Ghasia atangaza kiama cha wala rushwa

Na Matrida Mwenzegule 

Wakati Waziri wa Nishati na Madini, Sospeter Muhongo, akitanganza kiama kwa wazee na wasio na elimu za kutosha wizarani kwake, Waziri wa Nchi,Ofisi ya Waziri Mkuu na Tawala za Mikoa na Serikali za Mitaa (TAMISEMI), Hawa Ghasia, ametangaza kifo  cha walarushwa kupunguza kero wizarani kwake. 

 Katika hotuba yake kwa wajumbe wa baraza la  wafanyakazi wa wizara hiyo mjini hapa, Ghasia alimwagiza  katibu Mkuu wa wilala hiyo, Jumanne Sagini, kuanza  mchakato wa kuwatambua watumishi wote wanaotuhumiwa  kwa rushwa na kuhujumu mamlaka za serikali  kwa masilahi binafsi.

  Katika baraza hilo lililokutana kwa lengo la kuboresha utendaji na uwajibikaji, Ghasia pia aliwataka wafanyakazi kuacha kulalamika badala ya  kuwajibika. 

Alisema wizara imegeuka jaa la malalamiko dhidi ya wizara zikiwemo kero mbalimbali za rushwa, watumishi wabovu kubebwa bila tija, uwajibikaji mbovu  hasa katika kuwatendea haki watumishi jambo linalochangia  kurudisha nyuma maendeleo.   

Aliwataka wafanyakazi wa  wizara hiyo kutumia  mabaraza ya wafanyakazi kujadili  mambo mbalimbali yanayohusu masilahi na ustawi wa  wafanyakazi na kuishauri manejimenti ya  utumishi  ili waweze kutekeleza majukumu  yao. 

Alilitaka baraza hilo pia kujadili   namna rasilimali zinavyotumika vibaya kwa maslahi ya wachache.

Alisema wakitumia mabaraza hayo vizuri malalamiko ya wafanyakazi katika wizara hiyo yatapungua na kuongeza  uwajibikaji wa kazi katika wizara hiyo.