Rais wa Zanzibar Dk Shein Azungumza na Mwakilishi wa AfDB

STATE HOUSE ZANZIBAR

OFFICE OF THE PRESS SECRETARY

PRESS RELEASE

Zanzibar                                                                                                                          21.12.2016

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein amezipongeza juhudi zinazochukuliwa na Benki ya Maendeleo ya Afrika (AfDB) kwa kuendelea kuiunga mkono Zanzibar katika kuimarisha sekta za maendeleo.

Dk. Shein aliyasema hayo leo, Ikulu mjini Zanzibar wakati alipofanya mazungumzo na  aliyekuwa Mwakilishi Mkaazi wa Benki ya Maendeleo ya Afrika (AfDB) Dk. Tonia Kandiero, aliyefika Ikulu kwa ajili ya kumuaga baada ya  kupewa majukumu mengine ya kuwa Mkurugenzi Mkuu wa Benki ya (AfDB) Kuisini mwa Afrika.

Dk. Shein alitumia fursa hiyo kutoa shukurani  zake binafsi kwa kiongozi huyo pamoja na  Benki ya (AfDB) kwa namna inavyotoa ushirikiano wake kwa Serikali ya Mapinduzi ya Zanzibar katika kuimarisha miradi ya maendeleo hapa nchini.

Katika mazungumzo hayo, Dk. Shein alieleza kuwa Benki ya (AfDB) imekuwa ikichukua juhudi za makusudi katika kuhakikisha miradi mbali mbali ya maendeleo hapa Zanzibar inaimarika na kuendelea kuwasaidia wananchi wote wa Unguja na Pemba.

Alisema kuwa (AfBD) siku zote imekuwa mstari wa mbele katika kuhakikisha Zanzibar inapata mafanikio katika kuendeleza miradi yake mbali mbali ya maendeleo ya kiuchumi na kijamii hivyo, Dk. Shein alizipongeza juhudi hizo ambazo zimekuwa chachu katika maendeleo ya Zanzibar.

Kwa upande wa uimarishaji wa sekta ya maji katika Mkoa wa Mjini Magharibi, Dk. Shein alieleza kuwa Serikali ya Mapinduzi ya Zanzibar imefaidika kwa kupata mkopo wenye masharti nafuu kutoka Benki hiyo ambao utasaidia katika kutatua changamoto ya uhaba wa maji katika  Mkoa huo na si muda mrefu changamoto hiyo itakuwa historia.  

Alieleza kuwa uhaba wa maji  umekuwa ni changamoto kwa baadhi ya wakaazi wa mji wa Zanzibar kwani hiyo ni kutokana na kuongezeka kwa idadi ya watu hapa nchini sambamba na tatizo la tabianchi ambalo linapelekea maji kupungua kwa kiasi kikubwa katika vyanzo vyake.

Pamoja na hayo, Dk. Shein alipongeza hatua za Benki hiyo katika kuiunga mkono Serikali ya Mapinduzi ya Zanzibar kwenye sekta ya Mawasiliano ya barabara kwa  Unguja na Pemba ambazo zipo zilikuwa zimemalizika pamoja na zile ambazo zinatarajiwa ujenzi wake kuanza na nyengine kuendelezwa.

Alieleza kuwa  miradi ya barabara  kisiwani Pemba itasaidia katika kuendeleza sekta za maendeleo ikiwemo sekta ya utalii sambamba na juhudi nyengine zinazoendelelea kuchukuliwa na serikali kisiwani humo ikiwemo uimarishaji wa uwanja wa ndege ambayo nayo itachangia kukua kwa sekta hiyo ya utalii kisiwani humo.

Aidha, Dk. Shein alisema kuwa mbali ya Benki hiyo kutoa ushirikiano wake katika kuimarisha sekta mbali mbali za maendeleo hapa nchini  zikiwemo maji, barabara, kilimo, nishati, afya, elimu na utawala bora pia, imeweza kutoa mashirikiano katika nyanja nyengine za kijamii, kiuchumi na kimaendeleo.

Nae aliyekuwa Mwakilishi  Mkaazi huyo wa Benki ya Maendeleo ya Afrika (AfDB) Dk. Tonia Kandiero alimueleza Dk. Shein kuwa Benki yake itaendelea kuiunga mkono Serikali ya Mapinduzi ya Zanzibar kwa kutambua na kuthamini juhudi inazozichukua katika kuleta maendeleo endelevu hapa nchini.

Dk. Kandiero alipongeza na kusifu mashirkiano mazuri yaliopo kati ya Benki hiyo na Serikali ya Mapinduzi ya Zanzibar chini ya uongozi wa Rais Dk. Shein na kueleza kuwa hatua hiyo imesaidia sana katika kuleta maendeleo zaidi hapa Zanzibar.

Kiongozi huyo alimuhakikishia Dk. Shein kuwa miradi yote inayosimamiwa na Benki hiyo itakamishwa ikiwemo miradi ya ujenzi wa barabara zikiwemo barabara ya  Mahonda -Mkokotoni yenye urefu wa km 31, Fuoni -Kombeni km 8.6, Pale- Kiongele km 4.6 na Matemwe -Muyuni yenye urefu wa km 7.6.

Pamoja na hayo, Dk. Kandiero ambaye amefanya kazi zake hapa Tanzania kwa takriban miaka sita, alimueleza Dk. Shein kuwa (AfDB) itaimarisha zaidi uhusiano na ushirikiano wake na Serikali ya Mapinduzi ya Zanzibar na kutoa  pongezi za pekee kwa Dk. Shein na serikali anayoiongoza kwa kusimamia vyema miradi ya maendeleo.

Rajab Mkasaba, Ikulu Zanzibar

Postal Address: 2422 Tel.:0777427449. Fax: 024 2231822 

 E-mail: rajabmkasaba@yahoo.co.uk