Dk Islam: Dawa wagonjwa wa akili ziwafikie Walengwa

  Na Raya Hamad, OMKR

Naibu Katibu Ofisi ya Makamu wa Kwanza wa Rais Dk Islam Seif  amekiomba Kitengo  kinachosimamia huduma za Afya ya Akili kusimamia vyema zoezi la  usambazaji wa dawa za wagonjwa wa akili ili ziwafikie walengwa kwa wakati.

Dk Islam ameeleza hayo  Ofisini kwake Migombani mara baada ya kupokea dawa mbali mbali za wagonjwa wa akili na matatizo mchanganyiko kutoka kampuni ya PISAM 2008 Investiment  limited ambayo ilishinda na kupata kazi ya kununua dawa na vifaa visaidizi  kupitia  bodi ya zabuni ya Ofisi ya Makamu wa Kwanza wa Rais .

Jumla ya aina 12 za dawa mbali mbali  zimekabidhiwa kwa wataalamu wa  kitengo cha huduma za afya ya akili  kwa ajili ya uhifadhi na maelekezo ya matumizi  kwa wagonjwa wa akili na matatizo mchanganyiko zikiwemo dawa za kutuliza maradhi ya kifafa,maradhi ya wasiwasi na sonona .

Nae mratibu wa  huduma za wagonjwa ya akili  Nd  Suleiman kwa niaba ya Wizara ya Afya ameishukuru Ofisi ya Makamu wa Kwanza wa Rais kwa kutoa dawa hizo ambazo zinaendana na mahitaji ya wagonjwa waliopo.

Aidha Suleiman amesema watakaofaidika zaidi na dawa hizo  ni watu walioko vijijini ambao mara nyingi wamekuwa wakisumbuka kwenda na kurudi kufuata dawa  katika Hospitali ya wagonjwa wa akili.

Hata hivyo mratibu huyo amewahakikishia wananchi kuwa dawa hizo ni salama hazina matatizo na bado hazijapitwa na wakati  .   

 Jumla ya shilingi Milioni 300 zilitengwa na Serikali ya Mapinduzi Zanzaibar kupitia Ofisi ya Makamu wa Kwanza wa Rais katika kipindi cha Bajeti ya 2012-2013 kwa ajili ya kununulia dawa na vifaa visaidizi  za walemavu wa akili .

Dawa zilizokabidhiwa  zimegharimu shilingi  Milioni thamanini na saba na hamsini na nane elfu