Wanaharakati wataka marekebisho mswada sheria ya Kadhi

Na Husna Mohammed

Uelewa mdogo wa wanawake katika suala zima la mgawanyo wa mali hasa kwa wanadoa kwa kiasi kikubwa kunsababisha kukosa haki zao mara baada ya ndoa kuvunjika.

Akizungumza na vyombo vya habari ofisi ya Chama cha Waandishi wa Habari Wanawake Tanania (TAMWA) Zanzibar, Ofisa miradi wa chama hicho, Asha Abdi Makame, alisema wanawake wengi wanakosa haki zao hata kama wamechuma wote mali na mwanamme wakati wa ndoa.

Alisema sheria ya Kadhi namba 3 ya mwaka 1985 imekosa mashiko ya mgawanyo wa mali kwa wanandoa na hivyo kusababisha malalamiko kwa wanandoa hasa wanapotengana.

 “Tumepata habari kuwa hata hiyo sheria ya kadhi iliyofanyiwa marekebisho haikugusia kwa undani kipengele hicho hivyo tunataka taasisi husika kuliona hilo na kulifanyia kazi kabla ya kufikishwa barazani kujadiliwa,” alisema.

Alisema wanaume wanaitumia fursa hiyo  kuoa kila siku na kuwatumia baadhi ya wake zao kama kitega uchumi kwa kuwa hakuna sheria ya kuwadhibiti.

“Talaka zimekuwa kama njugu kwa kuwa hakuna kidhibiti cha sheria kwa wanandoa wanaoachana jambo ambalo hata wanaume hawatumii ihsani ya kumrudi mali mke huku akimwacha  na watoto bila ya matunzo yoyote,” alisema.

Alisema mbali na mahakama ya kadhi kutoa amri ya utunzaji wa watoto kwa mtalaka mwanamke, lakini mahitaji ni madogo ikilinganishwa na huduma husika ya watoto anaoachiwa mwanamke.

Akiwasilisha matokeo ya utafiti mdogo juu ya uwelewa wa wananchi kuhusiana na mgawanyo wa mali, Mwajuma Juma, alisema hali uelewa kwa jamii bado ni mdogo na taaluma inahitajika zaidi.

 “Tumezungumza na makadhi na viongozi wa dini ya kiislamu wanasema haki ya mali ni hiba tu kwa mwanamke au mtalaka wakati wa kutengana na si sheria na kinyume na hivyo ni kwenda kinyume na sheria ya kadhi inayoendana na misingi ya dini ya kiislamu,” alisema.

Alisema mwanawake mmoja kati ya 10 ndie anaejua suala la kuandikiana hasa kwa mali wanaochuma wote.

Nae Sada Said Issa, ambae ni Ofisa Mipango wa ZAFELA, alisema chama hicho kiliipitia sheria hiyo na kutoa mapendekezo yake ambapo kwa sasa yako katika mchakato wa Makatibu Wakuu kwa ajili ya kuwasilishwa Baraza la Wawakilishi.

Sambamba na hilo alisema kutokuweko kwa sheria ya ndoa Zanzibar,kwa kiasi kikubwa kunasababisha matatizo mengi ya ndoa ikiwemo mgawanyo wa mali.

Alizitaja nchi za Malaysia, Singapore, Indonesia na nchi nyengine za kiislamu zinatumia sheria kuweka mazingira mazuri kwa wanandoa, jambo ambalo hata Zanzibar inaweza kuiga.

Mkutano huo uliandaliwa na TAMWA ikiwa ni katika ukamilishaji wa mradi wa GEWE unaofadhiliwa na Shirika la DANIDA ambao  unaomaliza muda wake mwezi huu.