Wawili wafa kwa ajali

Na Khamisuu Abdallah

ASKARI Polisi wa Kikosi cha Valantia Zanzibar (KVZ), amefariki dunia baada ya vespa aliyopanda kuacha njia na kugonga mti katika maeneo ya Chukwani nje kidogo ya Mji wa Zanzibar.

Akithibitisha kutokea kwa tukio hilo, Ofisini kwake Muembemadema Kamanda wa Polisi Mkoa wa Mjini Magharibi Mkadam Khamis Mkadam wakati akizungumza na mwandishi wa habari hizi alisema tukio hilo lilitokea Agosti 5 mwaka huu majira ya saa 4:30 za usiku.

Aidha kamanda Mkadam alimtaja askari huyo kwa jina la Juma Ameir Pandu (30) ambae ni askari polisi wa kikosi hicho na kueleza kuwa aliumia sana sehemu za kichwani na kufariki dunia mara tu baada ya kufikishwa Hospitali kuu ya Mmnazimmoja na kukabidhiwa jamaa zake kwa mazishi.

Alisema ajali nyengine ilitokea Agosti 6 mwaka huu majira ya saa 9:20 jioni huko Kinazini Backlays na kusababisha kifo cha kijana Rajab Ali Makame (38) mkaazi wa Amani Wilaya ya Mjini Unguja.

Alisema ajali hiyo ilihusisha vespa yenye namba za usajili Z 293 AD iliyokuwa ikiendeshwa na kijana Juma Omar Mussa (49) mkaazi wa Darajabovu baada ya kuigonga kwa nyuma gari yenye namba za usajili Z 316 CU P/H iliyokuwa mbele yao ikiendeshwa na Miraji Makame Hassan (36) mkaazi wa Mpendae waliokuwa wakielekea upande wa Saateni.

Hata hivyo alisema katika ajali hiyo vijana hao waliumia na kwa bahati mbaya Rajab ambae alipakiwa alipata madhara makubwa kichwani kwake na kupotaza damu nyingi hadi kusababisha kifo chake.

Hivyo Kamanda Mkadam aliwataka madereva wanaondesha vyombo vya moto hasa vya maringi mawili kuvaa kofia maalum ambazo zitakuwa ili kunusuru vichwa vyao.