Wanafunzi 1,222 wafaidika huduma ya maji

Na Hanifa Salim PEMBA

JUMLA ya wanafunzi 1,222 na walimu 13 katika skuli ya Kangagani msingi na sekondari mkoa wa kaskazini Pemba,  wamefaidika na mradi wa maji ulitolewa na Jumuiya ya Zanzibar Outreach Program (ZOP) kwa lengo la kudumisha afya zao.

Mradi huo, uliozinduliwa rasmi Machi 5 mwaka huu katika skuli hiyo umegharimu shilingi milioni 4.5 ni kwa ajili ya wanafunzi na walimu wa skuli hiyo.

Mwalimu mkuu wa skuli ya sekondari Kangagani, Hasina Ali Makame, alitoa shukurani zake za dhati kwa ZOP kwa kuondoa changamoto iliyokuwa ikiwakabili kwa muda mrefu.

Kwa upande wake, Katibu wa ZOP, Dk. Nofal Kassim Mohamed, aliwataka walimu na wanafunzi wa skuli hiyo kutumia vizuri mradi huo ili udumu kwa muda mrefu.

Alisema anatarajia mradi huo utaondoa tatizo la uhaba wa maji lililokuwa likiwakabili wanafunzi na walimu hali iliyosababisha kwenda nyumba za jirani kuomba maji.

Nae, daktari wa meno kituo cha afya Micheweni, Abeid Zubeir Khamis, alisema ZOP wataendelea kuimarisha huduma za afya hasa kwa wananchi wa vijijini.