Polisi watumia risasi kuwanusuru watuhumiwa wa wizi

Na Rose Chapewa, MBEYA

POLISI Mkoani Mbeya, wamefyatua risasi kuwatawanya wananchi wenye hasira, waliokuwa wakijaribu kuwachoma moto wanawake wawili, waliowatuhumu kuwa wezi.

Kamanda wa Polisi Mkoani Mbeya,Ahmed Msangi  alisema tukio hilo limetokea juzi saa  17.50. jioni  eneo la la Mwanjelwa  kata ya Manga, baada ya wanawake hao kuzingirwa na wananchi wakiwa kwenye duka la mfanyabiashara mmoja.

Aliwataja wanawake  hao walionusurika kuuawa  kuwa ni  Rukia Rashind (24) Jamila Abdalah

(38),wakazi wa  Tunduma  wilaya ya Momba na kwamba wanashikiliwa na polisi  kwa mahojiano zaidi.

Alisema watuhumiwa hao waliingia  katika duka la mfanyabiashara aitwaye Janeth  Sivanus (28) wakiwa wamevalia nguo zinazoficha nyuosa zao na kuiba vitambaa vya vyenye thamani ya  shilingi 2,400,000.

Alisema kabla ya kufanya wizi huo, wanawake hao  waliuliza vitambaa hivyo na kisha mtuhumiwa mmoja alikwendelea kumsemesha muuzaji wa duka ambaye alikuwa akiendelea kuhudumia wateja wengine huku mtuhumiwa wa pili akiiba.

Alisema baada ya  kuiba vitambaa hivyo na kuondoka pasipo mwenye duka kujua, majirani  walimjulisha mwenye duka juu ya tukio hilo na ndipo jitihada zilianza za kuwafuatilia watuhumiwa hao na kufanikiwa  kuwakamata karibu na nyumba ya kulala wageni ya   Mfikemo iliyopo mtaa Jua Kali wakiwa na vitambaa hivyo.

Alisema baada ya kukamatwa lilijitokeza kundi la wananchi likiwa na silaha lililotaka kuwashambulia huku wakiwa na adumu ya petrol, lakini wakati wakijiandaa kutekeleza unyama huo polisi walifika na kufyatua risasi hewani kuwatawanya na kuwaokoa wanawake hao.

Kamanda Msangi alitoa wito kwa jamii kuacha tabia ya  kujichukulia sheria mkononi kwani sio tabia nzuri na  ni  kinyume cha sheria.