiliana na suala hilo pamoja na kuwakaribisha washirika wa maendeleo kusaidiana na juhudi hizo katika kukabiliana na changamoto  zinazotokana na athari za mabadiliko ya tabia nchini.

Amefahamisha kwamba kutona na hatua hiyo Shirika la Aga Khan Foundation nalo lipo tayari kuendelea kushirikiana na Zanzibar katika maeneo mbali mbali ili kwa pamoja kupunguza athari zitokanazo na chamgamoto ya Mabadiliko ya tabia nchi.

 Ofisi ya Makamu wa Kwanza wa Rais Zanzibar

28, Julai 2023.