Asha Bakar ataka wananchi wasisemewe katiba mpya

Na Masanja Mabula, Pemba

MAKAMU Mwenyekiti wa Jumuiya ya Umoja wa Wanawake (UWT), Asha Bakar Makame amewataka wananchi katika mkoa wa kaskazini Pemba kuacha ushawishi wakati wa kutoa maoni ya katiba ya Jamhuri ya Muungano bali kila mmoja atoe maoni kwa mujibu anavyoona inafaa.

Akizungumza na mwandishi wa habari hizi Wete, alisema pamoja na kuwepo na baadhi ya watu wanopita mitaani kuwashawishi wananchi na kuwafundisha jinsi ya kuzungumza  mbele ya tume, lakini wanapaswa kuwapuuza na kufikiria ni kasoro zipi za muungano zinahitaji marekebisho.

Alisema katiba itakayopatikana itakuwa na maslahi kwa wananchi wote , hivyo kuchangiwa mawazo na baadhi ya watu si  jambo la busara kwa vile mawazo yao hayatapata fursa  ya kusikilizwa na wajumbe wa kuratibu maoni ya katiba.

"Wananchi acheni jazba, na waepukeni wanaowashawishi na kuwafundisha jinsi ya kwenda kuzungumza mbele ya tume, kwani mtakuwa mmepoteza haki yenu kikatiba na mawazo mtakayotoa yatakuwa ni faida ya waliowafundisha na sio kwa ajili ya umma," alisema.

Aidha Makamu Mwenyekiti huyo aliwataka wanawake kuwa msitari wa mbele kwenda kutoa maoni yao na kuwashauri wafike mapema mbele ya tume ya kuratibu maoni ambayo inatarajiwa kuwasili mkoa wa kaskazini Pemba Jumapili kuendelea na mchakato wa ukusanyaji wa maoni.

Alifahamisha kuwa pamoja na katiba ya sasa kuwa na changamoto kadhaa, huu ni wakati wa kuziondoa changamoto hizo kupitia maoni na si vyenginevyo.

"Zipo changamoto nyingi ndani ya Muungano ambazo zinahitaji kufanyiwa marekebisho, hii ni fursa pekee kwa wananchi wa mkoa wa kaskazini Pemba kuitumia na wasiwe na woga kwani tume imeundwa kisheria na itaheshimu maoni ya kila mmoja," alieleza.

Mweyekiti huyo pia amekanusha taarifa za kwamba yeye ni miongoni wa wanachama wa CCM wanaopinga Muungano na kusema kuwa hizo ni propanga za kumchafua kisiasa kwani yeye ni miongoni  mwa viongozi walio katika mstari kuutetea muungano.

"Najua faida za muungano, unaposema kuwa mimi siutaki nitashindwa kukuelewa, hizo ni njama za baadhi ya wanachama wa UWT wanaotaka kujipatia umaarufu kisiasa, natambua kuwepo na ndugu zetu Tanzania Bara, leo iweje niukatae Muungano?" alihoji.

Hata hivyo alisema bado yeye  ana mapenzi makubwa na CCM  na ataendelea na msimamo wa kukitetea,kukilinda na kuzisimamia sera zake ili ziendelee kuwanufaisha wanachama na Watanzania kwa ujumla.