Wapambe wa wagombea UVCCM nusura wazichape

Na Masanja Mabula, Pemba

 

WAPAMBE wa wagombea wa nafasi ya Mwenyekiti wa Jumuiya ya Vija ya CCM (UVCCM) mkoa wa kaskazini Pemba nusura wazichape hadharani baada ya taarifa za matokeo ya uchaguzi kuvuja kuwa wagombea wao wamepitana kwa kura tatu, huku pia kukiwa na taarifa ya kuwepo ongezeko la kura tatu zaidi ya mahudhurio ya wajumbe.

Kuvuja kwa matokeo hayo kulisababisha hali ya sintofahamu kwa wagombea na wapambe wao nje ya ukumbi wa Jamhuri hall ambapo wapambe wa mmoja wa mgombea walionekana kutokubaliana na matokeo hayo wakidai kura zimechakachuliwa.

Baadhi ya wapambe hao pamoja na wajumbe waliokuwa wakimuunga mkono mgombea wao walipanda jazba na kutaka kumtembezea kipigo kijana mmoja anayedaiwa kupiga kura licha ya kutokuwa mjumbe halali wa jumuiya hiyo.

Fujo hizo zilimlazimisha Katibu wa UVCCM mkoa huo, Mussa Said Kisinja kuingilia kati na kumnusuru kijana huyo ambaye alikuwa amezongwa na wapambe wa mmoja wa mgombea, ambapo Katibu huyo alitumia hekima na busara na  hivyo kufanikiwa kuwatuliza wapambe  na mgombea wao.

"Kama kuna udanganyifu umefanyika, basi tumieni utaratibu kikatiba ya nini kufanya fujo, kanuni zipo na sheria zipo, kuweni na moyo wa kustahamili ikiwa kuna uchakachuaji lazima sheria za uchaguzi zifuatwe," Kisinja alisema.

Hata hivyo, hali ilibadilika mara ya baada ya matokeo kutangazwa kwani wagombea hao walikuwa wamepitana kwa zaidi ya kura 30 jambo ambalo hata mgombea na wapambe waliokuwa na jazba walitulia na kukubali matokeo.

Msimamizi wa uchaguzi huo Katibu wa CCM  mkoa wa kaskazini Pemba, Hassan Ali Shaali ndiye alizima hali hiyo ya sintofahamu baada ya kumtangaza Fadhila Nassor Abdi kuwa mshindi baada ya kupata kura 86 huku Yahya Khamis Ali akipata kura 33 na Khamis Hamad alipata kura 16.

Nafsi ya ujumbe wa mkutano mkuu wa vijana taifa waliochaguliwa ni Omar Juma 69, Asila Ali Salim 68, Time Bakar 62 na Viwe Khamis ambaye pia ni mjumbe wa baraza la wawakilishi kupitia vijana mkoa huo aliyepata kura 53.

Aidha msimamizi huyo wa uchaguzi alikiri kuwepo na ongezeko la kura za ziada  3 na kuwaomba wagombea kuridhika na matokeo yaliyotangazwa kwa kuwa aliyepata na aliyekosa wote wana lengo moja na kuijenga jumuiya hiyo na CCM kwa ujumla.