Tumeshasahau?

Na A K Simai

Usiku wa kuamkia tarehe 10/09/2011 ni usiku palipotokea tukio kubwa la kusikitisha ambalo halijawahi kutokea katika visiwa vya Zanzibar ambapo meli ya Abiria ya Spice Islander-1 ilizama katika eneo la Nungwi na kupoteza maelfu ya wananchi wa visiwa hivi wa kike kwa kiume, wakubwa na wadogo ikiwa katika safari yake iliyoanzia bandari ya Dar kisha Unguja na kuelekea Pemba.

Ni tukio liliitikisa nchi kwa mtikiso ambao haujawahi kutokea ambapo kila familia iliguswa kwa uzito wake kwa kupoteza baba, mama, mtoto, mjukuu, jamaa, ndugu, rafiki, jirani au sahiba.

Nchi iliijiinamia kwa masikitiko, huzuni na simanzi huku kila mmoja wetu akitasawari na kutafakari na kujaribu kupata maana halisi ya tukio lile kutokea katika visiwa vyetu tunapata mazingatio gani?

Kinachonisikitisha tena masikitiko yenye huruma kwamba tarehe hii 10/09/2012 imetupita kimya si kwa Serikali au wananchi walioweza kutukumbusha  kwa kumbukumbu ya aina yoyote ile maafa mazito yaliyotokea tarehe hii. Tena ni mwaka mmoja tu tokea kutokea kwake. Niwekeni sawa kama nitakuwa nimekosea.

Imenikumbusha tukio zito lilitokea September 11 mwaka 2001 Marekani wakati miongoni mwa majengo marefu duniani ya Twin Tower yalipodondoshwa na ndege zilizotekwa nyara. Kila ikifika tarehe hii imekuwa ni tukio la kitaifa na kuna kumbukumbu maalum pamoja na ibada hufanyika kwa wenzetu. Wamarekani zaidi ya Elfu tatu walifariki.

Waingereza walipofikwa na maafa ya Julai 07 2005, kila mwaka tarehe hii hukumbukwa ambapo Waingereza takriban 52 walipoteza maisha yao katika tukio la kigaidi.

Ilipozama Mv Bukoba mwaka 1996 katika ziwa Victoria bado kuna kumbukumbu maalum ambayo hufanyika kuwakimbuka na kuwaenzi waathrika wa ajali ile iliyotokea takriban miaka 16 iliyopita.

Alipouawawa Marehemu Abeid Amani Karume, Rasi wa kwanza wa Zanzibar, tarehe 07/04/1972, tarehe hii imekuwa ni tukio la kitaifa na siku ya mapumziko ambapo mpaka hii leo ikifika tarehe hii kila mwaka, Viongozi na wananchi  hukusanyika kwa kumkumbuka na kusoma dua.

Zanzibar, tarehe hii, ilipoteza zaidi ya wananchi 1000 ambao Mola Subhaanahu Wata’ala alishawaandikia kwamba siku hii ndiyo watakayoondoka katika ardhi yake.

Muumba anapoleta majanga na maangamizo ya aina yoyote hutuletea kwa lengo la kupata ‘ibra – mazingatio. Ni ‘ibra gani tuliyoipata? Ni mazingatio gani tuliyoondoka nayo?  

Tuliona vipi Viongozi wa Serikali walivyolisimamia suala lile pamoja na kufanya jitihada za kuwapa pole wafiwa na kupokea misaada anuwai kwa anuwai ya kihali na kimali hivi kweli tarehe hii imepita wala habari hatuna?

Hata upande wa vyombo vya habari  kweli jambo hili liliweza kukumbukwa visiwani  maana tukiangalia kwenye mitandao na magazeti hatuoni sehemu yoyote ambayo inatukumbusha tukio la kuzama kwa Mv Spice Islander 1.

Kukumbuka si lazima tuiweke siku hii kuwa ya mapumziko tunaweza kufanya mapitio (review) tokea kutokea kwa tukio lile mwaka mmoja uliopita na mpaka hivi sasa tuko wapi katika kuboresha usalama wa vyombo vyetu vya baharini?  ( Sitaki kugusia Mv Skagit hapa si pahala pake).

Tungeliweza kufanya Semina, warsha na kuangalia hatua au mapendekezo yaliyopendekezwa na Tume iliyochaguliwa na Rais yepi yamefanyiwa kazi na yepi yameachwa na kujaribu kutaka kupata sababu ni kwanini.

Kukumbuka si lazima tusome hitima, tunaweza kujaribu kuwaangalia walioathirika na maafa ya Mv Spice Islander vipi hali zao baada ya kuondokewa na wanaowategemea, vipi misaada walioipata iliwasaidia vipi. Vipi wameweza kukabiliana na maisha.

Kukumbuka si lazima tufanye hauli bali ni kujaribu kuwa karibu na waathirika wa Mv Spice Islander na kuwaonesha kwamba tukio lile ni msiba wetu wote kwa pamoja na tupo pamoja na tutaendelea kuwa pamoja na hapa waathirika ambao wengi walikuwa ni wananchi wa kipato cha chini wangeliweza na wao kujihisi japo kwa kiasi fulani kwamba nao wanaenziwa na utu wao unaheshimika katika nchi waliyozaliwa kukulia na hatimae kumaliza maisha yao.

Sijabahatika kuona tamko lolote katika mitandao au magazeti au hata kwenye blogs ambapo kuna mmoja wetu labda anatukumbusha kumbukumbu hii muhimu.

Hivi ni kweli ndio tayari tumeshasahau?