Moto wa ‘ajabu’ Pemba Nyumba zaendelea kuteketea L Wananchi wapiga kambi kusubiri kuuzima

Na Masanja Mabula, Pemba

  MOTO wa ajabu unaotokea katika mazingira ya kutatanisha bado unaendelea kuteketeza nyumba na mali za wananchi wa kijiji cha Tumbe Mashariki, jimbo la Tumbe, wilaya ya Micheweni, Mkoa wa Kaskazini Pemba.

Moto huo ambao ulianza kuteketeza tokea Septemba 28 mwaka huu , tayari umeteketeza nyumba zipatazo 13 hadi sasa huku baadhi ya nyumba nyingine zikishuhudiwa vitu vya ndani kama  nguo zikiungua huku makabati yakibakia salama.

 na magodoro z ndivyo vinavyoteketea na nyumba kubaki salama .

Wakizungumza na mwandishi wa habari hizi baadhi ya wakaazi wa kijiji hicho walisema moto huo umekuwa ukitokea kutokana na imani za kishirikina.

Walisema wananchi wa kijiji hicho wamepatwa na hofu kubwa, kwa sababu moto huo hutokea katika mazingira yasiyotarajiwa.

Moto huo umesababisha hali ya umaskini kutokana na wananchi kutumia muda wao mwingi ewakiwa nyumbani wakisubiri kukabiliana na moto huo pindi unapotokea.

Wananchi hao walisema tokea kuanza kutokea  moto huo siku ya Ijumaa ya wiki iliyopita shughuli za kiuchumi zimezorota kwani wamekosa hata muda wa kushughulikia masuala ya uzalishaji mali jambo ambalo limekuwa ni kikwazo katika kujiletea maendeleo.

"Matukio haya kwa kweli yansababisha hali ya umaskini katika familia zetu kwani tunashindwa hata kwenda baharini kuvua, na hata watoto wetu wanakosa muda wa kujisomea kutokana na wasiwasi uliotanda juu ya usalama wa maisha kwa vile hatujui moto utatokea wakati gani,” alisema Khamis Salim Kombo.

Aidha alisema cha kushangaza zaidi ni kuona wakati mwengine kunaungua nguo na vitu vingine lakini mapaa ya nyumba yanabakia salama licha ya moto huo kukiripuka hadi kwenye mapaa.

Alisema katika tukio lililotokea katika nyumba yake bahasha ya nguo zilizokuwa zimeandaliwa kwa ajili ya kwenda kuoshwa ziliwaka na kuteketea  pamoja na godoro huku kitanda kikibaki salama jambo ambalo limewaweka katika wakati mgumu wa kujua chanzo cha moto huo .

Udadisi uliofanywa na mwandishi wa habari hizi kwa kuzungumza na wazee alipofika katika  katika kijiji hicho  wakati wa moto ukiendelea kuwaka , walisema kuwa zipo taarifa tofauti juu ya chanzo cha moto huo ambazo zinahusishwa na masuala ya  imani za kishirikina kulikosababishwa na kusahauliwa kwa masuala ya kijadi.

Ikiwa katika eneo la tukio gazeti hili lilishuhudia nyumba ya mzee Khatib Omar Kombo alikiwaka moto wakati mwenyewe akiwa amekwenda msikitini na wala hakukuwa na dalili zozote za kuwepo moto ndani ya nyumba hata hivyo wananchi waliwahi na kuuzima moto huo kabla ya kuleta madhara.

Taarifa zisokuwa rasmi zinasema kuwa  chanzo cha moto huo ni kukatwa mwembe kwa ajili ya kupisha ujenzi wa soko kijijini hapo huku chanzo chengine cha habari kikieleza kuwa baadhi ya wazee walipewa fedha kwa ajili ya kununua  ng’ombe wa mji lakini hawakutekeleza ahadi hizo.

Akizungumza na wananchi wa kijiji hicho Kamanda wa Polisi mkoa wa Kaskazini Pemba, Kamishna Msaidizi Mwandamizi, Yahya Rashid Bugi aliwataka wazee hao kuondoa imani za kishirikiana na kwamba njia pekee ya kuweza kuondoa tatizo hilo ni kwa wananchi hao kuongeza idaba,maombi na dua.

"Acheni kuamini masuala ya kishirikiana kuhusiana na matukio haya, nawaombeni kuwa njia pekee ni kuongeza ibada, maombi, dua na sala  na kwamba hii ni mitihani kutoka kwa Allah , endeleeni kuwa wavumilivu," alishauri Kamanda Bugi.

Kufuatia kuwepo na matukio hayo wananchi wa Tumbe Mashariki katika kijiji cha Kaliwa wameandaa maombi maalum kwa ajili kuomba kuondoshewa kwa kadhia hiyo ambayo imenaweka roho za watu juu na kwapa wasi wasi juu ya mustakabi wa maisha yao na mali zao.

 Kijiji cha Tumbe kilikuwa maarufu sana kwa masuala ya matambiko ya kijadi kila mwaka, kama ilivyo kijiji cha Makunduchi.