.JPG)
.jpg)
.jpg)
Mwenyekiti wa Kamati ya Sheria Utawala Bora na Idara Maalum Mhe. Machano Othman Akisoma Hutoba ya Maoni ya Kamati Kwa Wajumbe wa Baraza la Wawakilishi wakati wa Mkutano wa Baraza la Wawakilishi Chukwani Zanzibar.
HOTUBA YA MAONI YA
KAMATI YA SHERIA, UTAWALA BORA
NA IDARA MAALUM KUHUSU
MAKADIRIO YA MAPATO NA
MATUMIZI YA WIZARA YA
NCHI (OR) TAWALA ZA MIKOA,
SERIKALI ZA MITAA NA
IDARA MAALUM ZA SMZ KWA
MWAKA WA FEDHA
2018/2019
Mheshimiwa
Spika, awali ya yote naomba kutumia nafasi
hii kumshukuru Mwenyezi Mungu Mtukufu, Mwenye wingi wa Rehma, Muumba wa Mbingu
na Ardhi na vyote vilivyomo, kwa kutujaalia kukutana kwa mara nyengine tena,
asubuhi hii ya leo, katika Mkutano huu wa Kumi wa Baraza la Tisa kwa dhamira ya
kujadili Bajeti kuu ya Serikali na Taasisi zake, chini ya Baraza lako Tukufu.
Kwani hii ni rehma yake Muumba kwa kutupa pumzi na afya njema ambayo wenzetu
wengine amewanyima fursa hii.
Mheshimiwa
Spika, pia, napenda kutumia fursa hii adhim
kushukuru na kukupongeza wewe binafsi kwa kunipa nafasi hii ya kusimama mbele
ya Baraza lako Tukufu, kwa lengo la kuwasilisha maoni ya Kamati ya Kudumu ya Sheria, Utawala Bora na Idara Maalum
kuhusu Makadirio ya Mapato na Matumizi ya Fedha kwa Wizara ya Nchi (OR) Tawala
za Mikoa, Serikali za Mitaa na Idara Maalum za SMZ kwa mwaka wa fedha 2018/2019
kama sheria na Kanuni za Baraza hili zinavyoelekeza.
Mheshimiwa
Spika, aidha nawapongeza na kuwashukuru kwa
dhati viongozi wa Wizara hii wakiongozwa na Waziri wao makini Mhe. Haji Omar
Kheir, Naibu Waziri, Mhe. Shamata Shaame Khamis, Nd. Katibu Mkuu, Wakuu wa
Mikoa pamoja Afisa Mdhamini Pemba, na watendaji wote kwa mashirikiano yao
makubwa waliyotuonesha katika Kamati yetu kwa kutekeleza majukumu yetu
ipasavyo. Vile vile, shukurani za pekee ziende kwa Wakuu, Maafisa na Wapiganaji
wote wa Idara Maalum za SMZ kwa mashirikiano yao waliyotupatia kwa kipindi
chote cha utekelezaji wa shughuli za Kamati.
Mheshimiwa
Spika, Sambamba na hayo, natumia nafasi hii
kuishukuru Wizara ya Nchi (OR) Tawala za Mikoa, Serikali za Mitaa na Idara
Maalum za SMZ kwa kutumia na kutekeleza vyema ushauri na maagizo ya Kamati
pamoja kuisimamia kikamilifu Bajeti yao ya mwaka 2017/2018, jambo hili limewawezesha
kujenga ari ya kuwasilisha mbele ya Kamati yetu, pamoja na Baraza lako Tukufu
Makadirio ya Mapato na Matumizi ya Fedha, kwa mwaka wa Fedha 2018/2019 ili
ipate baraka za Wajumbe wako na kwa mnasaba huo, tunaomba Baraza lako tukufu
liiridhie na liipitishwe Bajeti hii kwa maslahi ya wananchi na Serikali kwa
ujumla.
Mheshimiwa
Spika, Aidha, naomba kutoa shukrani na pongezi
za pekee kwa Serikali ya Mapinduzi ya Zanzibar chini ya uongozi imara wa Mhe.
Rais wa Zanzibar na Mwenyekiti wa Baraza la Mapinduzi Dkt. Ali Mohamed Shein,
kwa kusimama vyema katika uongozi wake na kuhakikisha maendeleo ya watu na
ustawi wa jamii nchini yameimarika pamoja na kusimamia maendeleo ya uchumi
kufuatana na misingi na madhumuni yaliyowekwa na Katiba ya Zanzibar ya mwaka
1984, kwa kuhakikisha upatikanaji wa huduma bora umefanikiwa.
Mheshimiwa
Spika, Ni matumaini ya Kamati yangu kuwa mafanikio
yanayopatikana katika uimarikaji wa uchumi wetu na huduma za kijamii yanatokana
na Utekelezaji mzuri wa Ilani ya Chama Cha Mapinduzi ya mwaka 2015/2020, ambapo
utekelezaji wake utaendelea kwa kipindi chote cha Bajeti ya mwaka 2018/2019 na
kuhakikisha kuwa hatua kubwa ya maendeleo inafikiwa chini ya misingi bora
iliyoainishwa ndani ya Ilani hii ili kuakisi na kuiwezesha jamii kiuchumi na
kujikwamua na hali ngumu ya umasikini.
Mheshimiwa
Spika, Bajeti hii imekadiriwa kufanya kazi kwa
kuzingatia malengo ya Serikali ya Mapinduzi ya Zanzibar na inaakisi hali halisi
ya uchumi wetu na harakati za kupunguza umasikini ifikapo mwaka 2020 lakini pia
kwa kuzingatia malengo ya Mkakati wa Kukuza Uchumi na Kupunguza Umasikini
Zanzibar (MKUZA III).
Mheshimiwa
Spika, pia nachukua nafasi hii kuwashukuru
kwa kazi kubwa walioifanya Wajumbe wa Kamati yangu wakati tukiwa tunapitia
bajeti hii, kwa kuonesha mashirikiano yao makubwa katika kutekeleza majukumu ya
Kamati hii.
Hivyo,
kwa ridhaa yako naomba sasa uwatambue Wajumbe wa Kamati hii kama ifuatavyo:
1.
Mhe. Machano Othman
Said Mwenyekiti
2.
Mhe. Mwantatu Mbarak
Khamis Makamo Mwenyekiti
3.
Mhe. Saada Ramadhan
Mwendwa Mjumbe
4.
Mhe. Wanu Hafidh Ameir Mjumbe
5.
Mhe. Nadir Abdulatif
Yussuf Mjumbe
6.
Mhe. Ali Khamis Bakar Mjumbe
7.
Mhe. Suleiman Makame
Ali Mjumbe
8.
Ndg. Ali Alawy Ali Katibu,
na
9.
Ndg. Haji Jecha Salim Katibu.
Mheshimiwa
Spika, Kamati ya Sheria, Utawala Bora na
Iadara Maalum imetumia uweledi wake wa hali ya juu katika kupitia, kuchambua na
kujiridhisha katika programu zote zilizokusudiwa kufanyiwa kazi kupitia Fungu
la Bajeti la wizara hii kama ilivyoelezwa katika Kanuni ya 96(1) na 106(3)
katika jadweli la kwanza la Kanuni za Baraza la Wawakilishi, 2016.
Mheshimiwa
Spika, Ni imani ya Kamati hii kwamba
kupatikana kwa fedha zilizopangwa katika Wizara hii kutasaidia kwa kiasi
kikubwa utekelezaji na ukamilishaji wa malengo yaliyokusudiwa kutekelezwa ikiwa
ni pamoja na kukamilisha miradi iliyotengwa kwa mwaka huu wa 2018/2019 na vile
vile kuendeleza mradi mkubwa wa Mahanga na nyumba za Askari wa Idara Maalum
kisiwani Pemba.
IDARA ZA MAKAO MAKUU (FUNGU D 01)
Mheshimiwa
Spika, katika kutekeleza kazi zake kwa mwaka
wa fedha 2017/2018 Kamati yangu imefanikiwa kutembelea na kujionea shughuli
mbali mbali za kawaida na zile za miradi ya maendeleo ambazo zinasimamiwa na
kuratibiwa na wizara hii katika utekelezaji wake, ikiwa zinakabiliwa na
changamoto kadhaa, kama vile uchache wa vitendea kazi na visivyokidhi wakati
tulionao, uhaba wa vyombo vya usafiri pamoja na upungufu mkubwa wa watendaji
katika sekta zilizogatuliwa, ubovu wa barabara za ndani pamoja na uchakavu wa
baadhi ya Mahanga na nyumba za Askari wetu wa Idara Maalum, hata hivyo, Kamati
inaipongeza sana Serikali kwa kuanza ujenzi wa Mahanga ya Wapiganaji wa Vikosi
vyetu kupitia mradi maalum.
Mheshimiwa
Spika, Kamati inashauri kwa mwaka wa fedha
2018/2019 Idara hizi kupatiwa fedha za kutosha na kwa wakati ili kuweza kutatua
changamoto ambazo zinawakwaza katika uendeshaji wa shughuli zao, kwa lengo la
kuleta ufanisi na kuimarisha sekta zote za maendeleo katika Taasisi hizo.
Mheshimiwa
Spika, Kamati inapongeza sana kazi nzuri
zinazofanywa na afisi kuu kwa kupitia na kuandaa miradi mbali mbali ya
maendeleo ambayo msingi wake ni kuongeza kasi ya maendeleo ya kiuchumi katika
nchi yetu. Hata hivyo, Kamati imebaini, katika bajeti hii wizara imekusudia
kujenga barabara za ndani kupitia Halmashauri zake mbali mbali za Unguja na
Pemba lakini fedha zilizokusudiwa kujengewa barabara hizo hazionekani katika
bajeti hii, jambo ambalo linatia shaka utekelezaji wake, Kamati inashauri
Serikali kupitia Mfuko wa Barabara kuwapataia fedha walau asilimia 30% ya
makusanyo yao ili Wizara iweze kujenga barabara za ndani.
Mheshimiwa
Spika, Kamati inashauri, Wizara inapoweka
mipango ya ujenzi wa barabara au mradi wowote uliokusudiwa kutekelezwa na Halmashauri
au Manispaa fedha zake zioneshwe mapema katika bajeti ya Wizara katika mwaka
husika ili wajumbe wa Baraza hili tukufu watambue mapema kiasi cha fedha zilizotengwa
kwa kuendeleza ujenzi huo kama zinakidhi mahitaji au hazikidhi kwa mujibu wa
umuhimu wa barabara hizo.
Aidha,
Kamati inashauri barabara ambazo zilikusudiwa kujengwa na Halmashauri katika
bajeti ya mwaka 2017/2018 na kushindwa kujengwa kwa ukosefu wa fedha, barabara
hizo zijengwe katika bajeti hii inayokuja kwa mwaka 2018/2019.
IDARA YA URATIBU WA
TAWALA ZA MIKOA NA
SERIKALI ZA MITAA
(Fungu D 07 – D 11)
Mheshimiwa
Spika, Katika programu ya Uratibu wa Tawala za
Mikoa na Mamlaka ya Serikali za Mitaa, kwa ujumla Kamati yangu ya Sheria,
Utawala Bora na Idara Maalum imeridhishwa na utekelezaji wa programu mbali mbali
zinazosimamiwa na Tawala za Mikoa pamoja Mamlaka ya Serikali za Mitaa zaidi
katika ukusanyaji wa mapato kutokana na baadhi ya Halmashauri, Mabaraza na
Manispaa kuvuka malengo waliyokusudia. Hii inaonesha wazi kuwa endapo vyanzo
vya mapato vitasimamiwa ipasavyo basi hali ya uchumi katika nchi yetu
itaimarika na hivyo kuweza kutekeleza vyema Ilani ya Chama Cha Mapinduzi ya
mwaka 2015/2020.
Mheshimiwa
Spika, Kamati imebaini kuwepo kwa changamoto katika
utekelezaji wa Sheria ya Tawala za Mikoa, nambari 8 ya mwaka 2014, kifungu cha
30(1) amabacho kinazitaka Kamati za Maendeleo za Mikoa kukutana mara mbili kwa
mwaka, Hata hivyo, vikao hivyo havifanyiki na kupelekea Mkoa kushindwa kufanya
tathmini nzuri juu ya utekelezaji wa shughuli zake hivyo kupelekea kukosekana
kwa maendeleo ya nchi.
Mheshimiwa
Spika, kukosekana kufanyika kwa vikao hivi
katika Kamati za Maendeleo ya Mkoa kunapelekea malalamiko mbali mbali kwa
baadhi ya wajumbe wa Kamati hizi wakiwemo Wabunge ambao huingiziwa fedha zao
katika miradi iliyopangwa lakini pia hukosa marejesho ya matumizi ya fedha hizo
kwa vile vikao hivi vimekosekana.
Mheshimiwa
Spika, Kamati inashauri katika bajeti hii tunayoijadili,
Serikali kupitia Wizara hii ya Tawala za Mikoa na Idara Maalum za SMZ kuhakikisha
kuwa vikao hivi vinafanyika na kwa wakati mahususi ili kuendana sambamba na
sheria hii pamoja kusaidia kuibua miradi mengine ya kimaendeleo.
Mheshimiwa
Spika, Kamati inaipongeza sana Serikali ya
Mapinduzi ya Zanzibar kwa kusimamia kikamilifu mradi wa Ugatuzi ambao kwa mwaka
huu unaoishia Juni 30, 2018 mafanikio kadhaa yamepatikana ikiwa ni pamoja na uelewa
wa wananchi juu ya dhana kamili ya Ugatuzi na faida zake kwa jamii. Kwa kuwa
hili ni jambo jema kwa nchi yetu na kwa kuwa lengo la Serikali ni
kuwashirikisha wananchi katika Serikali yao kama ambavyo Katiba yetu
imetuelekeza, basi ni vyema Ugatuzi ukaendelezwa na kusimamiwa. Aidha, Kamati
inaiomba Serikali ifikiriekugatua pia sekta ya maji ili kupunguza changamoto ya
upatikanaji wa maji safi na salama ambazo inajitokeza katika Halmashauri mbali
mbali hapa nchini.
Mheshimiwa
Spika, kwa kuwa dhana ya Ugatuzi ni njema na
inaleta ufanisi kwa watendaji, Kamati inapongeza sana juhudi za Serikali katika
kusimamia vyema Ugatuzi katika Taasisi zilizogatuliwa na kupelekwa Halmashauri.
Aidha, Kamati imeridhishwa na Wizara ambazo zimegatua watumishi wao kikamilifu
na kuwapeleka Mamlaka ya Serikali za Mitaa ikiwemo Wizara ya Afya na Wizara ya
Elimu na Mafunzo ya Amali. Hata hivyo, Kamati haikuridhika na mpango wa Wizara
ya Kilimo, Maliasili, Mifugo na Uvuvi kwa kuchelewesha kupeleka Stahiki za
watumishi wake walioko Halmashauri na hivyo kushindwa moja kwa moja kuonekana
kwa Bajeti yao katika fedha za Matumizi Kutoka Wizarani kwenda katika
Halmashauri zao, hadi tunajadili na kupitisha bajeti hii kwenye Kamati, Wizara
ya Kilimo, Maliasili, Mifugo na Uvuvi imehamisha mishahara tu bado stahiki nyengine
kama vile fedha za likizo, mchango wa ZSSF na matumizi mengine (OC). Hivyo,
Kamati inaiomba Wizara ya Fedha na Mipango kuingilia kati ili fedha hizo
zipelekwe Wizara ya Nchi (OR) Tawala za Mikoa, Serikali za Mitaa na Idara
Maalum za SMZ katika mwaka wa fedha 2018/2019.
Aidha, Kamati inashauri
Wizara kwa kushirikiana na Mamlaka ya Serikali za Mitaa kutoa uelewa juu ya
matumizi ya fedha za miradi ya maendeleo kwa Waheshimiwa Madiwani juu ya namna
ya kutumia fedha za miradi kama sheria zinavyoelekeza.
Mheshimiwa
Spika, Kamati imebaini katika mwaka huu wa
fedha kuwepo kwa changamoto kubwa ya kukosekana kwa Hatimiliki katika baadhi ya
maeneo ya uzalishaji pamoja na majengo ya ofisi, jambo linalopelekea maeneo
hayo kutotambulika kisheria kwa maeneo hayo na hivyo kupelekea baadhi ya mapato
kupotea. Hata hivyo, Kamati imeelezwa kuwepo kwa agizo la Serikali la kupatiwa
Hati kwa maeneo yote yanayomilikiwa na Halmashauri za Unguja na Pemba pamoja na
kupatiwa Hati za Madiko yaliyomo katika Halmashauri hizo na kuleta taswira
njema kwa Serikali yetu ambayo kila siku ipo katika harakati za kuhakikisha
suala la ukusanyaji mapato limeimarika.
Mheshimiwa
Spika, Kamati inashauri Baraza la Mji Wete
pamoja na Halmashauri ya Micheweni kuhakikisha zinaongeza nguvu ya ukusanyaji
wa mapato ikiwa ni pamoja na kutoa elimu kwa wananchi juu ya umuhimu wa ulipaji
kodi na kuwachukulia hatua wale wote wanaokwenda kinyume na agizo la ulipaji
kodi na hivyo, kupelekea mapato ya Taasisi hizo kushuka ingawa katika kipindi
hiki inaonekana Baraza la Mji Wete likipiga hatua ya ukusanyaji ila juhudi hizo
zinahitaji kulindwa na kuimarishwa.
Mheshimiwa
Spika, Kamati yangu inaliomba Baraza lako
tukufu kuidhinisha kiasi cha fedha zilizotengwa kwa ajili ya uendeshaji wa
programu zote zilizopangwa katika Tawala za Mikoa pamoja na Mamlaka ya Serikali
za Mitaa ili kusaidia kufikia malengo yaliyokusudiwa.
PROGRAMU ZA IDARA MAALUM ZA SMZ (FUNGU D 02 – D 06)
Mheshimiwa
Spika, Kamati
inapongeza sana juhudi zinazofanywa na wapiganaji wetu wa vikosi kwa kazi nzito
wanazozifanya za kulinda, kusimamia na kudumisha usalama wa raia na mali zao
pamoja na kuhakikisha kuwepo kwa amani na utulivu katika nchi yetu. Sambamba na
hayo, Kamati imeridhika kwa kiasi kikubwa hatua iliyofikiwa ya ujenzi wa
Mahanga ya Askari kisiwani Pemba, juhudi hizo za Serikali zinaonekana kutia
moyo kwa kuona kuwa Serikali inawajali na kuwathamini vijana wetu na vile vile,
Serikali kutekeleza kwa vitendo ahadi zake zilizotolewa katika Ripoti ya Kamati
na Bajeti ya mwaka 2017/2018, Kamati pia, inaiomba Serikali ya Mapinduzi
Zanzibar ifikirie kuijenga kwa kiwango cha lami Barabara ya kutoka Kama meli
kumi hadi Kambi ya KMKM kama ambayo inatarajiwa kujengwa Chuo cha Kijeshi kwa
Vikosi vyetu vya SMZ.
Mheshimiwa
Spika, Kamati imebaini kuwepo changamoto ya
kuwekewa kiwango kikubwa cha Makadirio ya Mapato kwa vikosi vya Idara Maalum
ambapo kila kikosi kimetakiwa kukusanya mapato kama inavyoonekana katika
Mamlaka ya Serikali za Mitaa. Hivyo, Kamati inaitaka Wizara ya Fedha wakati
wanapofikiria upangaji na Makadirio ya ukusanyaji wa Mapato kwa Idara Maalum
wafikirie na vyanzo vyao vya Mapato na vile vile wazingatie kazi za msingi zinazotekelezwa
katika Idara hizi, kwa mfano Kikosi cha Valantia Zanzibar kimekasimiwa
kukusanya jumla ya shilingi 60,259,000.00 ambazo zitaenda katika mfuko mkuu wa
Serikali hali ambayo ni vigumu kukusanya fedha hizo kutokana na ukoksefu wa
vyanzo vya mapato lakini pia uchache wa wataalamu na rasilimali ziliomo katika
kikosi hiki zinachangia kutofikiwa kwa malengo.
Mheshimiwa
Spika, aidha, Kamati inaishauri Serikali ya
Mapinduzi ya Zanzibar kupitia Wizara ya Fedha kupunguza au kuondosha kabisa Makadirio
ya Mapato ya shilingi 70,991,000.00/- kwa mwaka wa fedha 2018/2019 kwa Idara ya
Chuo cha Mafunzo ambao wakati wote nguvu zao zipo katika ujenzi wa Mahanga ya
Askari na Nyumba za Maafisa na vile vile wanaendelea na ujenzi wa gereza la
watoto – Hanyegwa Mchana, hivyo hakuna chanzo chengine chochote cha mapato
ambacho kitatumika kukusanyia fedha hizo. Pia, Kikosi cha Valantia kimepangiwa
kuchangia shilingi 60,259,000/- toka fungu la ada ya ulinzi, hata hivyo, kwa
mujibu wa maelezo yao kazi hiyo sasa itafanywa na Wakala wa Ulinzi wa JKU.
Mheshimiwa
Spika, Kamati pia haikuridhika na kiwango cha
Mapato ambacho Kikosi cha Zimamoto na Uokozi wamepangiwa kukusanya ambacho ni
jumla ya shilingi 74,184,000.00 kiwango hicho ni ikubwa na Kikosi hiki hakina
uwezo wala vyanzo vya kupata mapato hayo. Kati ya fedha waliopangiwa Kikosi cha
Zimamoto, shilingi 25,000,000/- ni ada ya ulinzi na shilingi milioni 3 ni ada
ya ujenzi, shughuli ambazo hazipo kwa mwaka huu wa fedha.
Mheshimiwa
Spika, Kamati kwa mara nyengine tena
imesikitishwa na baadhi ya Taasisi za Serikali kukataa kutekeleza maagizo ya
Mheshimiwa Rais wa Zanzibar na Mwenyekiti wa Baraza la Mapinduzi Mheshimiwa Dkt
Ali Mohamed Shein la kuwaimarishia Kikosi cha Zimamoto huduma zao katika Uwanja
wa Ndege wa Kimataifa wa Abeid Amani Karume, ikiwemo ujenzi wa Banda la
kuhifadhia gari zao za Zimamoto eneo la Uwanja wa Ndege wa zamani pamoja na
kuwapatia maji katika hodhi lao liliopo katika kituo cha kipya uwanjani hapo na
kuifanyia matengenezo barabara ambayo inatumiwa na magari ya Zimamoto kiwanjani
hapo.
Aidha, Kamati
inaishauri Wizara ya Tawala za Mikoa kukaa na Wizara nyengine kuangalia jinsi
ambavyo Zimamoto watapata mgao wao kutokana na huduma wanazotoa katika Taasisi
mbali mbali hasa uwanja wa Ndege wa Kimataifa, kama ilivyo kwa upande wa
Tanzania Bara na nchi nyenginezo Ulimwenguni.
Mheshimiwa
Spika, Kamati inapongeza juhudi za kuanzishwa
kwa Ofisi ya Wakala wa Ulinzi wa JKU ambapo majukumu ya ofisi hii yameainishwa
kwa mujibu wa Sheria namba 2 ya mwaka 2015 na itafanya kazi za ulinzi katika
sekta mbali mbali ikiwemo mashirika na watu binafsi, ni imani ya Kamati yangu
kuwa ofisi hii itaimarisha ulinzi na usalama wa mali za raia na wageni
wanaowekeza katika nchi yetu. Hata hivyo, katika kufikia malengo yake, Kamati
inashauri Serikali iangalie uwezekano wa kupatiwa fungu lao la fedha ambalo
litawawezesha kujitegemea wenyewe kwa mujibu wa majukuu yao.
Aidha, Kamati inashauri
Wajumbe wa Baraza hili tukufu kuridhia na kuidhinisha fedha za ruzuku
zilizopangwa kwa ajili ya Ofisi hii ili ipate kwenda sambamba na malengo yaliyokusudiwa.
Mheshimiwa
Spika, kwa
nyakati tofauti Kamati imekuwa ikizungumzia suala la Hatimiliki kwa maeneo
yanayokaliwa au kutumiwa na vikosi vya Idara Maalum za SMZ kwa shughuli mbali
mbali ikiwemo ulinzi na usalama wa raia na mali zao. Kwa kuwa suala hili
limekuwa na ukakasi katika utekelezaji wake kwa Bajeti iliyopita lakini pia, na
Bajeti hii tuliyonayo; Kamati inashauri Serikali kupitia Idara ya Ardhi kufuta
baadhi ya viwanja ambavyo vimetolewa na Serikali kwa makazi ya watu na vipo
karibu na maeneo ya Kambi hususan katika Kambi ya Ndugukitu kisiwani Pemba
amabapo kwa kiasi kikubwa hupelekea wakaazi wa maeneo hayo kukwaza shaughuli
mbali mbali za askari wetu.
Mheshimiwa
Spika, kwa kuwa kilimo ni uti wa mgongo na kwa
kuwa kilimo ndio msingi mkuu wa maendeleo katika nchi yoyote, Kamati inashauri
Wizara ya Fedha na Mipango na Wizara ya Kilimo, Maliasili, Mifugo na Uvuvi itakapopata
miradi ya Kilimo pia iwashirikishe na kuviwezesha kitaalamu na kifedha Vikosi
vya JKU na Mafunzo katika kuendesha miradi yao ya Kilimo kwa mashamba yote
yaliyochini ya vikosi hivyo yanatumika kwa ajili ya uzalishaji wa chakula na
mboga mboga.
WAKALA
WA USAJILI WA MATUKIO YA KIJAMII (FUNGU D 12)
Mheshimiwa
Spika, Wakala wa Usajili na Matukio ya Kijamii
inalo jukumu kubwa la kuimarisha mfumo wa Usajili wa Matukio ya Kijaamii katika
nchi yetu na ni Taasisi pekee ambayo tunaitegemea kwa ajili ya kutunza takwimu
sahihi za jamii yetu. Katika ziara zilizopita, Kamati imebaini kuwepo kwa
changamoto kubwa ya ucheleweshwaji wa kutolewa vyeti vya kuzaliwa katika Wilaya
zote za Unguja na Pemba.
Kamati inashauri Serikali
kwa Bajeti ya mwaka wa fedha 2018/2019 Serikali kupitia Wakala wa Usajili wa
Matukio ya Kijamii kuhakikisha kwamba inaweka miundombinu rafiki na mazingira
rahisi katika kutoa vyeti vya kuzaliwa katika ofisi za Wilaya zote Unguja na
Pemba kwa kuzingatia utaratibu unaofaa.
HITIMISHO
Mheshimiwa Spika,
katika Bajeti hii ambayo inatumia mfumo wa PBB (Program Based Budget) ina
utaratibu wake mzuri ambao tumeshauzoea Waheshimiwa Wajumbe wote kwa wale wazoefu
wa siku nyingi humu Barazani lakini pia na wale wapya wameshauzoea mfumo huu.
Kwa maana hiyo lipo tatizo la kubadilisha vipengele vilivyomo ndani ya Mfumo
huu kwa kuzingatia programu kuu na programu ndogo jambo ambalo limewakwaza sana
Wajumbe wakati wa upitiaji wa Bajeti hii katika Kamati. Kamati inashauri wakati
Wizara ya Fedha wanapofanya mabadiliko ndani ya Mfumo huu tuliouzoea katika
kupitia Bajeti basi watoe taarifa kwa Wajumbe ili kuzuia hoja zitakazojengwa
dhidi ya mabadiliko hayo.
Mheshimiwa Spika,
kwa kumalizia, nachukua fursa hii kuiomba jamii katika kipindi hiki cha mvua za
masika zinazoendelea kunyesha kuzidi kuweka usafi katika mazingira yetu kwa
kuitunza michirizi ya maji ya mvua na kuepuka kutupa taka kiholela katika kila
sehemu ndani ya miji yetu, kufanya hivyo kutasaidia kujikinga na maradhi ya
mripuko na malaria ambayo ni hatari kwa nchi yetu.
Mheshimiwa Spika, pia,
naomba niwashukuru Makamanda wa Idara Maalum za SMZ, Wakuu wa Mikoa, Wakuu wa
Wilaya, Makatibu Tawala wa Mikoa na Wilaya, Wakurugenzi, Madiwani, Masheha na
watendaji wote wa Ofisi ya Rais, Tawala za Mikoa, Serikali za Mitaa na Idara
Maalum za SMZ kwa utendaji wao, uzalendo wao na mashirikiano yao katika
kutekeleza majukumu ya Kamati yetu katika kipindi chote cha maisha ya Kamati
hii.
Mheshimiwa
Spika, mwisho kabisa, Kamati inawaomba Waheshimiwa Wajumbe wa Baraza lako Tukufu waichangie
Bajeti hii na hatimae waidhinishe Ofisi ya Rais, Tawala za Mikoa, Serikali za
Mitaa na Idara Maalum za SMZ, makadirio ya fedha zilizopangwa kutumiwa kwa
mwaka wa fedha 2018/2019.
Mheshimiwa Spika, Naomba Kuunga Mkono Hoja.
Ahsante,
Machano Othman Said,
Mwenyekiti,
Kamati ya Sheria, Utawala Bora na Idara Maalum,
Baraza la Wawakilishi,
Zanzibar.
.jpg)
No comments:
Post a Comment