Makamu wa Kwanza wa Rais wa Zanzibar Mhe.Othman Masoud Azungumza na Balozi wa Tanzania Nchini Uturuki

MAKAMU wa Kwanza wa Rais wa Zanzibar Mhe. Othman Masoud Othman , (kulia) akizungunza na Balozi wa Jamhuri ya Muungano wa Tanzania nchini Uturuki Mhe.Balozi Idd Seif Bakari, aliyefika ofisi kwa makamu leo tarehe 10 Julai, 2023  kumuaga ili kuelekea kituo chake cha kazi.

MAKAMU wa Kwanza wa Rais wa Zanzibar Mhe. Othman Masoud Othman , (katikati ) akiwa na  Balozi mteule wa Tanzania nchini Uturuki (kushoto kwa makamu) Balozi Idd Seif Bakari, baada ya kumaliza mazungunzo yao wakati balozi huyo alipofika ofisini kwa makamu leo tarehe 10 Julai, 2023  kumuaga ili kuelekea kituo chake cha kazi

MAKAMU wa Kwanza wa Rais wa Zanzibar Mhe. Othman Masoud Othman , (kulia) akiwa katika picha ya pamoja na  Balozi mteule wa Tanzania nchini Uturuki Balozi Idd Seif Bakari, baada ya kumaliza mazungunzo yao wakati balozi huyo alipofika ofisini kwa makamu leo tarehe 10 Julai, 2023  kumuaga ili kuelekea kituo chake cha kazi.

( picha na ofisi ya Makamu wa kwanza wa Rais wa Zanzibar.)

Makamu wa Kwanza wa Rais wa Zanzibar Mhe. Othman Masoud Othman, amemtaka Balozi Mteule wa Tanzania nchini Uturuki kwenda kuimarisha mawasiliano na kutekeleza ipasavyo sera ya Diplomaisia ya Uchumi  kuishawishi nchi hiyo kuanzisha Kituo rasmi cha kuunganisha  shughuli za wafanyabishara na biashara  Tanzania.

Mhe. Othman ameyasema hayo Ofisini kwake Migombani mjini Zanzibar, alipokutana na kufanya mazungunzo na Balozi Mteule wa Tanzania nchini Uturuki , Balozi Iddi Seif Bakari aliyefika Ofisini kwa Makamu kumuaga akielekea kituo chake cha kazi baada ya kuteuliwa hivi karibuni  na Rais wa Jamhuri ya Muungano wa Tanzania Mhe. Samia Suluhu Hassan.

Amesema kwamba kituo hicho iwapo kitafanikiwa kuanzishwa pia kinaweza kuongeza wigo wake kwa kufanya shughuli zake sio tu kwa Tanzania, lakini pia kikafaidisha Kanda yote  ya Afrika Mashariki  kwa jumla  jambo  litakalosaidia juhudi za nchi za kuendeleza uchumi na kuimarisha maendeleo.

Mhe. Makamu amesema kwamba nchi ya Uturuki imepiga hatua kubwa za kimaendeleo hivi sasa kwa hivyo  ni muhimu kutumia fursa iliyopo ya mashirikiano  katika nyanja mbali mbali za viwanda na biashara,  elimu na maendeleo ya kijamii  kupitia uhusiano ulipo ili nchi iweze kunufaika na kuweza kupiga hatua.

Aidha Mhe. Makamu amemtaka balozi huyo kutumia uzoefu wake alioupata katika nchi nyengine ili wafanyabiashara wa Tanzania kufanya shughuli zao kwa kutumia mfumo na mtindo wa kisasa unaozingatia maendeleo ya Sayansi na Teknolojia kuchapuza kasi ya maendeleo ya Taifa.

Kwa upande mwengine Mhe.Othman amemueleza balozi huyo kwamba pia kuangalia  , kuchambua na kuainisha vipaji na taaluma waliyonayo watanzania wanaoishi Uturuki ili waweze kusaidia nchi yao katika nyanja mbali mbali kama zinavyofanya baadhi ya nchi nyengine duniani .

Amesema kwamba ni dhahiri  kwamba wapo watanzania wengi wanaoishi katika nchi hiyo ambao wana vipaji vingi,  elimu, ujuzi na maarifa makubwa wanayoweza pia kuyatumia kuyaleta nyumbani kusaidia nchi yao iwapo wanaunganishwa na kuratibiwa vyema kupitia balozi za nchi wanazoishi.

Naye Balozi Mteule wa Tanzania nchini Uturuki Balozi Idd Seif Bakari, amemueleza Mhe. Makamu kwamba atafanya kila juhudi kuitangaza Tanzania hasa katika sekta ya utalii ikiwa ni pamoja na kufanya ushaiwishi wa kutumia shirika la Ndege la Uturuki kuitangaza Tanzania hasa Zanzibar kiutalii kupitia safari zao za ndege za kila siku.

Aidha Balozi Idd amesema katika kuendesha biashara ya utalii kuna haja ya Tanzania hasa Zanzibar kuiga mifumo ya uendeshaji  bishara  kutoka nchi nyengine kwa kupanga na kutenga maeneo maalumu ya biashara hiyo kuepuka mtindo wa kufanya kila eneo nchini kuwa ni la utalii.

Hata hivyo, amesema kwamba suala la kuitangaza nchi kiutalii hasa Zanzibar litakuwa nikipaumbele chake hasa kwa kuzingatia kwamba nchi anayokwenda kuiwakilisha Tanzania inafanya vizuri na kudiriki kukusanya hadi dola bilioni 16 kwa mwaka zinazotokana na utalii jambo ambalo  ni muhimu kutumia uzoefu wao kusaidia  Zanzibar.

 Kitengo cha Habari

Ofisi ya Makamu wa Kwanza wa Rais wa Zanzibar

10 Julai , 2023.