ZEC yaomba ushirikiano kufanikisha uchaguzi mdogo Pemba

Na Bakar Mussa , Pemba

Tume ya Uchaguzi Zanzibar, (ZEC) imewataka Wadau wa Uchaguzi katika Wadi ya Ng’ombeni Mkoani Pemba, kuipa mashirikiano Tume hiyo , ili iweze  kufanya Uchaguzi mdogo wa Wadi hiyo kwa misingi ya  Amani na Utulivu na Wasivipe   nafasi Vyama  vyao kupata kuwagawa  kwa misingi hiyo.

Akizungumza na  Wadau wa Uchaguzi wa Wadi ya Ng’ombeni , Mwenyekiti  ZEC, Zanzibar, Salmin Senga Salmin, huko Mkoani ,wakati alipokuwa akifunguwa Semina ya Wadau wa Uchaguzi wa Wadi hiyo ambao iliwashirikisha Wadau mbali mbali wakiwemo Wawakilishi wa Vyama , NGOs, watu wa Serikali na nk.

 Alisema kuwa Wadau  ni muhimu katika kuendesha Shughuli za Uchaguzi  kwa vile wao ndio Wapiga kura katika maeneo yao ambapo bila ya wao hauwezi kufanyika.

Mwenyekiti huyo aliwataka Wadau hao kuhakikisha kuwa Jazba za Kisiasa hazipewi nafasi katika Uchaguzi huo kwa kukumbuka kuwa wanaogombea wote ni watu wamoja na tafauti yao ni kwa Vyama lakini Umoja ni kitu muhimu.

 “ Vyama sipewe nafasi kuwagawa Wapiga kura kwani Vyma vitaondoka lakini Umoja wa Wazanzibar kwa vile ni ndugu hauondoki” alisema Mwenyekiti huyo.

Alifahamisha kuwa Utafanyika kwa mujibu wa Sheria za Uchaguzi zilizopo nchini, ambazo zilitumika katika Uchaguzi mkuu uliopita ambazo zimetungwa na Baraza la Wawakilishi.

Mwenyekiti huyo alisema kuwa Wapiga kura ambao wataruhusiwa kupiga kura hiyo ni wale tu ambao majina yao yamo katika Daftari la Kudumu la Wapiga kura, ambalo lilitumika katika Uchaguzi mkuu na sio vyenginevyo na kutumia Vitambulisho vyao vya Mzanzibar Mkaazi kama hapo awali.

Uchaguzi wa Wadi hiyo utafanyika kufuatia tarehe 23 /6 mwaka huu , kufuatia kifo cha cha aliekuwa Diwani wa Wadi hiyo, Massoud Khamis Omar , ambae alifariki tarehe 26/5/2012, ambapo Tume ya Uchaguzi imeshajiandaa.

Akitowa mada katika Semina hiyo, Msimamizi wa Uchaguzi Wilaya ya Mkoani, Seif  Salim Juma, alisema kuwa Uchaguzi mdogo wa Wadi hiyo utafanyika kwa mujibu Sheria ya Uchaguzi Namba 11 ya Mwaka 1984 kifungu cha 45(1) (b) .

Alifahamisha kuwa katika kufanikisha Uchaguzi huo Tume itatumia Daftari la kudumu la Wapiga kura lililotumika kwa Uchaguzi mkuu mwaka 2010  na kwa maana hiyo hakutokuwa na kazi ya Uandikishaji wapiga kura kwa Uchaguzi huo na inakadiriwa kuwa Wapiga kura 1,297.wataendesha zoezi hilo.

Seif, alieleza kuwa Tume ya Uchaguzi itaweka hadharani Daftari la Wapiga kura walioandikishwa  katika Wadi hiyo siku ya tarehe 15/5 /2013 , siku saba kabla ya siku ya Upigaji kura na kura zitapigwa katika Vituo ambavyo vilitumika katika Uchaguzi uliopita 2010 ambayo ni Skuli ya Maandalizi  Ng’ombeni .

Nae, Khamis  Issa Khamis, Mkuu wa Divisheni ya Sheria  Tume ya Uchaguzi Zanzibar, akitowa mada kwa Wadau wa Uchaguzi wa Wadi hiyo alieleza kuwa kuwa Uchaguzi huo wa Wadi ya Ng’ombeni, utaratibiwa na kuendeshwa  na Tume kwa mujibu wa Sheraia za Uchaguzi zilizopo kwa lengo la kuweka utaratibu mzuri na wazi wa kuwapata Viongozi wa Wananchi katika njia ya Kidemokrasia .

Alifahamisha kuwa Sheria hiyo imetumika tokea Uchaguzi wa Chama kimoja 1985 na 1990 na baadae kufanyiwa marekebisho makubwa  ili iendane na mfumo wa Vyama vingi vya Siasa ulioanzishwa mwaka 1992.

 “ Sheria hii imefanyiwa marekebisho mara nane ambapo marekebisho makubwa yaw aka 2002 na 2004 yalitokana na muafaka wa kisiasa katika ya Vyama vya CCM na CUF” alieleza Mwanasheria huyo.

Hata hivyo, alisema kuwa mambo ambayo yamekatazwa katika Chaguzi zilizofanyika pia zitatumika katika Uchaguzi huo na wala hakuna mabadiliko mengineyo.

Aidha , Afisa Habari na Mahusiano wa ZEC, Idrisa Haji Jecha, akitowa Mada kwa Wadau hao alisema kuwa Kisheria kazi ya kuendesha Uchaguzi mdogo wa Wadi ya Ng’ombeni ni ya Tume ya Uchaguzi ya Zanzibar, lakini Tume pekee haiwezi kufanya Uchaguzi bila ya kuwashirikisha Wadau.

Alisema kuwa Wadau wa Uchaguzi wanao umuhimu wa kipekee kwa vile kuosekna kwao katika mchakato wa Uchaguzi hupelekea Uchaguzi husika kuharibika na kuwepo kwao kunapelekea ufanisi katika Uchaguzi huo.

Jecha ,alisema kuwa ZEC, inahistoria ndefu ya kuwashirikisha Wadau wa Uchaguzi katika harakati mbali mbali za Kiuchaguzi , na inafanya hivyo kwa vile inaamini kuwa Wadau ni watu muhimu katika kuendesha Shughuli za Uchaguzi .

Alifahamisha   kwa kuwa Tume inatambuwa umuhimu wa Wadau ili kufanikisha Uchaguzi huo inawaomba Wadau hao , kufanikisha Uchaguzi huo, kwa kuhakikisha kuwa unafanyika kwa Amani na Utulivu, kusaidia Wananchi kuheshimu na kufuata Sheria za nchi na za Uchaguzi sambamba na kuwaelimisha Wananchi kutokiuka Sheria na maadili ya Ucahguzi nk.

Akifunga Semina hiyo Mjumbe wa Tume ya Uchaguzi ZEC, Ayoub Bakar Hamad, aliwataka Wadau hao kuwa na Uvumilivu wa kisiasa kwani kila siku zinapokwenda hali imekuwa mzuri kisiasa jambo ambalo halikutegemewa kama lingetokea.

 Mjumbe huyo, aliwasihi Wadau hao kuwa Amani, Utulivu na kuvumiliana iwe ni shauku ya Wazanzibar kabla na baada ya Uchaguzi  kufanyika , na Uchaguzi usiwe ni mada ya kuvuja Amani na yale mambo madogo madogo yanayotokea katika Uchaguzi ni vyema kukaa na kuyapatia ufumbuzi.

 Alisema kuwa yule atakae shindwa hakuna budi kukubali matokeo na kuwa tayari kusubiri mara nyengine na isigeuzwe kuwa ni agenda ya kufanyiana chuki na kuendeleza uhasama.

 Hivyo Tume imewaomba   Viongozi wa Vyama vya Siasa ngazi ya Wilaya ya Wadau wote wa  Uchaguzi huo kushiriki kikamilifu na kuhakikisha kuwa Amani na Utulivu vinadumu.