Mwenyekiti bodi TFA atimuliwa

Na Kija Elias, Arusha

Viongozi wa bodi ya chama cha wakulima nchini (TFA) wamefukuzwa madarakani na mkutano mkuu maalum, kutokana na matumizi mabaya ya fedha za ofisi na kukisababishia hasara chama hicho zaidi ya shilingi bilioni tano.

Mkutano huo mkuu maalum uliohudhuriwa na wanachama zaidi ya 500 kutoka matawi 12 yaliyopo nchini ulichukua maamuzi hayo magumu baada ya kuchoshwa na ubadhirifu ambao umekuwa ukifanywa na watendaji hao.

Hasara iliyopata chama hicho ni pamoja na Mwenyekiti wa Bodi wa

TFA, Elias Mshiu, kujiidhinishia nyumba kubwa ya kisasa iliyopo barabara ya Haile Selasie, kiwanja namba 57 kilichopo katikati ya jiji la Arusha na baadae kuomba kupewa nyumba hiyo kama zawadi pamoja na mafao ya shilingi milioni 65 baada ya kustaafu kwake.

Mwenyekiti wa kamati iliyoundwa na wanachama kuchunguza TFA, Maynard Swai, alibainisha hayo katika taarifa yake aliyoisoma katika mkutano mkuu maalumu wa chama hicho uliofanyika makao makuuu ya TFA, Arusha.

Wajumbe kwa kauli moja waliazimia kuwaita Mwenyekiti na Wakurugenzi wa bodi na utawala wa TFA uliodumu kwa zaidi ya miaka hamsini madarakani.

Swai alisema TFA, imeipata hasara za mfululizo mwaka hadi mwaka kutokana na Mwenyekiti kuwa na nyadhifa mbili kwa wakati mmoja kuvaa koti la Mkurugenzi Mtendaji na Mwenyekiti TFA kwa kipindi kirefu na hivyo kuwa na mamlaka ya kusaini mikataba na ajenda za vikao pekee bila ya kuwepo Katibu Mtendaji wala Wakaguzi wa mahesabu wa ndani na nje.

Alisema matumizi mabaya ya madaraka yamesababisha hasara kubwa kwani viongozi wa bodi na utawala umekuwa na matumizi makubwa kuliko mapato huku   wakichukua mikopo mikubwa kwa riba kubwa na kushindwa kulipa.

Kamati hiyo pia ilimtuhumu Mwenyekiti kujiidhinishia malipo makubwa ya mshahara wake,posho na masurufu mengine licha ya kwamba kila mwezi alikuwa akilipwa mshahara wa dola 1000 za Marekani sawa na shilingi milioni 1.6.

Mshiu pia anatuhumiwa kumiliki kampuni binafsi ya ulinzi Apex Security Service Ltd na kampuni inayojighulisha na usafi wa mazingira, Aresco na kujipa zabuni ya ulinzi na usafi katika makao makuu ya TFA bila kufuata taratibu za kisheria ya manunuzi na ugavi.

Kamati hiyo ya uchunguzi ilibaini kushindwa kwa 

Mwenyekiti wa bodi na mtandao wake kuinusuru kampuni ya TFA na kuisababishia hasara ya mabilioni ya fedha na hakuna hatua endelevu alizozichukua ili kuinusuru TFA.

Mshiu alisema alianza kazi TFA akiwa na umri wa miaka 18 na baadae kusomeshwa hadi chuo kikuu huku akiwa ameikuta TFA na mtaji wa shilingi milioni 200 na sasa ameondolewa madarakani kibabe huku akiwa ameacha mtaji wa zaidi ya shilingi bilioni 22 na  matawi kumi na mbili nchini nzima.