Tanzania kuanzisha soko la mazao

Na Mwandishi maalum

UKOMBOZI mkubwa zaidi wa wakulima wa Tanzania utafikiwa mwishoni mwa mwaka ujao wakati serikali inapopanga kuzindua soko la mazao (Commodity Exchange) ambalo kazi yake kuu itakuwa ni kuwahakikishia soko la uhakika zaidi na bei za uhakika zaidi wakulima.

Dk. Eleni Z. Gabre Madhin ambaye anashauri kuhusu uanzishwaji kwa soko la mazao katika Tanzania amemwambia Rais wa Jamhuri ya Muungano wa Tanzania, Jakaya Mrisho Kikwete kuwa soko hilo linaweza kuanzishwa mwishoni mwa mwaka ujao ili mradi tu mchakato wa kuanzishwa kwake uanze Disemba, mwaka huu.

Rais Kikwete na Dk. Eleni Madhin wamekutana kwenye hoteli ya Ngurdoto mjini Arusha ambako wote wawili wanahudhuria mkutano wa pili wa Taasisi ya Mapinduzi ya Kijani katika Afrika (AGRA).

Dk. Eleni Madhin ambaye ni Mwanzilishi na Mtendaji Mkuu wa Soko la Mazao la Ethiopia ameshauri kuwa kikosi kazi cha kuanzishwa kwa soko hilo kianzishwe haraka iwezekanavyo ili kuwezesha mchakato wa kuanzishwa kwa soko hilo uweze kuanza Disemba, mwaka huu.

“Kama tukianza mchakato Disemba, mwaka huu, na tukiweza kuunda kikosi kazi katika wiki chache zijazo, basi naweza kukuhakikishia kuwa utaweza kuwa na soko la mazao linalofanya kazi mwishoni mwa mwaka 2013,” 

alisema Dk. Eleni Madhin na kuongeza:“Ushauri wangu ni kwamba Rais ukubali kuanzisha kikosi kazi cha taifa kikishirikisha maofisa kutoka taasisi mbali mbali zikiwamo Wizara ya Kilimo, Wizara ya Fedha, Wizara ya Biashara na Viwanda, Benki Kuu ya Tanzania (BoT), Mamlaka ya Mapato Tanzania (TRA), Mamlaka ya Soko la Mitaji na taasisi nyingine ambazo unaona zinafaa ili kazi hii ianze mapema iwezekanavyo.”

Rais Kikwete pia amekutana na kufanya mazungumzo na Mtendaji Mkuu wa Kampuni ya Mbolea ya Yara, Jorgen Ole Haslestad.

Viongozi hao wawili walizungumzia uwekezaji wa Yara katika sekta ya kilimo nchini Tanzania.

Aidha, Rais Kikwete amekutana na kufanya mazungumzo na Rais wa Shirika la Kimataifa ya Maendeleo ya Kilimo (IFAD), Dk. Konaye Mwanze.

Dk. Mwanze amemwambia Rais Kikwete kuwa Tanzania inatarajiwa kupata msaada wa kati ya dola za Marekani milioni 75 na milioni 80 katika muhula wa kati ya mwaka 2014 na 2017.