MDAHALO WA WAGOMBEA URAIS WA ZANZIBAR - HOTELI YA OCEAN VIEW - KILIMANI

Waandaaji mdahalo waeleza sababu mgombea Urais CCM kushindwa kuhudhuria
Na Mwanajuma Abdi

MSIMAMIZI wa mdahalo wa wazi wa wagombea Urais Zanzibar na Jumuiya ya Kiraia, Abubakar Mohammed Ali amesema mgombea CCM, hakushiriki mdahalo uliofanyika jana kutokana na Serikali ya Mapinduzi Zanzibar kushirikiana na jumuia hizo kuandaa sheria namba sita ya 1995 kuruhusu kuanzishwa kwake.

Mdahalo huo ni kwa ajili ya serikali itakayoundwa baada ya uchaguzi mkuu wa Oktoba 31.
Abubakar alitoa ufafanuzi huo kabla ya kuanza mdahalo huo, katika Hoteli ya Zanzibar Ocean View mjini hapa.

Mdahalo huo ulihudhuriwa na mgombea mmoja wa Urais wa Zanzibar kupitia Chama cha CUF, Maalim Seif Sharif Hamad, ambapo wagombea wa vyama vyengine vitano vikiwemo vya TADEA, NCCR Mageuzi, AFP, NRA na Jahazi Asilia, hawakujitokeza kwa maelezo wanataka walipwe posho zikiwemo za usafiri.

Msimamizi huyo alisema mgombea mmoja ambaye yuko Pemba alitaka alipwe posho la shilingi 80,000 pamoja na usafiri, ambapo alisisitiza kwamba hao hawako tayari kwa nafasi ya urais wa Zanzibar.

Akijibu maswala, Maalim Seif Sharif Hamad alisema iwapo atapata ridhaa ya kuongoza atazijengea uwezo wa kitaalamu asasi za kiraia katika kuandika miradi mbali mbali, kutunza kumbukumbu na fedha zao katika kuwaletea maendeleo wananchi.

Alisema asasi za kiraia zina mchango mkubwa katika hivyo ataweka Idara maalum itayosimamia jumuiya hizo pamoja na kuwapatia misaada ya kujiendesha na kuondokana na utegemezi wa wafadhili kutoka nje ya nchi.

Aidha alieleza amekusudia kuanzisha taasisi ya kuzuia na kupambana na rushwa ili kudhibiti mapato ya serikali katika kuwaletea maendeleo wananchi.

Akizungumzia suala la watu wenye ulemavu, alifahamisha kuwa, katika CUF inakusidia kuweka takwimu za watu wenye ulemavu wa aina tofauti ili kuweza kuwapatia mahitaji yao ikiwemo elimu, huduma za afya, kujenga majengo yatayowarahisishia kufika na kuwachagua katika nafasi za maamuzi .

Mgombea huyo, alieleza amekusudia kuviunganisha vyombo vya habari vya Serikali ikiwemo Televisheni Zanzibar na Sauti ya Tanzania Zanzibar kwa kuligeuza kuwa Shirika la Utangazaji la Zanzibar, ambalo litaongozwa na Mkurugenzi Mtendaji kama TBC

MGOMBEA Urais kupitia Chama Cha CUF Seif Shariff Hamad akitowa Sera za Chama cha katika Mdahalo ulioandaliwa na Azaki za Kiraia kwa wagombea Urais wa Zanzibar uliofanyika katika ukumbi wa Hoteli ya Zanzibar Ocean View Kilimani.

WAANGALIZI wa Uchaguzi wa Zanzibar kutoka nje ya Nchi na Ndani wakifuatilia mdahalo uliondaliwa na Azaki za Kiraia kwa Wagombea wa Urais Zanzibar.

VIONGOZI wa Azaki za kiraia wakifuatilia mdahalo wa wagombea Urais wa Zanzibar wakitowa sera Mgombea wa CUF Seif Shariff Hamad akitowa sera za Chama chake. WAANDISHI wa Habari wa Vyombo mbalimbali vilioko Zanzibar wakifuatilia Mdahalo katika ukumbi wa Hoteli ya Zanzibar Ocean View Kilimani.

KIJANA anayeonesha kwa ishara za mikono kuashiria kutowa ishara kwa watu wanye ulemavu wa kutosikia walioshiriki katika mdahalo huo.

BAADHI ya Viongozi wa chama cha CUF wakimsikiliza Mgombea wao wa nafasi ya Urais wa Zanzibar Seif Shariff Hamad akitowa sera za chama chake katika mdahalo wa Wagombea Urais uliofanyika hoteli ya Zanzibar Ocean View

BAADHI ya Viongozi wa Azaki za kiraia wakiwa katika chumba cha mdahalo wa wagombea Urais wa Zanzibar uliofanyika Hoteli ya Zanzibar Ocean View Kilimani.