Semina ya kutoa elimu ya uandikishaji na uendelezaji wa daftari la kudumu la wapiga kura kwa vijana wa Wilaya ya Magharibi

Na Takdir Ali –Maelezo Zanzibar.

Viongozi wa vyama vya siasa na Dini wametakiwa kuwashajiisha wafuasi wao kushiriki katika daftari la kudumu la wapiga kura ili kuweza kujikinga na matatizo mbali mbali yanayoweza kujitokeza ikiwemo kokosa haki zao.

Amesema Daftari la kudumu la wapiga kura lipo kisheria si kwa matakwa ya kisiasa hivyo viongozi hao wanapaswa kutumia nafasi zao kuwaelimisha wafuasi wao kushiriki kujiandikisha katika daftari la kudumu la wapiga kura linaloendelea kuboreshwa.

Kauli hiyo imetolewa na Mkuu wa Wilaya ya Magharibi B Ayub Mohd Mahmoud wakati alipokuwa akifungua semina ya kutoa elimu ya uandikishaji na uendelezaji wa daftari la kudumu la wapiga kura kwa vijana wa Wilaya ya Magharib A na B hapa Mwera Wilaya ya Magharibi B.

Amewaaleza vijana kuwa mara baada ya kuanza kwa mfumo wa vyama vingi vya siasa mwaka 1992,hali ya siasa Zanzibar haikuwa nzuri lakini juhudi za viongozi walizochukuwa zimepelekea hali hiyo kutulia, kwa hiyo si vizuri kwa wazee kuwaachia watoto wao au wajukuu zao Zanzibar isiokuwa na amani na utulivu.

“Tumerithi nchi yetu kutoka kwa wazazi wetu ikiwa katika hali ya amani na utulivu sivizuri hata kidogo kuwaachia watoto na wajukuu zetu wakiwa katika nchi isiyokuwa na amani na utulivu,” alisema Ayub.

Aliongeza kuwa vijana kutoyajua yaliyopita  na kujua yaliopo  hivi sasa yanapelekea kukosa nafasi ya kufikiri zaidi katika kutoa maamuzi jambo ambalo amesema wanaweza kutoa maamuzi yasiyo sahihi.

Mapema akitoa maelezo Afisa uandiskishaji wa Daftari la kudumu la wapiga kura Wilaya ya Magharibi Maalim Khamis Mussa  amesema ili kufanikisha Daftari hilo linaboreka zaidi  mashirikiano ya pamoja  ya  wadau mbali mbali ikiwemo  vyama vya siasa, vyama vya hiari na Wananchi wenyewe.

Mwalimu Khamis amesema kumekuwa na malalamiko kutoka kwa  wananchi kuwa kuna baadhi  ya majina ya  watu waliofariki ambao majina yao hayajaondolewa katika Daftari la kudumu  na kusema Tume ya Uchaguzi haina uwezo wa kuwaondoa waliokosa sifa katika daftari hilo bila ya wananchi kuenda kutoa vielelezo muhimu .

Wakichangia katika semina hiyo washiriki wameiomba Serikali ya Mapinduzi ya Zanzibar kupitia Tume ya Uchaguzi kuandaa mazingira mazuri ya kuwawezesha wananchi kushiriki katika daftari la kudumu la wapiga kura bila vikwazo vyovyote sambamba na kuweka wazi kuwa watakuwa mabalozi wazuri kwa wenzao ambao hawakupatata fursa hiyo muhimu ya kushiriki.