657 mabonge nyanya

Na Rose Chapewa, Morogoro

WATU 657 wamegundulika kuwa na unene uliokithiri, wakati 14 wakiwa na dalili za saratani ya matiti mkoani Morogoro,wakati wa zoezi la upimaji afya lililofanywa na Mfuko wa Taifa wa Bima ya Afya (NHIF) kwenye uwanja wa Jamhuri Mkoani hapa.

Akizungumza na gazeti hili, ofisa Mawasiliano Mwandamizi wa (NHIF) Luhende Singu alisema  katika zoezi hilo watu 765 walipimwa hali lishe, ambapo kati ya hao 6 walikuwa na hali duni ya lishe, huku 102 wakiwa na hali nzuri.

Ofisa Mawasiliano huyo alisema, watu 78 waligundulika kuwa na shinikizo la juu la damu, na kwamba watu 251 waliojitokeza kupima saratani ya matiti  14 waligundulika kuwa na dalili za ugonjwa huo.

Singu alisema, waliobainika kuwa na dalili za Saratani walipewa rufaa kwenda hospitali ya Mkoa wa Morogoro kwaajili ya kufanyiwa uchunguzi zaidi, ambapo watakaobainika kuwanayo wataandikiwa kwenda kupata matibabua katika Hospitali ya Ocean Road Jijini Dar es salaam.

Kwa Upande wake Dk. Adolph Kahamba  kutoka mfuko wa Bima ya Afya (NHIF) amewataka wananchi kuzingatia lishe bora, ili kuepuka  magonjwa yasiyo ya kuambukizwa, yatokanayo na ulaji wa vyakula visivyozingatia lishe  ikiwemo kansa, kisukari, shinikizo  la damu na  figo.

Alisema ikiwa wananchi watazingatia matumizi bora ya vyakula, watakuwa na hali lishe nzuri, pamoja na kuepuka kupatwa na magonjwa yatokanayo na  ulaji wa vyakula visivyozingatia lishe.

Aidha alisema, upo umuhimu wa kutoa elimu ya afya kwa jamii nzima ya Tanzania, kwa kuwa  imegundulika kuwa  watu wengi  hawana tabia ya kupima afya zao mara kwa mara, na hivyo kusababisha magonjwa kuwa sugu katika miili yao.

Hata hivyo aliwapongeza wakazi wa mkoa wa Morogoro kwa mwitikio waliouonesha, na kwamba ni mfano wa kuigwa na mikoa mingine  mara zoezi hilo litakapofanyika katika maeneo yao.