RAIS MAGUFULI AFARIJIKA NA HATUAZA KUSHUGHULIKIA CHANGAMOTO KATIKA BENKI YA WALIMU (MWALIMU COMMERCIAL BANK)

RAIS wa Jamuhuri ya Muungano wa Tanzania Mhe.Dkt. John Pombe Magufuli ameeleza kufarijika kwake kutokana na changamoto zilizokuwa zikiihusu benki ya Walimu (Mwalimu Commercial Bank plc) sasa zimeanza kushughulikiwa.

Rais ametoa kauli hiyo Ijumaa Juni 5, 2020 wakati akihutubia mkutano mkuu wa uchaguzi wa Chama cha Walimu Tanzania (CWT) kwenye uwanja wa Jamhuri jijini Dodoma.

“Najua chama hiki kina mali na rasilimali mbalimbali, lakini zote hizo ni mali za wanachama hivyo basi viongozi hawana budi kuhakikisha mali na rasilimali za wanachama zinatumika kwa malengo yaliyokusidiwa….Na katika hilo nimefarijika kidogo kusikia kuwa baadhi ya changamoto nilizozitaja kwenye mkutano wa chama cha walimu Tanzania mwaka 2017 zenye kuihusu benki ya Walimu zimeanza kushughulikiwa.” Alisema Rais Magufuli.

Aliwataka viongozi watakaochaguliwa kwenye mkutano huo wa Dodoma waendelee kutatua mapungufu mengine yaliyobaki kwenye benki hiyo ili wanachama wake wafaidike kama ilivyotarajiwa wakati wa kuanzishwa kwake.

Awali katika risala ya wajumbe wa mkutano huo wa uchaguzi iliyosomwa kwa niaba yao na Katibu Mkuu wa CWT (aliyemaliza muda wake), Mwalimu Deus Seif alisema tangu walimu wakutane na Rais mwaka 2017 yapo mambo mengi yamefanyika kuhusiana na benki hiyo ambapo kwa upande wa uongozi kwa sasa chama kina wakilishwa na walimu wanne  katika bodi ya wakurugenzi.

Aidha kwa upande wa mikopo zaidi ya asilimia 90 imetolewa kwa walimu wakati asilimia 5.3 imetolwa kwa wafanyakazi wengine wa serikali.

Vile vile Chama Cha Walimu (CWT) kwa kushirikiana na benki pamoja na PSSSF wataweka utaratibu kwa walimu wastaafu kupokea mafao yao kupitia benki yao ya Mwalimu Commercial Bank.

“Chama Cha Walimu kwa kushirikiana na benki tumefikia muafaka kufungua tawi jingine Dodoma mwishoni mwa mwaka huu ambapo pia benki inaendelea na teknolojia ya mifumo ya kidijitali ili kufikia walimu wengi katika mikoa mbalimbali nchini.” Alisema Bw. Seif.

 Rais wa Jamhuri ya Muungano wa Tanzania Dkt. John Pombe Magufuli, akihutubia mkutano mkuu wa uchaguzi wa Chama Cha Walimu Tanzania (CWT) kwenye uwanja wa Jamhuri jijini Dodoma Ijumaa Juni 5, 2020

 Wajumbe wa Mkutano Mkuu wa Chama Cha Walimu Tanzania (CWT) wakiwa wamejawa na furaha wakati wa mkutano huo uliofanyika uwanja wa Jamhuri jijini Dodoma Juni 5, 2020

 Rais Dkt. John Pombe Magufuli akiwa na Rais wa Chama cha Walimu Tanzania (CWT) (Anayemaliza muda wake) Mwalimu Leah Ulaya wakiwapungia mikono wajumbe wa mkutano mkuu wa uchaguzi wa chama hicho wakati Rais akiwasili uwanja wa Jamhuri jijini Dodoma Ijumaa Juni 5, 2020

Afisa Mtendaji Mkuu wa Benki ya Mwalimu, Bw. Richard Makungwa (kulia) akizungumza jambo na Katibu Mkuu wa Chama Cha Walimu Tanzania (anayemaliza muda wake), Bw. Deus Seif wakati wa mkutano mkuu wa uchaguzi wa CWT kwenye uwanja wa Jamhuri jijini Dodoma Ijumaa Juni 5, 2020