TAMWA yapongeza wakazi wa Mbezi kwa kueleza hisia zao kwa vitendo

Na Mwandishi wetu

CHAMA  cha Wanahabari Wanawake Tanzania (TAMWA) kimewapongeza wakazi wa mtaa wa Msigwa-Mbezi kwa Msuguri jijini Dar es Saaam kwa kuchukua hatua za pamoja kulaani kitendo cha kulawiti kilichofanywa na mtu mmoja alietajwa kwa jina la (40) kwa mtoto mwenye umri wa miaka  mine.

Tukio hilo la ukatili lililofanywa na mtuhumiwa hivi karibuni lilipelekea wakazi wapatao 23 kuandamana hadi ofisi za TAMWA zilizoko Sinza Mori wakiomba msaada wa kisheria ili sheria iweze kuchukua mkondo wake baada ya kutoridhika na mwenendo wa kesi inavyoendeshwa.

“Tumekuja TAMWA kulaani kitendo cha ulawiti wa mtoto kilichofanywa na huyu baba mtu mzima. Sisi kama majirani tumeona ni lazima tuchukue hatua na hatua yenyewe tulioichukua ni kuja hapa kwenye shirika hili kuomba msaada kwani tunaamini linaweza kusaidia kupatikana kwa haki,” alisema kwa uchungu mmoja wa wakaazi wa mtaa huo.

Mkazi huyo alisema wameamua kuifuata taasisi ya hiyo baada ya kumuona mama wa mtoto huyo hajaridhika na mwenendo wa kesi na hivyo kuiomba TAMWA iingilie kati ili  serikali isikie sauti yao na kuhakikisha inasaidia katika upatikanaji wa haki ya mtoto huyo.

Hatua ya wakazi hao inatokana na elimu inayotolewa na TAMWA, kupinga vitendo ya ukatili na unyanyasaji wa kijinsia hasa kupitia mradi wake wa Kujenga na kuimarisha usawa wa kijinsia na kutokomeza ukatili dhidi ya wanawake na watoto-(GEWE II). 

TAMWA kupitia kituo chake cha usuluhishi cha (CRC) kwa mwaka 2013 kilipokea jumla ya kesi 202 zinazohusu ukatili na unyanyasaji kwa watoto ambapo wilaya ya Kinondoni ilipokea kesi 41, Temeke kesi 95 na wilaya ya Ilala ilikuwa na kesi 66.